ރައްޔިތުންގެ ހައްގު ހޯދުމަށް ކޯޓުތަކަށް ހުށަހަޅައިގެން ކާމިޔާބުވި އެއްވެސް މައްސަލައެއް ނެތް ނަމަވެސް، އެ ހައްގު ހޯދަން ކޯޓުތަކަށް ދިއުން ހުއްޓުމަކަށް ނާންނާނެ ކަމަށް އިދިކޮޅު އިއްތިހާދުގެ ހިޔަނި ޖުޑީޝަލް ރިފޯމް މިނިސްޓަރު ހިސާން ހުސެއިން ރޭ ވިދާޅުވެއްޖެ އެވެ.
އިދިކޮޅު އިއްތިހާދުން އައްޑޫގައި ބޭއްވި ޖަލްސާގައި ވާހަކަ ދައްކަވަމުން ހިސާން ވިދާޅުވީ ރައްޔިތުންގެ ހައްގު ހޯދަން މަސައްކަތް ކުރެވޭނެ ދާއިރާތައް ވަރަށް ބޮޑަށް ހަނިވެފައިވާ ކަމަށެވެ. ނަމަވެސް އެމްޑީޕީ އަކީ އަބަދުވެސް ހައްގު ބަސް ބުނާ ޕާޓީއެއް ކަމަށް އޭނާ ވިދާޅުވި އެވެ.
ހިސާން ވިދާޅުވި ގޮތުގައި ކުރީގެ ރައީސް މުހައްމަދު ނަޝީދުގެ ވެރިކަން ބަދަލުކުރި ފަހުން، ރައްޔިތުންގެ ހައްގު ހޯދަން ގިނަ އަދަދެއްގެ މައްސަލަތައް ކޯޓަށް ހުށަހެޅި އެވެ. އެކަމަކު މައްސަލަތައް ކާމިޔާބުނުވުމަކީ ދެ އަތް އުރާލައިގެން ތިބެންވީ ސަބަބެއް ނޫން ކަމަށް ހިސާން ވިދާޅުވި އެވެ.
"އަޅުގަނޑުމެން ހިތްވަރުކޮށްފައި މި ތިބީ އެ މަސައްކަތުގައި. ހައްގު ބަސް ބުނަން ބޭނުން. ރައްޔިތުންގެ ހައްގުތައް ހޯދަން ބޭނުން،" ހިސާން ވިދާޅުވި އެވެ.
ލޯކަލް ކައުންސިލްތަކުގެ އިންތިހާބަށް ކުރިމަތިލާފައިވާ ކެންޑިޑޭޓުންގެ ކެންޑިޑެސީ ބާތިލްކޮށް، އެ މީހުން އަލުން އިންތިހާބަށް ކުރިމަތިލާންޖެހޭ ގޮތަށް އިލެކްޝަންސް ކޮމިޝަން (އީސީ) އިން ނިންމި ނިންމުން ބާތިލް ކޮށްދިނުމަށް އެދި އެމްޑީޕީން ވަނީ ހައި ކޯޓަށް މައްސަލަ ހުށަހަޅައިފަ އެވެ. އަދި އެ މައްސަލަ ބަލައިގަތުމަށް ހައި ކޯޓުން ނިންމާފައިވާ ކަމަށް އެމްޑީޕީން ވަނީ ބުނެފަ އެވެ.
ހިސާން ވިދާޅުވީ މީގެ ކުރިން ކޯޓުތަކުން ކޮންމެ ގޮތަކަށް އަމަލުކޮށްފައި އޮތަސް، ހައްގު ހޯދަން ކުރާ މަސައްކަތް ނުހުއްޓުވޭނެ ކަމަށެވެ.
"އިލެކްޝަންސް ކޮމިޝަނާއި އެހެން މުއައްސަސާއަކުން ވިޔަސް، އަޅުގަނޑުމެން ވަރުބަލި ކުރަން ކުރާ މަސައްކަތް ކާމިޔާބު ނުވާނެ،" ނަޝީދުގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ ހިސާން ވިދާޅުވި އެވެ.
"ކޮންމެވެސް ދުވަހަކުން އަޅުގަނޑުމެންނަށް އިންސާފު ލިބޭނެ، އަޅުގަނޑުމެންގެ މަސައްކަތް ކާމިޔާބުވާނެ،"
އެމްޑީޕީން ހައި ކޯޓަށް ހުށަހެޅި މައްސަލާގައި އެދިފައިވަ ވަނީ އެ ކޯޓުން ވަކި ގޮތެއް ނިމެންދެން، އެމްޑީޕީގެ ކެންޑިޑޭޓުންގެ ކެންޑިޑެސީ ބާތިލްކުރަން ނިންމި ނިންމުމަށް އަމަލުކުރުން ފަސްކުރަން އީސީގެ މައްޗަށް އަމުރެއް ނެރެދިނުމަށެވެ.
ކައުންސިލްތަކުގެ އިންތިހާބު މި މަހުގެ 14 ގައި ބާއްވަން ކުރިން ނިންމައި، 900 އަށް ވުރެ ގިނަ ކެންޑިޑޭޓުންގެ ކެންޑިޑެސީ ގަބޫލުކުރުމަށް ފަހު، އީސީން ވަނީ އެ ނިންމުން ބާތިލްކޮށްފަ އެވެ. އެއީ، އިންތިހާބު ދެ މަހަށް ފަސްކުރަން ސިވިލް ކޯޓުން ކުރި ހުކުމާ ގުޅިގެންނެވެ.