އަންނަ ސެޕްޓެމްބަރު މަހު ބާއްވާ ރިޔާސީ އިންތިހާބުގައި 282،755 މީހުންނަށް ވޯޓު ލުމުގެ ހައްގު ލިބޭނެ ކަމަށް އިލެކްޝަންސް ކޮމިޝަނުން މިއަދު ބުނެފި އެވެ.
އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބު "މިހާރު" އަށް ވިދާޅުވީ ސެޕްޓެމްބަރު ނުވައެއްގައި އޮންނަ އިންތިހާބުގައި 144،408 ފިރިހެނުންނާއި 138،347 އަންހެނުންނަށް ވޯޓުލެވޭނެ ކަމަށެވެ.
ވޯޓުލުމުގެ ހައްގު ލިބޭ ވަގުތީ ލިސްޓު މިއަދު އާއްމުކޮށްފައިވާ އިރު، ލިސްޓުގައި މައްސަލައެއް އުޅޭނަމަ ޝަކުވާ ހުށަހަޅައި އެކަން ދުރާލައި އިސްލާހުކުރަން އީސީން އެދެ އެވެ.
"އަސްލު އިއުލާންކުރަން ޖެހޭ މުއްދަތަށް ވުރެ މަހެއް ކުރިން ލިސްޓު މި އިއުލާން ކުރީ. ހާއްސަކޮށް ސިޔާސީ ޕާޓީތަކުގައި ތިބި މީހުން. އެ ޕާޓީތަކުގައި ތިބި މީހުންނަށް މައްސަލައެއް އުޅޭނަމަ ފާހަގަކޮށް ދުރާލާ އެކަން ރަނގަޅު ކުރުމަށް ފުރުސަތު ދިނުމަށް،" އޭނާ ވިދާޅުވި އެވެ.
މިއީ 2018ގެ ރިޔާސީ އިންތިހާބުގައި ވޯޓު ލިބުމުގެ ހައްގު ލިބިފައިވާ މީހުންނަށް ވުރެ، 19،755 މީހުންގެ އިތުރުވުމެކެވެ. އެ އިންތިހާބުގައި ވޯޓުލުމުގެ ހައްގު ލިބުނީ 263،000 މީހުންނަށެވެ.
މި އަހަރުގެ ރޔާސީ އިންތހާބުގެ ދެވަނަ ބުރެއް ބާއްވަން ޖެހިއްޖެ ނަމަ ބާއްވާނީ ސެޕްޓެމްބަރު 30ގަ އެވެ.