އެކަނި މަހަށް ނުކުމެ އުޅެނިކޮށް މިދިޔަ ހޮނިހިރު ދުވަހު ގެއްލުނު އދ. ދަނގެތި، ޔޫސުފް އިބްރާހިމް (ޔޫސުބެ) ހޯދަން ސިފައިން ހިންގާ ބޮޑު އޮޕަރޭޝަނެއްގައި ބޮޑު ސަރަހައްދެއް ބަލައިފި އެވެ.
އެމްއެންޑީއެފުން މިއަދު ބުނީ ދަނގެތިން ކުޑަ އިންޖީނު ދޯންޏެއްގައި މަހަށް ނިކުމެ އުޅެނިކޮށް ގެއްލުނު ޔޫސުބެ ހޯދުމުގެ މަސައްކަތް، އެމްއެންޑީއެފް މާލެ އޭރިއާ ކޮމާންޑާއި ކޯސްޓްގާޑް ސެކަންޑް ސްކޮޑްރަން އިން އަދިވެސް ކުރަމުން އަންނަ ކަމަށެވެ.
ސިފައިން ވަނީ މިދިޔަ އާދިއްތަ ދުވަހުން ފެށިގެން މިއަދާ ހަމައަށް ޑައިވްކޮށްގެންނާއި ވައިގެ މަގުންނާ އަދި ސާފޭސް ސާޗުތަކެއް ވެސް ކުރިއަށް ގެންގޮސްފަ އެވެ. އެ ޑައިވްތަކުގައި އެމްއެންޑީއެފް މާލެ އޭރިއާ ކޮމާންޑާއި ކޯސްޓްގާޑް ސެކަންޑް ސްކޮޑްރަންގެ ޑައިވަރުންނާ އެކު، އދ. ދަނގެތިން ވެސް ޑައިވަރުންތަކެއް ބައިވެރިވި ކަމަށް ސިފައިން ބުންޏެވެ.
އެމްއެންޑީއެފުން ބުނި ގޮތުގައި؛
• ޑައިވްކޮށްގެން 78،850 އަކަ މީޓަރުގެ ސަރަހައްދެއް ބަލާފައިވޭ.
• ވައިގެ މަގުން އެމްއެންޑީއެފް ޑޯނިއާ އެއާކްރާފްޓުގައި 156.87 އަކަ ނޯޓިކަލް މޭލުގެ ސަރަހައްދެއް ބަލާފައިވޭ.
• ކަނޑުމަގުން އެމްއެންޑީއެފް ކޯސްޓްގާޑުގެ ފާސްޓް އިންޓަސެޕްޓާ ކްރާފްޓް "ހަކުރާ" ވަނީ 4.11 އަކަ ނޯޓިކަލް މޭލުގެ ސަރަހައްދެއް ބަލާފައިވޭ.
އުމުރުން 68 އަހަރުގެ ޔޫސުބެ ކުޑަ ދޯންޏެއްގައި މަހަށް ނުކުތީ މިދިޔަ ހޮނިހިރު ދުވަހުގެ ފަތިހުގެ ވަގުތެއްގަ އެވެ. އޭނާގެ ޚަބަރެއް ނުވެގެން ސިފައިންނަށް ރިޕޯޓްކުރީ އެ ދުވަހު މެންދުރު ވަނިކޮށެވެ. ޔޫސުބެ ގެއްލުނުއިރު ލައިގެން ހުރީ ރަތްކުލައިގެ ޓީޝާޓެކެވެ.
ޔޫސުބެ އިންޖީނުލީ ކުޑަ ދޯންޏެއްގައި މަސްވެރިކަމަށް ނުކުތީ އދ. އޮރިމަސް ފަޅުގެ އިރުމަތީ ފަރާތަށެވެ. އަދި އދ. ރަންވެލީގެ އުތުރު ކަނޑުއޮޅިން އެ ދޯނި ދަނިކޮށް އެ ދުވަހު ހެނދުނު ބަޔަކަށް ފެނުނެވެ.
އެ ހާދިސާ އާ ގުޅޭ ގޮތުން ދަނގެތި ކައުންސިލްގެ ރައީސް މުއާވިއަތު ރަޝީދު ކުރިން ވިދާޅުވި ގޮތުގައި، ޔޫސުބެ ހޯދަން އެމްއެންޑީއެފްގެ 10 ޑައިވަރުންނާއި އެ ރަށުން 12 ޑައިވަރުން ބައިވެރިވެ އެވެ.
ދަނގެއްޗަކީ ރާއްޖޭގައި ޑައިވަރުން އެންމެ ގިނަ އެއް ރަށް ވެސް މެ އެވެ