އެންމެ ބޮޑު އިދިކޮޅު ޕާޓީ ޕީޕީއެމްގެ ކުރިމަގެއް މި ވަގުތު ނެތް ކަމަށް ވިދާޅުވެ، އެ ޕާޓީގެ ސެނެޓް މެމްބަރު އަހުމަދު ގާލިބް ޕީޕީއެމުން މިއަދު ވަކިވެއްޖެ އެވެ.
ގާލިބް ޕީޕީއެމުން ވަކިވެވަޑައިގަތީ މި އަހަރުގެ ރިޔާސީ އިންތިހާބަށް ކުރިމަތިލާން އަންނަ މަހުގެ 23 ގައި އިލެކްޝަންސް ކޮމިޝަނުން ހުޅުވާލަން ނިންމާފައިވާއިރު، އެ އިންތިހާބުގެ ތައްޔާރީތަކާ މެދު ވެސް އުންމީދެއް ނެތް ކަމަށް ވިދާޅުވެ އެވެ.
އޭނާ "މިހާރު" އަށް ވިދާޅުވީ، ސެޕްޓެމްބަރު 9 ގައި ބާއްވާ ރިޔާސީ އިންތިހާބާ މެދު ވެސް މާ ބޮޑު އުންމީދެއް ނެތުމަކީ ޕީޕީއެމް ދޫކުރައްވަން ޖެހިވަޑައިގެންނެވި ސަބަބެއް ކަމަށެވެ.
"މި ވަގުތު ޕާޓީއާ އެކު ކުރިއަށް ދިއުމަށް އެކަށީގެންވާ ހާލަތެއް/ މާހަުލެއް އަޅުގަނޑަށް ނެތަތީވެ، ޕްރޮގްރެސިވް ކޮންގްރެސް ކޯލިޝަން ކެލާ ދާއިރާގެ ރައީސްކަމުންނާއި ޕާޓީގެ ސެނެޓުން މިއަދުން ފެށިގެން އިސްތިއުފާ ދިނުމަށް ފަހު ޕާޓީން ވަކިވުމަށް އެދި ހުށަހަޅައިފީމެވެ،" ގާލިބް ކުރެއްވި ޓުވީޓެއްގައި ވިދާޅުވި އެވެ.
އެ އަށް ވުރެ އިތުރަށް އޭނާ ވާހަކައެއް ނުދެއްކެވި އެވެ. ހަމައެކަނި ވިދާޅުވީ "އަމިއްލަ ސަބަބުތަކެއް" ކުރިމަތިވީ ކަމަށެވެ.
ގާލިބްގެ ކުއްލި ފިޔަވަޅު އައި އިރު، ރިޔާސީ އިންތިހާބުގައި ޕީޕީއެމްގެ ކެންޑިޑޭޓް ކުރީގެ ރައީސް އަބްދުﷲ ޔާމީނަށް ކުރިމަތި ނުލެވޭ ހާލަތެއްގައި އެހެން ކެންޑިޑޭޓަކު ނުދައްކާ މައްސަލާގައި ވަނީ ސެނެޓްގެ އެކި މެމްބަރުންގެ މެދުގައި ހިޔާލު ތަފާތުވުންތަކެއް އުފެދިފަ އެވެ. ޕީޕީއެމްގެ އެކި ގުރޫޕްތަކުގައި އެ ހިޔާލު ތަފާތުވުންތަކާ މެދު ޒުވާބުތައް ކޮށްފައި ވެ އެވެ. އަދި ޔާމީންގެ ކެންޑިޑެސީއާ މެދު މާލޭ ސިޓީ ކައުންސިލްގެ މެމްބަރު އާދަމް ރަމީޒު ސުވާލު އުފެއްދެވި ކަމަށް ބުނެ، އޭނާ ޕީޕީއެމްގެ ސުލޫކީ ކޮމިޓީ އަށް ހާޒިރުކޮށް، ބަޔާން ވެސް ނެގި އެވެ. ފަހުން ޕީޕީއެމްގެ ލީޑަޝިޕުން ބުނެފައިވާ ގޮތުގައި ރަމީޒާ ސުވާލު ކުރީ، މަނީ ލޯންޑަރިންގެ ކުށް ސާބިތުވެގެން ނުވަ އަހަރުގެ ޖަލުގެ ހުކުމެއް ތަންފީޒު ކުރައްވާ ޔާމީންގެ އެންހެވުމަކަށް ކަމަށެވެ.
ރަމީޒް ފަހުން ވަނީ އެ މައްސަލާގައި ޕީޕީއެމުން ވެސް ވަކިވެވަޑައިގެންފަ އެވެ.
އޭގެ ފަހުން މިދިޔަ ހަފުތާގައި ޕީޕީއެމްގެ ސެނެޓަރުންގެ ވަޓްސްއެޕް ގުރޫޕްގައި ވެސް ރިޔާސީ ޓިކެޓާ މެދު ހޫނު ޒުވާބެއް ކުރި އެވެ. އަދި ޔާމީން މިނިވަންކޮށްފާނެ ކަމާ މެދު ސުވާލު އުފައްދަވައި، އެ ޕާޓީގެ ކުރީގެ ސެކްރެޓަރީ ޖެނެރަލް މުހައްމަދު ޝަކީލް ކުރެއްވި ޓުވީޓެއްގައި "ފިއްތުންތަކާ" ހެދި ޑިލީޓް ކުރެއްވި އެެވެ.