ރާއްޖެ-މޮރިޝަސް މައްސަލާގައި ސަރުކާރުގެ ނިންމުން ބަދަލުކުރަން ގޮވާލާ ޕެޓިޝަނެއް!

ރާއްޖެ އާއި މޮރިޝަސްގެ ކަނޑުގެ ސަރަހައްދު ފުށުއަރާ މައްސަލާގައި ސަރުކާރުގެ ނިންމުން ބަދަލުކުރަން ގޮވާލާ ޕެޓިޝަނެއްގެ މަސައްކަތް މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ) ފައްޓަވައިފި އެވެ.

އެކަމަކު، އޭނާ ޕެޓިޝަންގެ މަސައްކަތް ފެއްޓެވިއިރު، ކަނޑުތަކާ ބެހޭ ބައިނަލްއަގްވާމީ ޓްރައިބިއުނަލަށް މޮރިޝަސްގެ ފަރާތުން ހުށަހެޅި ސަރަހައްދީ އިމުގެ މައްސަލަ މި މަހު 28 ގައި ނިންމަން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އިން ވަނީ ހަމަޖައްސައިފި އެވެ.

އެ މައްސަލާގައި ބޮންޑޭ ސޮއި ހޯދަން ފަށާފައިވާ ޕެޓިޝަންގައި ބުނާ ގޮތުން ރާއްޖޭގެ ކަނޑުގެ 150 މޭލު ހިމެނޭ ސަރަހައްދާއި ކަނޑާއި ޖައްވާއި ކަނޑުގެ އަޑީގައިވާ ވަސީލަތްތަކުން ދިވެހިން މަހުރޫމްވުމުގެ ބިރު އެބަ އޮތެވެ.

ރާއްޖޭގެ މަސްވެރިކަމުގެ ސިނާއަތް ހުއްޓި މަސްވެރިން ބަނޑަށް ޖެހޭ ހާލަތަށް ގައުމު ހިނގައިދާނެ ކަމަށް ވެސް އެ ޕެޓިޝަންގައި ބުނެފައިވެ އެވެ.

އެހެންކަމުން ރައްޔިތުންނާއި ރައްޔިތުންގެ މަޖިލީހަށް "ސިއްރުން" ރައީސް އިބްރާހިމް މުހައްމަދު ސޯލިހު މޮރިޝަސްގެ ބޮޑު ވަޒީރަށް ފޮނުވާފައިވާ ސިޓީ އަނބުރާ ގެނައުމަށް އެ ޕެޓިޝަންގައި ވަނީ ގޮވާލައިފަ އެވެ. އަދި އެކަމުގައި 500 މިލިއަން ޑޮލަރުގެ ސިއްރު ޑީލެއް ހިމެނޭ ކަމަށް ވެސް އެ ޕެޓިޝަންގައި ވަނީ ތުހުމަތު ކޮށްފަ އެވެ. އަދި އެ މައްސަލަ މިނިވަން ފަރާތަކުން ތަހުގީގު ކުރުމަށް ވެސް ވަނީ ގޮވާލައިފަ އެވެ. އެކަމަކު އިޓްލޮސްގައި 28 ގައި ނިންމާ ނިންމުމާ ރައީސް ފޮނުއްވި ކަމަށް ބުނާ ސިޓީއާ އެއީ މުޅިން ދެކަމެކެވެ.

މިހާތަނަށް އެ ޕެޓިޝަންގައި ސޮއި ކުރި ފަރާތްތަކުގެ ތެރޭގައި މަޖިލީހުގެ ކެންދޫ ދާއިރާގެ މެންބަރު އަލީ ހުސެއިން ވެސް ހިމެނެ އެވެ.

އެކަމާ ގުޅޭ ގޮތުން ބޮންޑޭ އާއި މިހާރު ރިޔާސީ އިންތިހާބުގައި ވާދަ ކުރައްވާނެ ކަމަށް އިއުލާން ކުރައްވާފައިވާ ކުރީގެ އެޓާނީ ޖެނަރަލް ޑރ. މުހައްމަދު މުނައްވަރު ވަނީ ބައްދަލު ކުރައްވައި އެ މައްސަލާގައި މަޝްވަރާ ކުރައްވައިފަ އެވެ.

ޗާގޮސް ޑީކޮލޮނައިޒޭޝަންގެ މައްސަލައާ ގުޅިގެން 2019 ވަނަ އަހަރު އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން ނެރުނު އެޑްވައިޒަރީ އޮޕީނިއަންގައި ބުނެފައި ވަނީ ޗާގޮސްއަކީ މޮރިޝަސްގެ ތަނެެއްކަމާއި، އިނގިރޭސިވިލާތުން އެތަން މޮރިޝަސްއާ ހަވާލުކުރަންޖެހޭ ކަމަށެވެ.

އެކަމުގެ ސަބަބުން ރާއްޖޭގެ ސަރަހައްދީ މައްސަލައެއް ދިމާވެދާނެތީ ރާއްޖެއިން ވޯޓު ދިނީ އެކަމާ ދެކޮޅަށެވެ.

ނަމަވެސް މިދިޔަ އަހަރު ރާއްޖޭގެ ސްޓޭންޑް ބަދަލުކޮށް، މޮރިޝަސްއާ އެއްކޮޅަށް ވޯޓު ދޭން ނިންމުމުން ރާއްޖޭގެ ކަނޑުގެ ސަރަހައްދުގެ ބައެއް ދޫކޮށްލަން ސަރުކާރުން އެއްބަސްވީ ކަމަށް ބުނެ ގިނަ ފާޑު ކިޔުންތަކެއް އަމާޒުވި އެވެ.

އެކަމަކު ސަރުކާރުން ބުނެފައިވަނީ ކަނޑުގެ ބައެއް އެކަމުގެ ސަބަބުން ނުގެއްލޭނެ ކަމަށެވެ.