ރައްޔިތުންގެ މަޖިލީހުން ފާސްކޮށް ރައީސް އޮފީހަށް މިހާރު ފޮނުވާފައިވާ ކުނި މެނޭޖުކުރުމާ ބެހޭ ބިލުގެ މާއްދާއަކާ ގުޅިގެން ކަންބޮޑުވުންތަކެއް ހުރުމާ އެކު މަޖިލީހުގެ އާ ދައުރު ފެށުމާ އެކު އެ ބިލު އިސްލާހުކުރަން ހުށަހަޅާނެ ކަމަށް ތިމާވެއްޓާ ބެހޭ މިނިސްޓްރީން މިއަދު ބުނެފި އެވެ.
މިދިޔަ މަހު މަޖިލީހުން ފާސްކުރި ކުނި މެނޭޖުކުރުމާ ބެހޭ ބިލުގެ މާއްދާއެއްގައިވާ ގޮތުން، ތިމާވެއްޓާ ބެހޭ މިނިސްޓްރީން ހުއްދަ ނަގައިގެން، ހަކަތަ އުފެއްދުމުގެ ބޭނުމަށް ރާއްޖެއަށް ކުނި އެތެރެކުރެވިދާނެ އެވެ. ބިލުގައި އެގޮތަށް އޮތުމުން ތިމާވެށީގެ ހިމާޔަތުގައި މަސައްކަތްކުރާ ބައެއް ޖަމިއްޔާތަކުން ދަނީ ކަންބޮޑުވުން ފާޅުކުރަމުންނެވެ. އެ މާއްދާ އިސްހާލުނުކޮށް، ބިލު ތަސްދީގުނުކުރަން ޖަމިއްޔާތަކުން ގޮވާލި އެވެ.
ތިމާވެއްޓާ ބެހޭ މިނިސްޓްރީން ބުނީ ރާއްޖެއަށް ކުނި އެތެރެކުރެވޭ ގޮތަށް، އެ ބިލުގައި އޮތް މާއްދާއަކީ އެ މިނިސްޓްރީން ވެސް ތާއިދުކުރާ ގޮތެއް ނޫން ކަމަށެވެ. އެއީ މިނިސްޓްރީން ހުށަހެޅި ބަދަލެއް ނޫނެވެ.
"ބިލު ތަސްދީގުކުރިޔަސް، މަޖިލިސް އަލުން ހުޅުވުމާ އެކު އެ މާއްދާ އިސްލާހުކުރަން އަޅުގަނޑުމެން ހުށަހަޅާނަން،" މިނިސްޓްރީގެ އޮފިޝަލް ވިދާޅުވި އެވެ.
"އެ ބިލުގައި އެބަހުރި ވަރަށް ރަނގަޅު ކަންކަން ވެސް. އެކަމަކު ކަންބޮޑުވުން ހުރި މާއްދާއަށް ބަދަލުތައް ވެސް ގެންނާނަން."
ޖަމިއްޔާތަކުގެ ކަންބޮޑުވުން
ޒީރޯ ވޭސްޓް މޯލްޑިވްސް އާއި ސޭވް މޯލްޑިވްސް އާއި ޓްރާންސްޕޭރެންސީ މޯލްޑިވްސް ވެސް ހިމެނޭހެން 17 ޖަމިއްޔާއެއް ގުޅިގެން އިއްޔެ ނެރުނު ނޫސްބަޔާނެއްގައި ބުނީ ކުނި މެނޭޖުކުރުމާ ބެހޭ ބިލު މަޖިލީހުގައި އޮތް ހަ މަސް ދުވަހުގެ ތެރޭގައި ތިމާވެށީގެ ހިމާޔަތުގައި މަސައްކަތްކުރާ އެއްވެސް ޖަމިއްޔާއެއްގެ ހިޔާލާއި މަޝްވަރާ މަޖިލީހުން ހޯދައިފައި ނުވާ ކަމަށެވެ.
