ސުޕަސްޓާރެކޭ ބުނޭ ވަރުގެ ކަމެއް އަދި ނުކުރާ ކަމަށާއި އެއީ އޭނާ އަށް ހައްގުވާ ލަގަބެއް ނޫން ކަމަށް ސަލްމާން ހާން ބުނެފި އެވެ.
މިހާރު ސިނަމާތަކުގައި ދައްކަމުން "ޓައިގާ 3" އަށް ލިބުނު ބޮޑު ކާމިޔާބީ އަށް ފަހު، ބޮލީވުޑްގެ ހަބަރުތައް ގެނެސްދޭ "ޕިންކްވިލާ" އަށް ދިން އިންޓަވިއުއެއްގައި ސަލްމާން ބުނީ އޭނާއާ ގުޅުވައި "ސުޕަސްޓާރު" އަދި "މެގަސްޓާރު" ކަހަލަ ލަގަބުތައް ބޭނުންކުރުމުން ހިތްހަމަނުޖެހޭ ކަމަށެވެ.
“އެއީ އަހަރެންގެ އެއްވެސް ފަރުވާލެއް ބަހައްޓާ ކަމެއް ނޫން. އަހަރެން މިކުރަނީ އަހަރެންގެ މަސައްކަތް؛ މީހުންނަށް އެ ކަމުދޭ، އަދި އެއީ ހުރިހާ ވެސް އެއްޗަކީ،" އޭނާ ބުންޏެވެ.
"ސުޕަސްޓާރެއްގެ ޓެގް ހައްގުވާ އެއްވެސް ކަމެއް އަހަރެން އަމިއްލައަށް ނުކުރަން."
ސަލްމާން ބުނީ ބައެއް މީހުން އޭނާ އަށް "ބާއި" އާއި "ސައްލޫ" ކިޔާ އުޅޭ ކަމަށެވެ. އެ ކަހަލަ ނަންތައް ބޭނުންކުރިޔަސް އެއްވެސް މައްސަލައެއް ނެތް ކަމަށް އޭނާ ބުންޏެވެ.
އެ އިންޓަވިއުގައި ސަލްމާން ވަނީ އޭނާގެ ކެރިއަރާ ގުޅޭ އެހެން ވަރަށް ގިނަ ވާހަކަތައް ވެސް ދައްކައިފަ އެވެ.
މި މަހު 12 ގައި ސިނަމާތަކުގައި ދައްކަން ފެށި "ޓައިގާ 3" އަށް ދުނިޔޭގެ ބޮކްސް އޮފީހުގައި މިހާރު ވަނީ 51.5 މިލިއަން ޑޮލަރު ލިބިފަ އެވެ.