ރާއްޖެ އަށް ގިނަ ދުވަހަށް އަންނަ ބިދޭސީންނާއި ރާއްޖޭގައި މި ވަގުތު ތިބި ބިދޭސީންގެ ތެރެއިން، މެޑިކަލް ސްކްރީނިން ނުހަދާ ތިބި ބިދޭސީން، ކުރިއަށް އޮތް ހަ މަސް ދުވަހުގެ ތެރޭގައި އެ ޓެސްޓުތައް ހަދަންޖެހޭ ގޮތަށް ސަރުކާރުން ނިންމައިފި އެވެ.
ރައީސް އޮފީހުގައި މިހާރު ކުރިއަށްދާ، ޕްރެސް ކޮންފަރެންސް، ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، އަދި ކުރީގެ ހެލްތު މިނިސްޓަރު އަބްދުﷲ ނާޒިމް އިބްރާހީމް ވިދާޅުވީ އެކި ބޭނުންތަކަށް ރާއްޖެ އަށް ގިނަ ދުވަހު އަންނަ ހުރިހާ ބިދޭސީން އޮންއެރައިވަލް އަދި އަހަރަކު އެއް ފަހަރު މެޑިކަލް ޗެކަޕް ހަދަން މީގެ ފަހުން ޖެހޭނެ ކަމަށެވެ. އަދި ރާއްޖެ އައުމަށްފަހު މެޑިކަލް ޗެކަޕް ހަދަން ދީފައިވާ 30 ދުވަހުގެ މުއްދަތު ވެސް، 15 ދުވަހަށް ކުރު ކުރަން ނިންމާފައިވާ ކަމަށް އޭނާ ވިދާޅުވި އެވެ.
ރާއްޖެ އަށް ބިދޭސީ މަސައްކަތު މީހުން ގެނައުމުގެ ގަވައިދުގައިވާ ގޮތުން ރާއްޖެ އަށް މަސައްކަތްކުރަން އެތެރެވާ ބިދޭސީން އަހަރަކު އެއްފަހަރު މެޑިކަލް ހުށަހަޅަން ޖެހެ އެވެ. އެހެން ނޫނީ، ވޯކް ޕާމިޓް އާ ކޮށެއް ނުދެ އެވެ. ރާއްޖެ އެތެރެވުމުގެ ކުރިން އެ މީހެއްގެ ޕޮލިސް ރިޕޯޓު ހުށަހަޅައި އެޕްރޫވަލް ހޯދުމަށްފަހު ރާއްޖެ އެތެރެވާތާ 30 ދުވަހުގެ ތެރޭގައި ސަރުކާރުން އެޕްރޫވް ކޮށްފައިވާ ކްލިނިކަކުން ނުވަތަ ހޮސްޕިޓަލަކުން މެޑިކަލް ރިޕޯޓެއް ހުށަހަޅަން ޖެހެ އެވެ.
ނަމަވެސް، އެ ހުރިހާ ކަމެއް އޮތީ އިހުތިޔާރީ ކަމަކަށް ދޫކޮށްލައިފަ އެވެ. އެހެންވެ، ބިދޭސީން ރާއްޖެ ގެންނައިރު މިހާރު މެޑިކަލް ހުށަނޭޅިއަސް ވިސާ ލިބެ އެވެ.
ނާޒިމް ވިދާޅުވީ ބިޒްނަސް ވިސާގައި އެންޑެމިކް ސަރަހައްދުތަކުން އަންނަ މީހުން، ވިސާގެ މުއްދަތު އިތުރުކުރާނަމަ މެޑިކަލް ހަދަންޖެހޭނެ ކަމަށެވެ. ހާއްސަކޮށް، މެޑިކަލް ޗެކަޕްގައި މިހާރު ލާޒިމްކޮށްފައިވާ ޓެސްޓުތައް، އެ ވަގުތެއްގެ ހާލަތަށް ބަލައި އިތުރުކުރުމުގެ ބާރު ވެސް ހެލްތު މިނިސްޓްރީއަށް ދިނުމަށް، ކެބިނެޓުން ނިންމާފައިވާ ކަމަށް އޭނާ ވިދާޅުވި އެވެ.
ބިދޭސީންގެ މެޑިކަލްގައި މިހާރު ބަލަނީ މައިގަނޑު ހަތް ކަމަކަށެވެ. އެއީ؛
- ވީޑީއާރުއެލް: ޖިންސީ ގުޅުމުގެ ސަބަބުން އަރާ ސިފިލިސް ނަމަކަށް ކިޔާ ބައްޔަށް ޓެސްޓުކުރަން
- އެޗްބީއެސްއޭބީ: ހެޕަޓައިޓިޓިސް ބީ އަށް ޓެސްޓުކުރަން
- އެޗްއައިވީ
- ޓީސީ
- އެޗްބީ
- ޓީބީ ހުރިތޯ ބަލަން މޭގެ އެކްސްރޭ
- ފިޒިކަލް އެގްޒަމިނޭޝަން
"މެޑިކަލް ޗެކަޕްއަށް ޓެސްޓުކުރާ ބަލިތަކަށް، އެންޑެމިކް ތަންތަނުން ވިސާގައި ބަޔާންކޮށްފައިވާ ބާވަތެއްގެ މީހުން ރާއްޖެ އައުމުގެ ކުރިން ޕްރީ-އެރައިވަލް މެޑިކަލް ޗެކަޕެއް ހެދުން. މިގޮތުން ޗެކަޕް ހަދާނީ މިނިސްޓްރީ އޮފް ހެލްތުން ކަނޑައަޅާ މިންގަނޑުތަކަށް އަދި ކަނޑައަޅާ ތަންތަނުން ކަމަށް ކަނޑައެޅުން،"
"ކުރީގައި ދެންނެވި ވިސާތަކުގައި ރާއްޖޭގައި ތިބި ބިދޭސީން، ރާއްޖޭގައި މެޑިކަލް ޗެކަޕް ހަދާފައި ނުވާ ފަރާތްތަކުން ހަ މަސް ދުވަހުގެ ތެރޭގައި މެޑިކަލް ޗެކަޕް ހަދާ ނިންމުން. އޭގެ މާނައަކީ، އެއް އަހަރުގެ ތެރޭގައި މެޑިކަލް ޗެކަޕް ހަދާފައި ނުވާ ބޭރުގެ ކޮންމެ ރައްޔިތެއް މިކަން ކުރަންޖެހޭނެކަން ނިންމުން."
ނާޒިމް ވިދާޅުވީ ރާއްޖޭގައި ގަވާއިދާ ހިލާފަށް އުޅޭ ބިދޭސީން، ރެގިއުލައިޒްކުރާއިރު މެޑިކަލް ޗެކަޕް ލާޒިމްކޮށްފައިވާ ކަމަށެވެ.