އެމްޑީޕީގެ ރިޔާސީ ޕްރައިމަރީގެ އިންތިހާބުން މިވަގުތު ދައްކާ ނަތީޖާ ގަބޫލު ނުކުރައްވާ ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ކުރިޔަށް އޮތް ރިޔާސީ އިންތިހާބުގައި އެމްޑީޕީން ނުކުންނާނެ ކެންްޑިޑޭޓަކު ހޮވަން މިއަދު ބޭއްވި އިންތިހާބުގައި މިހާތަނަށް 35،000 އަށް ވުރެ ގިނަ ވޯޓު ގުނި އިރު ގާތްގަނޑަކަށް 62 ޕަސަންޓު ލިބިވަޑައިގަންތީ ރައީސް އިބްރާހިމް މުހައްމަދު ސޯލިހަށެވެ.
އެކަމާ ގުޅިގެން އެމްޑީޕީގެ ބައެއް ގްރޫޕްތަކަށް ނަޝީދު ފޮނުއްވި މެސެޖެއްގައި ވިދާޅުވީ ގިނަ ފޮށިތަކުގެ ނަތީޖާ އިން ކުރީގައި އުޅުއްވަނީ އެމަނިކުފާނު ކަމަށެވެ. ބޮޑު ފަރަގެއް އެ ދައްކަނީ މަދު ބައެއް ތަންތަނުން އާދަޔާ ހިލާފަށް ގިނަ ވޯޓު ފޮށީގައި ހުރުމުން ކަމަށް ނަޝީދު ވިދާޅުވި އެވެ.
އެމަނިކުފާނުގެ ކެމްޕެއިނުގައި އިސްކޮށް އުޅުއްވާ ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވެސް މިރޭ ކުރެއްވި ޓުވީޓެއްގައި ވަނީ ނަތީޖާތައް ކައިރިން ބަލަމުން އަންނަ ކަަމަށާއި ގިނަ ވޯޓު ފޮށިތަކުން އަދިވެސް ކުރީގައި އުޅުއްވަނީ ނަޝީދު ކަމަށެވެ.
"ބޮޑު ފަރަގެއް އެ ދައްކަނީ މަދު ބައެއް ތަންތަނުގައި އާދަޔާ ހިލާފަށް ގިނަ ވޯޓު ފޮށީގައި ހުރީމަ،" އޭނާ ވިދާޅުވި އެވެ.
ހަސަން ވިދާޅުވި ގޮތުގައި ބައެއް ފޮށިތަކުގައި ވޯޓު ލުމުގެ ހައްގު ލިބިފައިވާ މީހުންގެ އަދަދަށް ވުރެ ވޯޓު ލީ މީހުންގެ އަދަދު ގިނަ އެވެ. އެ ނަތީޖާ ދައްކާ ޝީޓެއްގެ ފޮޓޯ ވެސް އޭނާ ވަނީ ޓުވީޓު ކޮށްފަ އެވެ.
ނަޝީދުގެ ކެމްޕެއިން ޓީމުން ނަތީޖާ ގަބޫލު ނުކުރި ނަަމަވެސް ރައީސް އިބްރާހިމް މުހައްމަދު ސޯލިހުގެ ފަރާތުން އަންނަނީ ކާމިޔާބީ ފާހަގަ ކުރަމުންނެވެ. އަދި ބައެއް މިނިސްޓަރުންނާއި މަޖިލިސް މެންބަރުން އަންނަނީ ރައިސަށް މަރުހަބާ ކިޔަމުންނެވެ.