އާ ސަރުކާރުން އާ މިނިސްޓްރީތައް ހަދައި އެހެން ބައެއް މިނިސްޓްރީތަކުގެ މަސައްކަތްތަކަށް ބަދަލު ގެނެސްފައި ވާއިރު، މިނިސްޓްރީތަކުގެ މެންޑޭޓު ފާސްކުރަން ރައްޔިތުންގެ މަޖިލީހަށް ފޮނުވާފައިނުވާތީ، ވަޒީރުންނަށް ރުހުން ދެވިދާނެ ކަމާ މެދު ސުވާލު އުފެދިއްޖެ އެވެ.
ރައީސް ޑރ. މުހައްމަދު މުއިއްޒު އައްޔަންކުރައްވާފައިވާ 22 މިނިސްޓަރުންނަށް ރުހުން ދިނުން މިއަދުގެ ޖަލްސާއަށް އެޖެންޑާކޮށްފައިވާ އިރު، ޖަލްސާ ފެށުމާ އެކު ތުޅާދޫ ދާއިރާގެ އެމްޑީޕީ މެމްބަރު ހިސާން ހުސެއިން ވަނީ ނިޒާމީ ނުކުތާއެއް ނަންގަވައި، ގާނޫނުއަސާސީގެ 116 ވަނަ މާއްދާގެ ހ. އިން ރައީސުލްޖުމްހޫރިއްޔާއަށް ލިބިދޭ އިހުތިޔާރުގެ ދަށުން އުފައްދާފައިވާ ވުޒާރާތަކާއި، އެ ވުޒާރާތަކުގެ މަސައްކަތުގެ ދާއިރާތައް ފާސްކުރަން ރައްޔިތުންގެ މަޖިލީހަށް ފޮނުވަންޖެހޭކަން ފާހަގަކުރައްވައިފަ އެވެ.
ހިސާން ވިދާޅުވި ގޮތުގައި، މިނިސްޓްރީތަކުގެ މަސައްކަތުގެ ދާއިރާތައް ފާސްނުކޮށް، އެ މިނިސްޓްރީތަކުގެ ޒިންމާތައް ވަޒީރަކަށް އަދާކުރެއްވޭނެ ކަމުގެ ގާބިލުކަން މަޖިލީހަކަށް ވަޒަނެއް ނުކުރެވޭނެ އެވެ.
އެހެންވެ، ރައީސް އައްޔަންކުރައްވާފައިވާ ވަޒީރުންގެ ޝަރުތު ހަމަވާކަމަށް ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން ނިންމާފައިވަނީ ރަނގަޅަށް ނޫން ކަމަށާއި އެއީ އެ ރިޕޯޓަށް ވޯޓަށް ނޭހޭނެ ކަމަށް ހިސާން ފާހަގަކުރެއްވި އެވެ.
ހިސާން ނެންގެވި ނިޒާމީ ނުކުތާ ރިޔާސަތުން މަޖިލީހުގެ ރައީސް މުހައްމަދު އަސްލަމް ވަނީ ބަލައިގަންނަވައި، އެ ކަމާ މެދު ގޮތެއް ނިންމުމުގެ ކުރިން މަޖިލީހުގެ މެޖޯރިޓީ ލީޑަރާއި މައިނޯރިޓީ ލީޑަރާ މަޝްވަރާ ކުރައްވަން ޖަލްސާ މެދުކަނޑާލައްވައިފަ އެވެ.