މީގެ ކުރިން ވެސް ޓަގްތަކާއި ބާޖްތައް ފަރަށް އެރުމުގެ ތާރީހެއް އޮތް އެމްއެމް އެކްސްޕޯޓުގެ ޓަގަކާއި ބާޖެއް ހއ. ދިއްދޫ ފަރަށް އަރައިފި އެވެ.
ދިއްދު އަށް ބޮޑުހިލަ ހިފައިގެން އެމްއެމް އެކްސްޕޯޓުގެ "މުތާ ޕްރިންސަސް" ޓަގް ބޯޓާއި ބާޖް އެ ރަށު ފަރަށް އުރުނީ މިދިޔަ ހޯމަ ދުވަހު އެވެ.
އެ ރަށުން ވާހަކަ ދެއްކި މީހަކު ބުނީ، ބޮޑުހިލަ ބަރުކޮށްފައިވާ ބާޖް މިހާރު ފުން ވެފައިވާ ކަމަށެވެ. އެކަމަކު ޓަގު އަދިވެސް އޮތީ އެ ރަށު ފަރުމަތީގައި ކަމަށް އޭނާ ބުންޏެވެ. ޓަގް އޮތީ ފަރުމަތީގައި އަރިއަޅާލައިފަ އެވެ.
އެ ރަށު ކައުންސިލް މެންބަރަކު "މިހާރު" އަށް ވިދާޅުވީ ޓަގާއި ބާޖް ފަރަށް އެރި ދުވަހު އެންވަޔަރްމެންޓް މިނިސްޓްރީ އާއި އީޕީއޭ އަށް އަންގާފައިވާ ކަމަށެވެ.
ބޯޓް ފަރަށް އެރިތާ ހަތަރު ދުވަސްވީ އިރު ވެސް ފުން ކުރަން މަސައްކަތް ކޮށްފައެއް ނުވެ އެވެ. ކައުންސިލްގެ މެންބަރު ވިދާޅުވީ ޓަގު ފުން ކުރެވޭނީ އިތުރު ޓަގެއް ގޮސް ވާ ޖަހައިގެން ކަމަށެވެ. އެކަމަކު މިހާތަނަށް އެފަދަ ބޯޓެއް ގެންނަން މަސައްކަތް ކޮށްފައެއް ނުވެ އެވެ.
އެމްއެމް އެކްސްޕޯޓްގެ "މުތާ ރޯޔަލް" ނަމަކަށް ކިޔާ ޓަގް ބޯޓާއި "މުތާ ގްރޭސް" ކިޔާ ބާޖެއް ކ. ފުށިދިއްގަރު ފަރަށް 2015 ގައި އެރި އެވެ. މައްސަލައިގައި 110 މިލިއަން ރުފިޔާ ދައްކަން އެންގިތާ ހަތަރު އަހަރުވީ އިރު ވެސް ފައިސާ ދައްކާފައެއް ނުވެ އެވެ. އެ ފަރުގެ 4،370 އަކަމީޓަރުގެ ސަރަހައްދަކަށް ގެއްލުންވި ކަމަށް އޭރު އީޕީއޭއިން ބުންޏެވެ.
އެ ކުންފުނީގެ ބޯޓެއް 2014 ވަނަ އަހަރުގެ ތެރޭގައި ތިލަފުށީ ފަރަށް ވެސް އެރި އެވެ. އެ މައްސަލަ ބެލުމަށްފަހު އެ ބޯޓް 22 މިލިއަން ރުފިޔާ އިން ޖޫރިމަނާކުރި ނަމަވެސް އެމްއެމް އެކްސްޕޯޓުގެ އެދުމުގެ މަތިން ފަހުން ވަނީ ޖޫރިމަނާ 2.8 މިލިއަން ރުފިޔާ އަށް ކުޑަކޮށްދިނެވެ.