ށ. ގޮނާފަރު ފަޅުގެ ބޭރަށް ޑައިވްކުރަން ގޮސް އުޅެނިކޮށް ގެއްލުނު ޒުވާނަކު މަރުވެފައި އޮއްވާ ފެނިއްޖެ އެވެ.
މަރުވެފައި ވަނީ ރ. އުނގޫފާރަށް ނިސްބަތްވާ އަބްދުﷲ ސޯދިގު، 22 އެވެ.
ފުލުހުން ބުނީ ގޮނާފަރު ފަޅުގެ ބޭރަށް ޑައިވްކުރަން ގޮސް އުޅެނިކޮށް އޭނާ ގެއްލިގެން ރިޕޯޓްކޮށްފައި ވަނީ މިއަދު 3:00 ހާއިރު ކަމަށެވެ.
އޭނާ ހޯދުމުގެ މަސައްކަތްކުރަނިކޮށް ފެނިފައި ވަނީ 4:15 ހާއިރު ކަމަށާއި އިތުރު ފަރުވާއަށް އެ އަތޮޅު ކަނޑިތީމު ސިއްހީ މަރުކަޒަަށް ގެންދިޔައިރު ވެސް އެ ޒުވާނާ މަރުވެފައިވާ ކަމަށް އެ ސިއްހީ މަރުކަޒާ ހަވާލާދީ ފުލުހުން ބުންޏެވެ.