އެ ބިލު ގާނޫނަކަށް ވުމުން ކުނި މެނޭޖުކުރުމަށް ރަނގަޅު ނިޒާމެއް އުފެއްދުމަށް ފަހިވެގެން ދިޔަސް، މަޖިލީހުގެ ކޮމިޓީ މަރުހަލާގެ އެންމެފަހު ވަގުތުގައި، ރާއްޖެއަށް ކުނި އެތެރެކުރެވޭ ގޮތަށް ގެނައި އިސްލާހާއެކު އެ ޖަމިއްޔާތަކުގެ ބޮޑެތި ކަންބޮޑުވުންތަކެއް އެބަހުރި ކަމަށް ބަޔާނުގައި ބުންޏެވެ.
ބަޔާނުގައި ބުނެފައިވާ ގޮތުގައި، މަޖިލީހަށް އެ ބިލު އެންމެ ފުރަތަމަ ހުށަހެޅިއިރު ރާއްޖެއަށް އެއްވެސް ބާވަތެއްގެ ކުނި އެތެރެނުކުރެވޭ ގޮތަށް މާއްދާއެއް ހިމަނާފައި އޮތެވެ. އެއީ ޒީރޯ ވޭސްޓް މޯލްޑިވްސް ޖަމިއްޔާގެ ލަފާގެ މަތިން އެ ބިލުގައި ހިމެނި މާއްދާއެއް ކަމަށް ވެސް އެ ޖަމިއްޔާއިން ބުނެ އެވެ.
ބަޔާން ނެރުނު ޖަމިއްޔާތަކުން ބުނާގޮތުގައި، ސަރުކާރުން މިހާރު ފަށާފައިވާ "ވޭސްޓް ޓު އެނާޖީ" ޕްރޮގްރާމަކީ ވެސް ޓެކްނިކަލް ގޮތުންނާއި މާލީ ގޮތުން ރާއްޖެއަށް ބުރަބޮޑު މަޝްރޫއެކެވެ. އެ މަޝްރޫއުގެ ސަބަބުން، ބޭރުގެ އިންސިނެރޭޓާ އޮޕަރޭޓަރުންނަށް ރާއްޖެއަށް ކުނި އެތެރެކުރުމުގެ ފުރުސަތު ފަހިވެގެންދާނެ އެވެ.
އެކަން އެގޮތަށް ނުހިނގާނެ ކަމުގެ ޔަގީންކަން ތިމާވެއްޓާ ބެހޭ މިނިސްޓްރީން ޖަމިއްޔާތަކަށް ދީފައި ވަނިކޮށް، ކުނި މެނޭޖުކުރުމާ ބެހޭ ބިލުގައި، ރާއްޖެއަށް ކުނި އެތެރެކުރުމުގެ ހުއްދަ ދެވޭ ގޮތަށް އޮތުމުން ވަރަށް ކަންބޮޑުވާ ކަމަށް އެ ބަޔާނުގައި ބުންޏެވެ.
ކުނި މެނޭޖުކުރުމާ ބެހޭ ބިލާ ގުޅޭ ކަންބޮޑުވުންތަކާ އެކު ޖަމިއްޔާތަކުން، ރައީސް އިބްރާހިމް މުހައްމަދު ސޯލިހަށް ގޮވާލީ އެ ބިލު އިސްލާހުނުކޮށް، ތަސްދީގުނުކުރުމަށެވެ. އަދި ޖަމިއްޔާތަކުން ފާޅުކުރި ކަންބޮޑުވުންތަކާ ގުޅޭގޮތުން އާންމުންގެ ހިޔާލު ހޯދުމަށާއި ބޭރުގެ ކޮންޓްރެކްޓަރުންނާއި ކުންފުނިތަކުން ކުނި އުކާލަން ގެންގުޅޭ ތަނަކަށް ރާއްޖެ ނުހެދުމަށް ހަދަން ޖެހޭ ހުރިހާ ގަވައިދުތަކެއް ހެދުމަށެވެ.