ބެރިޔަންފަރުގައި އެއާޕޯޓް އަޅާނީ ތިމާވެށި މެނޭޖް ކޮށްގެން: ރައީސް

ރ. އަތޮޅުގެ ދެކުނު ބިތުގައި އެއާޕޯޓެއް އަޅަން ބެރިޔަންފަރު ކަނޑައެޅުމަކީ އެކަމުގައި ކަންބޮޑުވުންތަކެއް އޮވެދާނެ ކަމެއްކަން އެނގިވަޑައިގަންނަވާ ކަމަށާއި ނަމަވެސް، އެ މަޝްރޫއު ކުރިއަށް ގެންދާނީ ތިމާވެއްޓަށް ވެސް އެންމެ ފައިދާވާ ގޮތަށް ކަމަށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.

ރިޔާސީ ކެމްޕެއިންގައި ފައިނަށް ވަޑައިގެން ބޭއްވި ޖަލްސާގައި ރައީސް ވިދާޅުވީ، ވައިގެ މަގުން ރަށްރަށް ގުޅާލުމަކީ މި ސަރުކާރުގެ ވަރަށް ބޮޑު އަމާޒެއް ކަމަށެވެ. އެ ސިޔާސަތުގެ ދަށުން ރ. އަތޮޅުގެ ދެކުނު ބިތުގައި ވެސް އެއާޕޯޓެއް ހަދަން ނިންމައި، އިންވެސްޓަރުން ހޯދުމުގެ މަސައްކަތް އަންނަނީ ކުރަމުންނެވެ.

ރ. އަތޮޅުގައި މިހާރު އެއާޕޯޓް އޮންނަނީ އިފުރުގަ އެވެ. ރ. އަލިފުށީގައި އެއާޕޯޓެއް ހެދުމުގެ މަސައްކަތް ވެސް އަންނަނީ ކުރަމުންނެވެ.

ރައީސް ވިދާޅުވީ ބެރިޔަންފަރުގައި ވެސް އެއާޕޯޓެއް ހަދަން ނިންމީ ރ. އަތޮޅުގެ ދެކުނު ބިތުގެ ރަށްތަކުގެ މީހުންނަށް ދަތުރުފަތުރު ކުރުމުގައި ލުއިފަސޭހަކަން ހޯދައިދިނުމަށް ކަމަށާއި އަންނަ ދައުރުގައި އެ މަސައްކަތް ކުރާނ ކަމަށެވެ.

ކުރީގެ ރައީސް އަބްދުﷲ ޔާމީންގެ ސަރުކާރުން މި އެއާޕޯޓް ހަދަން ނިންމީ ފައިނުގަ އެވެ. ނަމަވެސް، އެ ރަށުގެ ބިޔަ ގަސްތަކާއި ތިމާވެށި ނެތިގެންދާނެ ކަމަށް ބުނެ އެއާޕޯޓް ހެދުމާ ދެކޮޅަށް އަޑުއުފުލުމުން އެ ސަރުކާރުން އެ ވިސްނުން ދޫކޮށްލި އެވެ.

ބެރިޔަންފަރަކީ ވެސް ތިމާވެށީގެ ގޮތުން މުއްސަނދި ތަނެއްކަން ފާހަގަކުރައްވަމުން ރައީސް އިބްރާހިމް މުހައްމަދު ސޯލިހު ވިދާޅުވީ، އެ ތަނުގައި އެއާޕޯޓް ހަދަން ނިންމީ، އެއީ އެންމެ ގިނަ ބަޔަކަށް ފައިދާ ކުރާނެ ގޮތް ކަމަށް ވާތީ ކަމަށެވެ. އެ މަޝްރޫއާ މެދު ތިމާވެށީގެ ދިފާއުގައި މަސައްކަތް ކުރާ ފަރާތްތަކުގެ ހިތްބުރަކަމެއް އޮވެދާނެ ކަމަށާއި ނަމަވެސް، މަޝްރޫއު ކުރިއަށް ގެންދާނީ ތިމާވެށި މެނޭޖް ކޮށްގެން ކަމަށް ރައީސް ވިދާޅުވި އެވެ.

"މިކަން އަޅުގަނޑުމެން ކުރިއަށް ގެންދާނީ ތިމާވެށި ވެސް މެނޭޖް ކޮށްގެން. އެއީ ދިވެހިރާއްޖެ އަށް އެންމެ ފައިދާ ހުރި ގޮތަކީ. ތިމާވެށި ހިމާޔަތް ކުރުމަކީ އަޅުގަނޑު ދެކޭ ގޮތުގައި ތިމާވެށި މެނޭޖް ކުރުން. އޭގެން ލިބެން އޮތް އެންމެ ރަނގަޅު ފައިދާ މިހާރަށް ވެސް ލިބި އަދި އަންނަން އޮތް ޖީލުތަކަށް ވެސް ފޯރުކޮށްދެވުން،" ރައީސް ވިދާޅުވި އެވެ.

