ރައްޔިތުންގެ މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ ގެ އިތުބާރުނެތް ކަމުގެ މައްސަލަ މަޖިލީހުގެ މާދަމާގެ ޖަލްސާ އަށް އެޖެންޑާ ކުރާނެ ކަމަށް މަޖިލީހުގެ އިދާރާއިން މެމްބަރުންނަށް މިއަދު އަންގައިފި އެވެ.
އީވާ މަގާމުން ވަކި ކުރުމަށް މަޖިލީހުގެ 50 މެންބަރުން ސޮއި ކުރައްވައި ހުށަހެޅި އެ ގަރާރަށް ދީފައިވާ 14 ދުވަހުގެ ނޯޓިސް މިއަދަށް ވަނީ ހަމަވެފަ އެވެ.
އެކަމަކު އެމްޑީޕީގައި ތިއްބެވި 13 މެންބަރަކު އެ ޕާޓީން ވަކިވުމާ ގުޅިގެން މަޖިލީހުގެ ދާއިމީ ކޮމިޓީތައް އެކުލަވާލުމުގައި އެއްބަސްވުމަކަށް ނާދެވި، ކޮމިޓީތަކުގެ މަސައްކަތްތައް ހުއްޓިފައި އޮންނަތާ ތިން ހަފްތާއެއްހާ ދުވަސް ވަނީ ވެފަ އެވެ.
އެއާ އެކު އީވާ ވަކިކުރަން އެމްޑީޕީން ހުށަހަޅާފައިވާ މައްސަލަ ވެސް އޮތީ ހުއްޓިފަ އެވެ. އެއީ އީވާގެ އިތުބާރު ނެތް މައްސަލަ ކުރިޔަށް ގެންދެވޭނީ މަޖިލީހުގެ އާންމު ކޮމިޓީން އެކަމަށްޓަކައި ވަގުތު ކަނޑައެޅުމުންނެވެ. އެކަން މަޖިލީހުގެ އަމީން އާއްމު ފާތިމަތު ނިއުޝާ ވެސް އެމްޑީޕީގެ ޕާލިމަންޓަރީ ގުރޫޕުގެ ލީޑަރަށް ފޮނުއްވި ސިޓީގައި ވެސް ވަނީ ވިދާޅުވެފަ އެވެ.
މަޖިލީހުގެ ގަވާއިދާ އެއްގޮތަށް އީވާގެ މައްސަލަ އެޖެންޑާކޮށްދޭން އެމްޑީޕީގެ ޕާލިމަންޓަރީ ގުރޫޕުން ތަކުރާރުކޮށް އެދެމުންދަނިކޮށް، މިއަދުގެ ޖަލްސާއަށް އެ މައްސަލަ އެޖެންޑާކޮށްފައެއް ނުވެ އެވެ.
އެ އާއެކު، އެ މައްސަލަ ކުރިއަށް ނުގެންގޮސް މަޖިލީހުގެ އިތުރު މަސައްކަތެއް ނުކުރެވޭނެ ކަމެއް ބުނެ، އެމްޑީޕީ މެމްބަރުން ވަނީ އަޑުގަދަކޮށް މަޖިލީހުގެ މިއަދުގެ ޖަލްސާ ހުއްޓުވައިފަ އެވެ.
އެކަމާ ގުޅިގެން، މަޖިލީހުގެ އަމީން އާއްމު ފާތިމަތު ނިއުޝާ ސޮއި ކުރައްވައި، މަޖިލީހުގެ މެމްބަރުންނަށް ފޮނުއްވި ސިޓީއެއްގައި ވިދާޅުވީ މަޖިލީހުގެ ގަވާއިދާ އެއްގޮތަށް ބަހުސްގެ ވަގުތު އާންމު ކޮމިޓީން ކަނޑައަޅާފައި ނުވި ނަމަވެސް، އީވާގެ މައްސަލައިގެ ދިން 14 ދުވަހުގެ ނޯޓިސް ހަމަވެފައިވާތީ، އެ މައްސަލަ މާދަމާގެ ޖަލްސާ އަށް އެޖެންޑާ ކުރެވޭނެ ކަމަށެވެ.
އަމީން އާއްމު ކުރިން ހުންނެވި ސްޓޭންޑު ބަދަލުކުރެއްވި ނަމަވެސް، ވަގުތު ކަނޑަނާޅާތީ އީވާގެ މައްސަލަ މާދަމާ ކުރިއަށް ގެންދާނެ ގޮތެއް ނޭނގެ އެވެ. ހާއްސަކޮށް މަޖިލީހުގެ ރައީސް މުހައްމަދު ނަޝީދުގެ އިތުބާރުނެތް ކަމުގެ މައްސަލައެއް ވެސް ހުށަހަޅާފައިވާތީ، ރިޔާސަތު ބަލަހައްޓަވަން އުޒުރުވެރިވެވަޑައިގަންނަވާ ކަމަށް އެމަނިކުފާނު އަންގަވާފައިވާތީ އެވެ. ސަބަބަކީ، މަޖިލީހުގެ ނައިބު ރައީސްގެ އިތުބާރުނެތް ކަމުގެ މައްސަލައެއް ކުރިއަށް ގެންދާ ޖަލްސާއެއްގެ ރިޔާސަތުގައި އިންނަވާނީ މަޖިލީހުގެ ރައީސް ކަމަށް މަޖިލީހުގެ ގަވާއިދުގައި ބަޔާންކުރާތީ އެވެ.