އިމާމުންނަށް ޕީއެޗްޑީ ހެދުމުގެ ފުރުސަތު ފަހިކޮށްދިނުމަށް ވަރަށް އަވަހަށް އިއުލާންކުރާނެ ކަމަށް، އާ ރައީސް ޑރ. މުހައްމަދު މުއިއްޒުގެ ސަރުކާރުގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.
ސޯޝަލް މީޑިއާގައި އޭނާ ކުރެއްވި ޕޯސްޓެއްގައި ވިދާޅުވީ، މިސްކިތްތަކުގެ އިމާމުންގެ ތެރެއިން، އިސްލާމީ ދާއިރާއަކުން މާސްޓާސް ޑިގްރީ ހާސިލްކޮށްފައިވާ މީހުންނަށް ބޭރުގެ ޔުނިވާސިޓީއަކުން ޕީއެޗްޑީ ހެދުމުގެ ފުރުސަތު ފަހިކޮށްދިނުމުގެ ކަންކަން ވަރަށް އަވަހަށް އިއުލާން ކުރައްވާނެ ކަމަށެވެ.
ސައުދި އަރަބިއްޔާ އާއި މެލޭޝިޔާ އާއި ބުރޫނާއި އަދި އިންޑޮނޭޝިއާ އިން ވެސް އިމާމުންނަށް ތަމްރީނުގެ ފުރުސަތު ހޯދަވައިދެއްވާނެ ކަމަށް ޝަހީމް ވިދާޅުވި އެވެ.
މިނިސްޓަރުކަމާ ހަވާލުވެވަޑައިގެން ޝަހީމް އެންމެ ފުރަތަމަ ނިންމެވި ނިންމުމަކީ ގދ. ތިނަދޫ އިސްލާމީ މަރުކަޒު، އިސްލާމިކް ޔުނިވާސިޓީގެ ދަށަށް ބަދަލުކުރުމެވެ.
އޭނާ ފޭސްބުކްގައި ރޭ ލިޔުއްވާފައި ވަނީ ތިނަދޫގައި ގާއިމްކޮށްފައިވާ އިސްލާމީ މަރުކަޒު އަންނަ އަންގާރަ ދުވަހު އައިޔޫއެމްއާ ހަވާލު ކުރައްވާނެ ކަމަށެވެ. އޭގެ ސަބަބުން އިސްލާމީ އިލްމު އުނގެން ބޭނުންވާ ދަރިވަރުން އެ ސަރަހައްދުން މާލެ ނައިސް ކިޔެވޭނެ ގޮތް ފަހިވާނެ ކަމަށް ވެސް އޭނާ ވިދާޅުވި އެވެ.
"އިސްލާމީ ހަޟާރަތާއި ސަގާފަތުގެ މަރުކަޒަކަށް ވެގެންދާނެ،" ޝަހީމް ވިދާޅުވި އެވެ.