ޗާގޮސްގެ މައްސަލަ ފާހަގަކޮށް ރައީސް ވިދާޅުވީ ދެމޫނުގެ ވެރިޔަކަށް ނުވުމަށާއި ދޮގު ވާހަކަ ނުދެއްކުމަށް

ރާއްޖެ އާއި މޮރިޝަސްއާ ދެމެދު އުފެދިފައިވާ އިމުގެ މައްސަލާގައި ސަރުކާރަށް އަމާޒުކުރާ ފާޑުކިޔުންތަކަށް ރައީސް އިބްރާހިމް މުހައްމަދު ސޯލިހް ފުރަތަމަ ފަހަރަށް ރައްދު ދެއްވައިފި އެވެ.

ރާއްޖެ އިސްލާމްވީ ދުވަހުގެ މުނާސަބަތުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ އިސްލާމްދީނަކީ ވަރަށް ފުރިހަމަ އަދި ވަރަށް ޝާމިލް ނިޒާމެއް ކަމަށާއި އެ ދީން އެންމެ ބޮޑަށް ބާރުއަޅަނީ ދެ މޫނުގެ ވެރި ބަޔަކަށް ނުވުމަށް ކަމަށެވެ. އިސްލާމްދީނަކީ ސުލްހަ އާއި ހަމަޖެހުމާއި އެކުވެރިކަމުގެ ދީން ކަމަށާއި އެ ސިފަތައް މުޖުތަމައުގައި ދެމެހެއްޓުމަށް މުސްލިމުންގެ ކިބައިގައި ހަރުލައްވަން ޖެހޭ އެންމެ މުހިންމު ސިފައަކީ ތެދުބުނުން ކަމަށް ވެސް ވިދާޅުވި އެވެ.

"ކޮންމެ ކަމެއްގައި ވެސް ތެދު ބަހުން ވާހަކަ ދެއްކުން. ދޮގު ވާހަކަތަކާއި ޔޯލަ ވާހަކަތައް ނުފެތުރުން. ހަގީގަތް އެނގިތިބެ މަސްލަހަތު ނަގައިލުމަށްޓަކައި އޮޅުވައިލައިގެން ވާހަކަ ނުދެއްކުން. އެހެން ނަމަވެސް ހަގީގަތާ ހިލާފު ދޮގު ވާހަކަތަކެއް ފަތުރައިގެން މުޖުތަމައުގެ ހަމަޖެހުމާއި މަސްލަހަތު ނަގައިލުމަށް ބަޔަކު މަސައްކަތްތަކެއް އެބަ ކުރޭ،" އިމުގެ މައްސަލާގައި ސަރުކާރުން ރާއްޖޭގެ ބައެއް "ވިއްކާލި" ކަމުގެ ތުހުމަތަށް އިޝާރާތްކުރައްވަމުން ރައީސް ވިދާޅުވި އެވެ.

ރައީސް ވިދާޅުވީ ވަރަށް ބޮޑަށް ހުޅުވިފައިވާ ދުނިޔެއެއްގައި މިނިވަންކަމާއި ސިޔާދަތު ރައްކާތެރިކުރުމުގެ އަޑުތައް ގުގުމައިފައިވާ މުޖުތަމައެއްގައި އުޅެމުންދިޔަ ނަމަވެސް ދޭދޭ ގައުމުތަކުގެ މެދުވައި އުފެދިފައި ހުރި ސަރަހައްދީ އިމުގެ އެތައް މައްސަލައެއް ހައްލު ނުކުރެވި އެބަހުރި ކަމަށެވެ. އަދި ދުނިޔޭގެ ބޮޑެތި ބާރުތަކުގެ މެދުގައިވެސް އެފަދަ ކޯޅުންތައް ހިނގާ ކަމަށް ރައީސް ވިދާޅުވި އެވެ.

މި ކަމުގައި ވެސް ވަކި މީހެއްގެ އަމިއްލަ ބޭނުމަކަަށް ނުވަތަ ސިޔާސީ މަގުސަދެެއް ހާސިލުކުރުމަށް އަދި ކަމުގެ ހަގީގަތް އެނގި ތިބެ ކަނޑައެޅިގެން ދޮގު ވާހަކަތަކެއް ފަތުރަމުން ދިއުމަކީ ވަރަށް ދެރަ މައްސަލައެެއް: ރައީސް

ރައީސް ވިދާޅުވީ ރާއްޖޭގެ ކަނޑުގެ ސަރަހައްދާއި ޗާގޯސްގެ ކަނޑުގެ ސަރަހައްދު ކަނޑައެޅުމުގައި އޮތް ފުށުއަރާ ސަރަހައްދުގެ މައްސަލައަށް ހައްލެއް ނުހޯދި އޮންނަތާ ވަރަށް ގިނަ އަހަރުތަކެއް ވެފައިވާ ކަމަށެވެެ. އަދި އެ މައްސަލަ ހައްލުކުރަން މީގެ 30 އަހަރު ކުރިން 1992 ގައި އޭރުގެ ދިވެހި ސަރުކާރުން އިނގިރޭސި ސަރުކާރާ އެކުގައި މަސައްކަތްކުރި ކަމަށާއި އޭރު އިނގިރޭސި ސަރުކާރާ އެކުގައި އެއްބަސްވެވިފައި ވަނީ ފުށުއަރާ ސަރަހައްދު ދެ ގައުމަށް ހަމަހަމައަށް ބަހައިލުމަށް ކަމަށެވެ.

