އިދިކޮޅު ޕީޕީއެމް އާއި ޕީއެންސީ ކޯލިޝަންގެ ލީޑަޝިޕުން ކުރީގެ ރައީސް އަބްދުﷲ ޔާމީނަށް ހިޔާނާތްތެރި ނުވާނެ ކަމަށް އެމަނިކުފާނުގެ ކުރީގެ ރަނިންމޭޓް އަދި ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.
ޕީޕީއެމުން މިއަދު ފެށި "ހޯޕް ކޮންފަރެންސް" ގައި ވާހަކަ ދައްކަވަމުން ޝަހީމް ވިދާޅުވީ ޕީޕީއެމާއި ޕީއެންސީ ކޯލިޝަނުން ބޭނުންވަނީ ޔާމީން އަލުން ވެރިކަމަށް ގެންނަން ކަމަށާއި އެ ކޯލިޝަންގެ ކެންޑިޑޭޓަކީ ޔާމީން ކަމަށް ޝަހީމް ވިދާޅުވި އެވެ. އަދި އެ ކޯލިޝަނުން ހިޔާނާތްތެރިނުވާނެ ކަމަށް ޝަހީމް ވިދާޅުވި އެވެ.
"އެމަނިކުފާނަށް ވަފާތެރި ލީޑާޝިޕުން އެމަނިކުފާނަށް ހިޔާނާތްތެރިއެއް ނުވާނެ. ޕީޕީއެމް، ޕީއެންސީގެ އެންމެހާ ލޮބުވެތި މެމްބަރުން މަސައްކަތް ކުރަމުން މިދަނީ ރައީސް އަބްދުﷲ ޔާމީންގެ ޒައާމަތު އަލުން އަނބުރާ މި ގައުމަށް ގެނައުމަށް." ޝަހީމް ވިދާޅުވި އެވެ.
ޝަހީމް ވިދާޅުވީ ޔާމީން މިނިވަންކޮށް، މިއަހަރުގެ ރިޔާސީ އިންތިޚާބުގައި ވާދަކުރުމުގެ ފުރުސަތު އެމަނިކުފާނަށް ލިބެން ޖެހޭނެ ކަމަށެވެ. އަދި އެމަނިކުފާނު ޖަލުގައި ބާއްވައިގެން އެމަނިކުފާނަށް ފާޑު ކިޔުމަކީ އަހްލާގެއް ނެތް އަމަލެއް ކަމަށާއި އަދި އެމަނިކުފާނު މިނިވަންވާނެ ކަމުގެ އުއްމީދު އެބައޮތް ކަމަށް ޝަހީމް ވިދާޅުވި އެވެ.
"އަޅުގަނޑުމެން އެންމެންގެ އަޒުމަކަށް ވާންވީ ރައީސް އަބްދުﷲ ޔާމީން އަބްދުލްގައްޔޫމްގެ ޒަމާއަތުގައި ރިޔާސީ އިންތިޚާބު ކާމިޔާބުކޮށް، ޕީޕީއެމް، ޕީއެންސީގެ ވެރިކަން އަލުން މި ގައުމަށް އިއާދަކުރުން." ޝަހީމް ވިދާޅުވި އެވެ.
ޝަހީމް ވިދާޅުވީ ޔާމީން ވެރިކަން ކުރެއްވީ ރާއްޖޭގެ މިނިވަންކަމާއި ސިޔާދަތު ދަމަހައްޓައި، އިސްލާމީ އަދި ދިވެހި ސަގާފަތް ހިމާޔަތް ކުރުމުގެ އިތުރުން އިގްތިދާސީ ކުރިއެރުމާއި ހަމަޖެހުން ގެނައުމަށް ކަމަށެވެ. އަދި ދިވެހިން ތިބީ އަނެއްކާވެސް އެފަދަ ވެރިކަމަކަށް ބޭނުން ޖެހިފައި ކަމަށް އޭނާ ވިދާޅުވި އެވެ.
ހޯޕް ކޮންފަރެންސްގައި އެކި މައުލޫތަކަށް ބައްދަލުވުންތައް ބާއްވައި ރިޔާސީ އިންތިހާބަށް ތައްޔާރީތައް ފަށަން ވަނީ ނިންމައިފަ އެވެ.