"އަޅުގަނޑުމެން އެ ޕްރޮޖެކްޓް ކުރިއަށް ގެންދާނީ އެ ހުރިހާ ކަމަކަށް ބަލައި ތިމާވެއްޓަށް ވެސް އެންމެ ފައިދާ ހުރި ގޮތަށް."

ފައިނަށް ރައީސްގެ ވައުދުތައް:

- ޒަމާނީ ރިންގް ރޯޑެއް.

- ބަނދަރު ބޮޑުކުރުން.

- ދޯނި އެހެލާނެ ތަނެއް.

- ފުޓްބޯޅަ ދަނޑެއް.

- ޓެނިސް ކޯޓެއް.

- ސްވިމިން ޓްރެކެއް.

- އިތުރު ޖެންސެޓްތަކާއި ރިއުނިއުބަލް އެނާޖީ އިތުރުކުރުން.

ރައީސް އިބްރާހިމް މުހައްމަދު ސޯލިހު ވިދާޅުވީ ފައިނު ފަދަ ރަށްރަށަކީ ދަނޑުވެރިކަން ކަހަލަ ގިނަ މަސައްކަތްތަކެއް ކުރެވެން އޮތް ރަށްތަކެއް ކަމަށާއި އެ ފުރުސަތުތައް ރައްޔިތުންނަށް ހޯދައިދިނުމަކީ މި ސަރުކާރުގެ އަމާޒެއް ކަމަށެވެ. އަލަށް އެފަދަ މަސައްކަތްތައް ފަށާ މީހުންނަށް ލުއިލޯނު ދޫކުރާނެ ކަމަށް ވެސް ރައީސް ވިދާޅުވި އެވެ.

ދެވަނަ ދައުރަކަށް ރައީސް އިބްރާހިމް މުހައްމަދު ސޯލިހު ގެންގުޅުއްވާ މެނިފެސްޓޯގައި ހިމެނޭ ކޮމިނިއުޓީ ބޭންކިން ނިޒާމެއް އެ މަނިކުފާނު މިއަދު ފާހަގަ ކުރެއްވި އެވެ. ވިދާޅުވީ އެ ނިޒާމުގެ ތެރެއިން ރަށްރަށުގައި ކުރެވެން ހުރި މަސައްކަތްތައް ކައުންސިލްތަކުން ފަށައިގަތުމުން އެކަމަށް ބޭނުންވާ ކެޕިޓަލް ސަރުކާރުން ފޯރުކޮށްދޭނެ ކަމަށެވެ.

"މި ބޭންކިން ނިޒާމުގެ ތެރެއިން ކުދިކުދި މަސައްކަތްތައް ފަށާ ރައްޔިތުންނަށް ފަސޭހައިން ލޯނު ދޫކުރެވޭނެ ނިޒާމެއް ގާއިމް ކުރެވިގެން ދާނެ. މިއީ މި ރަށްތަކަށް ތަރައްގީއަށްޓަކައި އެންމެ ބޮޑަށް ބޭނުން ޖެހިފައިވާ ކަންކަން. މަސައްކަތް ކުރާނެ ވަސީލަތްތައް ހޯދައިދިނުން، ފުރުސަތުތައް ފަހިކޮށްދިނުން،" ރައީސް ވިދާޅުވި އެވެ.

އެ މަނިކުފާނު ވިދާޅުވީ މި ސަރުކާރުން ވަނީ ރަށްތަކުގައި ގިނަ މަޝްރޫއުތަކެއް ހިންގާފައި ކަމަށާއި މިދިޔަ ފަސް އަހަރަކީ ތާރީހުގައި ވެސް އެންމެ ގިނަ މަސައްކަތްތައް އެއްފަހަރާ ކުރެވުނު ފަސް އަހަރު ކަމަށެވެ. އެ މަންޒަރު ރަށްރަށުން ފެންނާނެ ކަމަށާއި އަސާސީ ހިދުމަތްތައް ވަނީ ގާއިމު ކޮށްފައިވާ ކަމަށް ވިދާޅުވި އެވެ.

"މިއިން ރަށަކަށް އައިސް ކޮށްދޭން ވާނެ މާގިނަ ވައުދުތަކެއް މިހާރަކު ނެތް. ރައްޔިތުން އެންމެ ބޭނުންވާ ހުރިހާ ކަމެއް މި ދަނީ ފުއްދެމުން،" ރައީސް ވިދާޅުވި އެވެ.