ކްރިމިނަލް ކޯޓުން ޔާމީންގެ ޝަރީއަތް ފުލުފުލުގައި ތާވަލްކޮށްފި

ރ. ފުއްގިރި ކުއްޔަށް ދިނުމުގައި ކޮރަޕްޝަން ހިންގާފައިވާ ކަމަށް ތުހުމަތުކޮށް، ކުރީގެ ރައީސް އަބްދުﷲ ޔާމީންގެ މައްޗަށް ދައުވާކޮށް މިހާރު ކުރިމިނަލް ކޯޓުގައި ކުރިއަށްދާ ޝަރީއަތުގެ އަޑުއެހުންތައް އީދު ބަންދަށް ފަހު ހުޅުވުމާ އެކު، ޖުލައި މަހުގެ މެދަކާ ހިސާބަށް ކޮންމެ ދެ ދުވަހުން އެއް ދުވަހަކަށް ތާވަލްކޮށްފި އެވެ.

ވ. އާރަށް މައްސަލާގައި ރިޝްވަތު ގަބޫލުކުރުމާއި މަނީ ލޯންޑަރިންގެ ދައުވާ ސާބިތުވެ، 11 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވާ ޔާމީންގެ މައްޗަށް ފުއްގިރި މައްސަލާގައި ދައުވާކުރަނީ އެ ރަށް ކުއްޔަށް ދޫކުރުމުން ރިޝްވަތުގެ ގޮތުގައި 1.1 މިލިއަން ޑޮލަރު ހޯދައި، އެ ފައިސާ ލޯންޑާކުރި ކަމަށް ބުނެ އެވެ. މި މައްސަލާގައި ސަން ކޮންސްޓްރަކްޝަން ކުންފުންޏާއި ސަން އިންވެސްޓްމަންޓް ކުންފުނީގެ އިތުރުން މއ. ކުރިކީލަހިޔާ އަހުމަދު ކްރިކް ރިޒާގެ މައްޗަށް ވެސް ދައުވާ ކުރެ އެވެ.

އެ ޝަރީއަތުގައި ހެކިބަސް ނެގުމުގެ މަރުހަލާ މިހާރު ކުރިއަށްދާއިރު، އީދު ބަންދަށްފަހު ކުރިމިނަލް ކޯޓުން ވަނީ ގިނަ އަޑުއެހުންތަކެއް ތާވަލުކޮށްފަ އެވެ. އެގޮތުން، އެ ކޯޓުގެ މީޑިއާ އޮފިޝަލް މިއަދު ވިދާޅުވި ގޮތުގައި އަންނަ މަހުގެ ދެވަނަ ދުވަހުގެ އަޑުއެހުން މިހާރު ތާވަލުކޮށް ޗިޓް ވަނީ ފޮނުވައިފަ އެވެ.

ޕްރޮސިކިއުޓާ ޖެނަރަލް އޮފީހުގެ މީޑިއާ އޮފިޝަލް އަހުމަދު ޝަފީއު "މިހާރު" އަށް ވިދާޅުވި ގޮތުގައި، ކުރިމިނަލް ކޯޓުން ވަނީ އަންނަ މަހުގެ 2، 4، 6، 9، 11 އަދި 13 ވަނަ ދުވަހަށް ޔާމީންގެ ޝަރީއަތުގެ އަޑުއެހުންތައް ތާވަލުކޮށް އެ އޮފީހަށް އަންގައިފަ އެވެ. މިކަން ޔާމީންގެ ގާނޫނީ ވަކީލުންގެ ޓީމުން ވެސް ކަށަވަރުކޮށްދެ އެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.

ފުއްގިރި މައްސަލާގައި ކްރިމިނަލް ކޯޓުގައި ކުރީގެ ނައިބު ރައީސް އަހްމަދު އަދީބު ހެކިބަސް ދެއްވަނީ.

ހެކިބަސް ނެގުމުގެ މަރުހަލާއަށް ފަހު ދެން އޮންނާނީ ހެކިބަހާ ގުޅޭ ގޮތުން ވާހަކަ ދެއްކުމާއި ހުލާސާ ބަޔާން އިއްވުމެވެ. އެއަށްފަހު މައްސަލާގެ ހުކުމާ ހަމައަށް ދާނެ އެވެ. ކްރިމިނަލް ކޯޓުން ޝަރީއަތުގެ އަޑުއެހުންތައް ފުލުފުލުގައި ތާވަލުކުރިއިރު އެހެން ރަށެއްގެ މައްސަލާގައި ޔާމީންގެ މައްޗަށް ކޮށްފައިވާ ރިޝްވަތާއި މަނީ ލޯންޑަރިންގެ ކުށުގައި 11 އަހަރަށް ޖަލަށް ލުމަށް ކޮށްފައިވާ ހުކުމްތަކުގެ އިސްތިއުނާފް ހައި ކޯޓުގައި ވެސް ދަނީ ކުރިއަށެވެ. އެ މައްސަލައިގެ އަޑުއެހުމެއް އީދު ބަންދަށް ފަހު، އަންނަ މަހުގެ ތިންވަނަ ދުވަހަށް ވަނީ ތާވަލުކޮށްފަ އެވެ.

