ކުރީގެ ރައީސް އިބްރާހިމް މުހައްމަދު ސޯލިހުގެ ކޮއްކޯފުޅު، އަދި ހުޅުމާލެ ދާއިރާގެ މެންބަރު އަލީ ނިޔާޒާއި އަދި ފެނަކައިގެ ކުރީގެ އެމްޑީ އަހުމަދު ސައީދު މުހައްމަދު ހިމެނޭހެން އަންނަ މަޖިލިސް އިންތިހާބުގެ އެމްޑީޕީގެ ޓިކެޓު އިތުރު 10 ބޭފުޅަކަށް ކަށަވަރުވެއްޖެ އެވެ.
އެ ޕާޓީން މިއަދު ކުރި އިއުލާނެއްގައި ބުނީ އިތުރު 10 ބޭފުޅުންނަށް ޕްރައިމަރީއާ ނުލައި ޕާޓީ ޓިކެޓު ކަށަވަރުވެފައިވާ ކަމަށެވެ. އެއީ:
- އަމީން ފައިސަލް - ކަނޑިތީމު ދާއިރާ
- ސަލީމް ހުސައިން - އިނގުރައިދޫ ދާއިރާ
- އަލީ ނިޔާޒް - ކުރެންދޫ ދާއިރާ
- ޝާތިރު އަބްދުއްރަހުމާން - ހުރާ ދާއިރާ
- ރުގިއްޔާ މުހައްމަދު - ދަނގެތި ދާއިރާ
- މޫސާ ޝިޔާމް އަބްދުﷲ އަލީ - މުލަކު ދާއިރާ
- އަބްދުﷲ ޝަރީފް - ގަމު ދާއިރާ
- އަހުމަދު ސައީދު - ގެމަނަފުށީ ދާއިރާ
- އަހުމަދު ސައީދު މުހައްމަދު - ގައްދޫ ދާއިރާ
- އިބްރާހިމް މުއިއްޒު - ހެންވެއިރު އުތުރު ދާއިރާ
އެމްޑީޕީ މީގެ ކުރިން ބުނީ ކުރިއަށް އޮތް 20 ވަނަ ރައްޔިތުންގެ މަޖިލިހުގެ އިންތިހާބުގައި އެއް ކެންޑިޑޭޓުން ކުރިމަތިލާފައިވާ 36 ދާއިރާއެއްގެ ޓިކެޓު ވަނީ ޕްރައިމަރީއާ ނުލައި ކަށަވަރުވެފަ އެވެ. އޭގެ ތެރޭގައި ގިނައިން ހިމެނެނީ މިހާރު ވެސް މަޖިލީހުގައި ތިއްބެވި މެންބަރުންނާއި ކުރީގެ ސަރުކާރުގެ އިސްވެރިންނެވެ.
އެމްޑީޕީ ޓިކެޓުގައި ބާކީ ހުރި ދާއިރާތަކަށް ވާދަކުރާ ކެންޑިޑޭޓުން ހޮވުމަށް ބާއްވާ ޕްރައިމަރީ ތާވަލްކޮށްފައި އޮތީ ފެބްރުއަރީ ތިން ވަނަ ދުވަހަށެވެ.
މަޖިލިސް އިންތިހާބު ބާއްވަން އިލެކްޝަންސް ކޮމިޝަނުން ނިންމާފައިވަނީ އަންނަ މާޗު މަހުގެ 17 ވަނަ ދުވަހު އެވެ.