އިންޑަސްޓްރިއަލް ހަބެއްގެ ގޮތުގައި ތަރައްގީ ކުރަން ނިންމާފައިވާ ކ. ތިލަފުށީގެ ދެވަނަ ފިޔަވަހީގެ ބިން ހިއްކުމުގެ އަމަލީ މަސައްކަތް ފަށައިފި އެވެ.
އެޗްޑީސީން މިއަދު ބުނީ ތިލަފުށީގެ ދެވަނަ ފިޔަވަހި ހިއްކުމުގެ މަސައްކަތް ވަރަށް ބާރަށް ކުރިއަށް ގެންދާ ކަމަށެވެ. މިވަގުތު ކުރަމުން އަންނަނީ ބިން ހިއްކުމަށް ވަށައިގެން ޖަހަން ޖެހޭ ބަންޑް ވޯލް ހެދުމުގެ މަސައްކަތް ކަމަށް ވެސް އެ ކުންފުނިން ބުންޏެވެ.
ތިލަފުށީގެ ފަޅު ހިއްކުމުގެ މަސައްކަތް ހަވާލުކޮށްފައި ވަނީ ސިނަމާލެ ބްރިޖުގެ މެއިންޓަނަންސްގެ މަސައްކަތްކުރާ ޗައިނާ ހާބާ އިންޖިނިއަރިން ކޮމްޕެނީ (ސީއެޗްއީސީ)އާ އެވެ. ސީއެޗްއީސީއާ އެކު އެކަމުގެ އެއްބަސްވުމުގައި ސޮއިކުރީ މިދިޔަ އަހަރު ޑިސެމްބަރު 15 ގަ އެވެ.
އެއީ ސިނަމާލެ ބްރިޖު ހެދި ޗައިނާ ކޮމިއުނިކޭޝަންސް ކޮންސްޓްރަކްޝަން ކޮމްޕެނީ (ސީސީސީސީ)ގެ ސަބްސިޑަރީ ކުންފުންޏެކެވެ. މާލެ އާއި ހުޅުމާލޭގެ ފެނުގެ ނިޒާމު ބްރިޖު މެދުވެރިކޮށް ގުޅާލުމުގެ މަސައްކަތް ވެސް ހަވާލުކުރީ އެ ކުންފުންޏާ އެވެ.
އެޗްޑީސީން ކުރިން ބުނެފައިވާ ގޮތުގައި، ތިލަފުށި ހިއްކުމުގެ މަސައްކަތް ކުރާނީ ފިޔަވަހިތަކަކަށް ބަހާލައިގެންނެވެ. އެންމެ ފުރަތަމަ ހިއްކަނީ 40 ހެކްޓަރުގެ ބިމެވެ. އެ މަސައްކަތް 8 މަސްދުވަހުގެ ތެރޭގައި ނިންމާލާނެ އެވެ.
ތިލަފުށިން ހިއްކާ 151 ހެކްޓަރުގެ ބިން ހިއްކައި އެއްކޮށް ނިމޭނީ ދެ އަހަރު ދުވަހުގެ ތެރޭގައި ކަމަށް އެޗްޑީސީން ބުނެ އެވެ.
އެޗްޑީސީން ވަނީ ތިލަފުށި ތަރައްގީ ކުރާނެ ގޮތުގެ މާސްޓަޕްލޭނެއް ވެސް ހަދައިފަ އެވެ. ތިލަފުށިން ހިއްކާ ބިން ބޭނުންކުރާނީ އެކި ކަހަލަ ސިނާއީ މަސައްކަތްތަކަށެވެ. އޭރުން މާލޭގައި އެ ބާވަތުގެ މަސައްކަތްތައް ކުރުން އެއްކޮށް ހުއްޓާލާނެ އެވެ.
ސަރުކާރުން ބުނެފައިވާ ގޮތުގައި، ތިލަފުށީ ތަރައްގީގެ ޕްލޭނަކީ މާލޭ ސަރަހައްދުގެ ތަރައްގީގެ ޕްލޭނާއި ތިލަމާލެ ބްރިޖު ޕްރޮޖެކްޓާ ވެސް އެކީ ކުރިއަށް ގެންދާ ބޮޑު މަޝްރޫއެކެވެ.
