ރާއްޖޭގައި މަރުވާ މީހުންނާއި ދިވެހިންގެ ކަށުނަމާދު ގަޑިތައް އަންގައިދެމުން އަންނަ ފޭސްބުކް ޕޭޖާއި ވައިބާ ގުރޫޕު ހުއްޓާލުމަށް މާލެ ސިޓީ ކައުންސިލުން އަންގައިފި އެވެ.
ކަށުނަމާދު ޕޭޖު ހިންގާ އަހުމަދު މުނައްވަރު "މިހާރު" އަށް ބުނީ އަމިއްލަ މީހަކަށް އެގޮތަށް ޕޭޖެއް ނުހިންގޭނެ ކަމަށް މާލެ ސިޓީ ކައުންސިލުން ބޭއްވި ބައްދަލުވުމެއްގައި މިއަދު ބުނެފައިވާ ކަމަށާއި އެ ޕޭޖު ހުއްޓާލުމަށް އަންގާފައިވާ ކަމަށެވެ. އަދި އެއީ ސިޓީ ކައުންސިލުން ކުރަން ޖެހޭ ކަމެއް ކަމަށް ވެސް އެތަނުން ބުނެފައިވާ ކަމަށް އޭނާ ބުންޏެވެ.
ނަމަވެސް އެ ޕޭޖާއި ގްރޫޕު ހުއްޓާ ނުލާނެ ކަމަށް އޭނާ ބުންޏެވެ.
"އަޅުގަނޑު ގަބޫލެއް ނުކުރަން އެއީ ގާނޫނީގޮތުން ކައުންސިލަށް އެންގޭނެ ކަމެއް ކަމަކަށް. އަދި އަމިއްލަ ފަރުދަކަށް ނުކުރެވޭނެ ކަމެއް ކަމަށް ވެސް. އެހެންވީމަ އެފްބީ ޕޭޖު ވެސް ވައިބާ ގްރޫޕު ވެސް ހަމަ ކުރިއަށް ގެންދާނަން. ހުއްޓައެއް ނުލާނަން،" މުނައްވަރު ވިދާޅުވި އެވެ.
އެކަމަކު ސިޓީ ކައުންސިލުން ބުނީ އެއްވެސް މީހަކަށް ކައުންސިލުން އެކަމާ ގުޅޭ އެއްވެސް އެންގުމެއް އަންގާފައި ނުވާނެ ކަމަށެވެ.
ކަށުނަމާދު ޕޭޖު މެދުވެރިކޮށް ކަށުނަމާދުގެ މައުލޫމާތު ފޯރުކޮށްދޭތާ ހަ އަހަރަށްވުރެ ގިނަ ދުވަސް ވެފައިވާއިރު އެ ޕޭޖުގެ ފޮލޯވަރުންގެ އަދަދު 70،000 އަށް ވުރެ ގިނަ އެވެ.
