ރައްޔިތުންގެ މަޖިލިހުގެ ނައިބު ރައީސް އީވާ އަބްދުﷲ މަގާމުން ވަކިކުރަން، އެމްޑީޕީގެ 50 މެމްބަރެއްގެ ސޮޔާ އެކު ރައްޔިތުންގެ މަޖިލިހަށް މިއަދު ހުށަހަޅައިފި އެވެ.
މަޖިލީހުގެ ނައިބު ރައީސްގެ މަގާމުން އީވާ ވަކި ކުރަން އެމްޑީޕީން ނިންމީ އެ ޕާޓީން ވަކިވުމަށް ފަހު "ދަ ޑިމޮކްރެޓްސް" ގެ ނަމުގައި އާ ސިޔާސީ ޕާޓީއެއް އުފައްދަން މަސައްކަތް ފެއްޓެވުމާ ގުޅިގެންނެވެ.
ރައްޔިތުންގެ މަޖިލިހުގެ ގަވާއިދުގައިވާ ގޮތުން މަޖިލިހުގެ ރައީސާއި ނައިބު ރައީސް މަގާމުން ވަކި ކުރެވޭނީ ޖަލްސާ އަށް ހާޒިރުވެ، ވޯޓުގައި ބައިވެރިވާ މެމްބަރުންގެ އަޣުލަބިއްޔަތުން ފާސްކުރުމުންނެވެ. މަޖިލީހުގެ މެމްބަރުންގެ އަދަދަކީ 87 ކަމަށް ވާއިރު، ހުރިހާ މެމްބަރުން ހާޒިރުވެ ވޯޓުގައި ބައިވެރިވެއްޖެ ނަމަ އީވާ މަގާމުން ދުރުކުރަން 44 ވޯޓު ބޭނުންވާނެ އެވެ.
ރައްޔިތުންގެ މަޖިލިހުގައި މިހާރު އެމްޑީޕީގެ މެމްބަރުންގެ އަދަދަކީ އިއްޔެ މަޖިލިހުގައި އިއުލާން ކުރި ގޮތުން ނަމަ 55 އެވެ.
އިތުބާރު ނެތް މައްސަލަ އާ ގުޅިގެން އީވާ މީގެ ކުރިން ވިދާޅުވެފައި ވަނީ އޭނާ މަޖިލިހުގެ ނައިބު ރައީސްގެ މަގާމް ދިފާއު ކުރެއްވުމަށްޓަކައި އެމްޑީޕީގައި ދެމިހުންނެވުމުގެ ޝައުގުވެރިކަމެއް ނެތް ކަމަށެވެ. އެ ޕާޓީގެ ތެރޭގައި މީގެ ކުރިން އޮތް އަސާސްތަކާއި އުސޫލުތައް މިހާރު ފުނޑާލާފައިވާ ކަމަށް އޭނާ ވިދާޅުވި އެވެ.
އެމްޑީޕީން އީވާގެ އިތުބާރު ނެތް މައްސަލަ ހުށަހެޅިޔަސް މަގާމުން އަމިއްލަ އަށް އިސްތިއުފާ ދެއްވުމުގެ ވިސްނުމެއް ނެތް ކަމަށް ވެސް އީވާ ވިދާޅުވި އެވެ.
ސަރުކާރާ އިދިކޮޅު ހަރަކާތްތައް ގުޅިގެން ވަނީ ބަންޑާރަ ނައިބު އިބްރާހިމް ރިފްއަތާއި ފޮރިން މިނިސްޓަރު އަބްދުﷲ ޝާހިދުގެ އިތުބާރު ނެތްކަމުގެ މައްސަލައެއް ވެސް މަޖިލިހަށް ވައްދައިފަ އެވެ. އެއީ ޗާގޮސްގެ މައްސަައާ ގުޅުވައިގެންނެވެ. އެ ދެ ބޭފުޅުން މަގާމުން ވަކިކުރަން ހުށަހެޅީ 13 މެމްބަރެއްގެ ސޮޔާ އެކު އެވެ.