ޔާމީންގެ އިސްތިއުނާފީ ޝަރީއަތް އަވަހަށް ނިމުމަށް އެ މަނިކުފާނު ވެސް ކޯޓުގައި އެދިވަޑައިގެންފައިވާއިރު، އެއީ އަންނަ ރިޔާސީ އިންތިހާބުގައި ޔާމީނަށް ބައިވެރިވެވަޑައިގަތުމާ މެދު ގޮތެއް ނިމުމުގައި މުހިންމު ނިންމުމެކެވެ. އެހެންވެ، އިންތިހާބަށް ކުރިމަތިލުމުގެ ފުރުސަތު އޮއްވައި އިސްތިއުނާފީ އަޑުއެހުންތައް ނިންމުމަށް އިދިކޮޅު ޕީޕީއެމްއިން ވެސް ދަނީ ގޮވަމުންނެވެ.

ނަމަވެސް، ކުރިމިނަލް ކޯޓުން އަވަސް އަވަހަށް އަޑުއެހުންތައް ތާވަލުކުރުމާ އެކު އިދިކޮޅުގެ ފާޑުކިޔުން ކުރިމިނަލް ކޯޓަށާއި ސަރުކާރަށް މިއަދު ވަނީ އަމާޒުވެފަ އެވެ. މާވަށު ދާއިރާގެ މެންބަރު މުހައްމަދު ސައީދު ރައްޔިތުންގެ މަޖިލީހުގައި މިއަދު ވިދާޅުވީ ކުރިމިނަލް ކޯޓުން "ފަޓާސްބަރިއެއްހެން" އަޑުއެހުންތައް ތާވަލުކޮށްފައިވަނީ ޔާމީނަށް އަނިޔާދޭން ކަމަށެވެ. މިކަމުގެ ސަބަބުން ޔާމީންގެ އިސްތިއުނާފީ ހައްގަށް ހުރަސް އެޅިފައިވާ ކަމަށް ސައީދު ވިދާޅުވި އެވެ.

"އިސްތިއުނާފީ ހައްގަކަށް އެދިއްޖެ ނަމަ ގާނޫނުއަސާސީން މި ބުނަނީ ލާއިންސާނީ އަދަބު ދީގެން ނުވާނެއޭ، ބައިނަލްއަގްވާމީ ހުރިހާ މުއާހަދާތަކެއްގައި ވެސް އެބަ ބުނޭ އިސްކަން ދޭން ވާނީ އިސްތިއުނާފީ މައްސަލަތަކަށޭ، ދަށު ކޯޓަކަށް ނޫނޭ،" ޔާމީން ސަރުކާރުގެ އިކޮނޮމިކް މިނިސްޓަރު ސައީދު ވިދާޅުވި އެވެ.

ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވީ ކްރިމިނަލް ކޯޓުން އެހެން ހުރިހާ މައްސަލައެއް އެއްކައިރިކޮށް ހަމައެކަނި ޔާމީންގެ މައްސަލަ ކުރިއަށް ގެންދަން ހިފާފައިވާ ކަމަށާއި އެއީ ސަރުކާރުގެ ނުފޫޒާ ހެދި ކަމަށެވެ. ކްރިމިނަލް ކޯޓުގެ ޝަރީއަތް އަވަސްކުރަން ނުފޫޒު ފޯރުވާ ކަމަށާއި ހައި ކޯޓުގެ ފަނޑިޔާރުން ޗުއްޓީއަށް ދާން މަޖުބޫރުކުރާ ކަމަށް ވެސް ޝިޔާމް ތުހުމަތު ކުރެއްވި އެވެ.

ޔާމީންގެ މައްސަލަ ބައްލަވާ ތިން ފަނޑިޔާރުން ޖުލައި މަސް ތެރޭ ޗުއްޓީއަށް ވަޑައިގަންނަވާ ކަމަށް ޝިޔާމް ތުހުމަތު ކުރެއްވި ނަމަވެސް، އެކަން ރަސްމީކޮށް ކަށަވަރެއް ނުވެ އެވެ. އެގޮތަށް ފަނޑިޔާރުން ޗުއްޓީއަށް ވަޑައިގެންފި ނަމަ، އިންތިހާބަށް ކުރިމަތިލެއްވުމުގެ ފުރުސަތު އޮއްވައި، މައްސަލަ ނުނިންމޭނެ އެވެ.