އޭގެ ފަހުން 2011 ވަަނަ އަހަރު އޭރުގެ ދިވެހި ސަރުކާރުން މޮރިޝަސް ސަރުކާރާ އެކުގައި މި މައްސަލަ ހައްލުކުރަން މަޝްވަރާ ކޮށްފައިވާ ކަމަށާއި އަދި އޭރު އެއްބަސްވެފައިވަނީ ދެ ގައުމު ދެމެދުގައި ވާހަކަ ދައްކައިގެން ފުށުއަރާ ސަރަހައްދުގެ މަައްސަލަ ހައްލުކުރަން ކަމަށް ވިދާޅުވި އެވެ.

"މި މައްސަލައިގައި އަޅުގަނޑުމެން މިހާރު ވެސް ދަމަހައްޓަމުން މި އަންނަނީ މި ކަމުގައި އެންމެ ކުރިން ފެށިގެން ވެސް ދިވެހި ދައުލަތުން ދަމަހައްޓަމުން އައި ދިވެހިރާއްޖޭގެ އެންމެ މަތީ މަސްލަހަތު ދިފާއުކުރުމުގެ ސިޔާސަތު،" ރައީސް ވިދާޅުވި އެވެ.

ދިވެހިރާއްޖެ އިސްލާމްވި ދުވަހާ ގުޅުވައިގެން މިރޭ ބޭއްވި ޖަލްސާގައި ރައީސް އިބްރާހިމް މުހައްމަދު ސޯލިހު ވާހަކަފުޅު ދައްކަވަނީ --

ރައީސް ވިދާޅުވީ މި މައްސަލައިގައި ދިވެހި ސަރުކާރުން އެއްފަހަރު ވާހަކަ ދައްކައިފައި އޮތީ އިނގިރޭސި ސަރުކާރާ އެކުގައި ކަމަށާއި އަނެއް ފަހަރު ވާހަކަ ދައްކައިފައި އޮތީ މޮރިޝަސް ސަރުކާރާ އެކުގައި ކަމަށެވެ. އަދި މި މައްސަލައިގައި މަސައްކަތްކުރަމުން އަންނަނީ ބައިނަލްއަގްވާމީ ޓްރައިބިއުނަލެއްގައި މޮރިޝަސް ސަރުކާރުން އިޓްލޮސްއަށް ހުށަހަޅާފައި އޮތް މައްސަލައިގައި ވެސް ރާއްޖޭގެ އެންމެ މަތީ މަސްލަހަތު ހިމާޔަތް ކުރަން ކަމަށް ރައީސް ވިދާޅުވި އެވެ.

ނަމަވެސް، މި ކަމުގައި ވެސް ވަކި މީހެއްގެ އަމިއްލަ ބޭނުމަކަަށް ނުވަތަ ސިޔާސީ މަގުސަދެެއް ހާސިލުކުރުމަށް އަދި ކަމުގެ ހަގީގަތް އެނގި ތިބެ ކަނޑައެޅިގެން ދޮގު ވާހަކަތަކެއް ފަތުރަމުން ދިއުމަކީ ވަރަށް ދެރަ މައްސަލައެެއް ކަމަށް ރައީސް ވިދާޅުވި އެވެ.

ރާއްޖެ އިސްލާމްވި ދުވަހާ ގުޅުވައިގެން ރައީސް ވިދާޅުވީ އިއްޔެ ވެސް ދައުލަތުން އެންމެ ބޮޑު އިސްކަމެއް ދޭނީ ދިވެހީންގެ ދީނީ އަގީދާ ރައްކާތެރި ކުރުމަަށާއި ދިވެހީންގެ ސިޔާދަތީ މިނިވަންކަން ދިފާއުކުރަން ކަމަށެެވެ. އަދި މި ދުވަސް ފާހަގަކުރާ އިރު، އިސްލާމްދީން ގެނެސްދިން ރިވެތި ސިފަތަކާއި ހަމަތަކުގެ މަތީގައި ސާބިތުވެ ތިބުމަށް ހާއްސަ ސަމާލުކަމެއް ދޭންޖެހޭ ކަމަށް ވެސް އެ މަނިކުފާނު ވިދާޅުވި އެވެ.

މިއަދުވެސް އެންމެ ބޮޑު އިސްކަމެއް ދެނީ ދިވެހީންގެ ދީނީ އަގީދާ ރައްކާތެރިކުރަން ކަމަށާއި އެންމެ އިސް ވާޖިބަކީ ދިވެހީންގެ ސިޔާދަތީ މިނިވަންކަން ދިފާއުކޮށް ދެމެހެއްޓުން ކަމަށް ރައީސް ވިދާޅުވި އެވެ.