މި ސަރުކާރުގެ ވަޒީރުންނަށް ރުހުން ދިނުމުގެ މައްސަލަ ކުރިއަށް ގެންދަން ދެ ފަހަރެއްގެ މަތިން މަސައްކަތްކޮށް ނާކާމިޔާބުވެފައި އޮއްވައި، އެ ޖަލްސާ ރައްޔިތުންގެ މަޖިލީހުގައި އަނެއްކާ ވެސް ދެންމެ ފަށައިފި އެވެ.
މި ސަރުކާރުގެ ވަޒީރުންނަށް ރުހުން ދިނުމުގެ މައްސަލަ ނިންމަން އިއްޔެ ހެނދުނު ވެސް މަޖިލީހުގައި ޖަލްސާއެއް ބޭއްވި އެވެ. އަދި ރޭ ވެސް ޖަލްސާއެއް ބޭއްވި އެވެ. އެ ދެ ޖަލްސާ ވެސް ކުރިއަށް ނުގެންދެވިގެން ހުއްޓާލަން ޖެހުނީ ސަރުކާރަށް ތާއީދު ކުރައްވާ މެމްބަރުން ދުންމާރި ފުމެ، އަޑުގަދަކޮށް ހަދައިގެންނެވެ.
މައްސަލަ ބޮޑުވެފައި އޮތީ، ވަޒީރުންގެ މަޖިލީހުގެ ހަތަރު ވަޒީރަކަށް ރުހުން ނުދޭން، މަޖިލީހުގެ މެޖޯރިޓީ އޮންނަ އެމްޑީޕީ އާއި ޑިމޮކްރެޓްސް ނިންމުމާ ގުޅިގެންނެވެ. އެއީ، ޑިމޮކްރަސީގެ އަސާސްތަކާ ހިލާފު ކަމެއް ކަމަށް ބުނެ، ޕީޕީއެމް/ ޕީއެންސީގެ މެމްބަރުން ވަނީ ޖަލްސާ ކުރިއަށް ގެންދަން ހުރަސް އަޅައިފަ އެވެ. އަދި އިއްޔެ ހެނދުނު ޖަލްސާ ހޫނުވެ، ހިންގި މާރާމާރީއެއްގައި އެއް މެމްބަރަކު ވަނީ ޒަހަމް ވެސް ވެފަ އެވެ.