ރޯދަ މަސް ފެށެންވާއިރަށް މަސްވެރިންނަށް ދޭން ޖެހިފައިވާ ހުރިހާ ފައިސާއެއް ދޭން މަސައްކަތް ކުރަމުންދާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރ. ދުވާފަރަށް މިއަދު ރައީސް ވަޑައިގެންނެވިއިރު މި ރަށުގެ ގިނަ މަސްވެރިންގެ ކަންބޮޑުވުމަކީ ވެސް މަސް ކިރައިގެން ލިބެން ޖެހޭ ފައިސާ ނުލިބުމެވެ. "މިހާރު"އާ ވާހަކަ ދެއްކި ދުވާފަރު މަސްވެރިއަކު ބުނި ގޮތުގައި މަސް ކިރުވައިގެން އެއްވެސް ފައިސާއެއް ނުލިބޭތާ ދެ މަހާއި ބައި މިހާރު ވަނީ ވެފަ އެވެ.
ދުވާފަރު ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުން ރައީސް ވިދާޅުވީ މަސްވެރިކަމަކީ އިޔާދަކޮށް ފުޅާކުރަން ބޭނުންވާ ސިނާއަތް ކަމަށާއި އެކަމަށް ޓަކައި މި ސަރުކާރުން މަސައްކަތް ކުރަމުންދާ ކަމަށެވެ. މިއަދާ ހަމައަށް މި ސަރުކާރުން މަސްވެރިންނަށް ދޭން ޖެހޭ 600 އެއްހާ މިލިއަން ރުފިޔާ ދޫކޮށްފައިވާނެ ކަމަށް ވިދާޅުވި އެވެ.
ރައީސް ވިދާޅުވީ މި ސަރުކާރުން ހަވާލުވިއިރު މަސްވެރިންނަށް 230 މިލިއަން ނުދައްކާ އޮތް ކަމަށާއި އެ ފައިސާ ދީފައިވާނެ ކަމަށެވެ. އެ 230 މިލިއަންގެ އިތުރުން ވެސް 400 އެއްހާ މިލިއަން މިހާރު ދޫކޮށްފައިވާއިރު، އަދިވެސް މަސްވެރިންނަށް ނުދެވޭ ފައިސާ އެބަހުރި ކަމަށެވެ.
"ރޯދަ މަސް އަންނަން ވާއިރަށް މި ބަލަނީ ކޮންމެ ވެސް ކަހަލަ ފައިނޭންސިން މެކޭނިޒަމެއް އެބަ ބަލަން މިހާރު. ސަރުކާރާއި ފިޝަރީޒް މިނިސްޓްރީއާ ކުންފުންޏަކާ އެކުގައި މަސައްކަތް ކޮށްގެން އެބަ މަސައްކަތް ކުރަން މަސްވެރިންނަށް ދޭން ޖެހޭ ހުރިހާ ފައިސާއެއް ރޯދަ މަސް އައުމުގެ ދިނުމަށް،" ރައީސް ވިދާޅުވި އެވެ.
"ވައުދެއް ނޫން މި ވަނީ. މަސައްކަތް ކުރާނެ ކަމަށް މި ދަންނަވަނީ."
މި ސަރުކާރުން ވަނީ މިފްކޯ އަށް މަސް ގަންނަ އަގު މީގެ ތިން ހަފުތާއެއްހާ ދުވަސް ކުރިން 20ރ. އަށް ބަދަލުކޮށްފަ އެވެ.
މަސްވެރިން މަސް ކިތުވާތާ 48 ގަޑިއިރު ތެރޭގައި ފައިސާ ދޫކުރުމަކީ މި ސަރުކާރުގެ ވައުދެއް ކަމަށާއި މިހާރު މަސްވެރިންނަށް ދޫކުރަން ޖެހޭ ފައިސާތައް ދައްކާ ހަލާސްކުރުމަށް ފަހު، އެ ވައުދު ފުރިހަމަ ކުރުމުގެ މަސައްކަތްތައް ވެސް ކުރައްވާނެ ކަމަށް ރައީސް މިއަދު ވިދާޅުވި އެވެ.
ފައިސާ ނުލިބޭ މައްސަލާގައި މަސްވެރިން ވަނީ ގއ. ކުއްޑޫގެ އޮޕަރޭޝަންތައް ހުއްޓުވައި، އެ ތަނުގައި މުޒާހަރާ ވެސް ކޮށްފަ އެވެ.