މެޓާ އިން ހިންގާ ތިން ސޯޝަލް މީޑިއާ ޕްލެޓްފޯމް، ފޭސްބުކް އިންސްޓަގްރާމް އަދި ތްރެޑްސް މިރޭ ޑައުންވެއްޖެ އެވެ.
ފޭސްބުކް ބޭނުން ކުރާ ގިނަ މީހުން ވަނީ މީގެ އިރުކޮޅެއް ކުރިން އެކައުންޓުން ލޮގްއައުޓް ވެފަ އެވެ. ގިނަ ޔޫޒަރުންނަށް އެއްވެސް ވަރަކަށް ލޮގިން ނުވެވި ބައިގަޑިއެއްހާއިރު ވި އެވެ.
މީގެ އިތުރުން އިންސްޓަގްރާމް އާއި ތްރެޑްސްގެ ޕޯސްޓުތައް ވެސް ލޯޑެއް ނުވެ އެވެ.
މެޓާގެ ކޮމިއުނިކޭޝަންސް ހެޑް އެންޑީ ސްޓޯން ވެސް ވަނީ އެ މައްސަލަ ހައްލު ކުރުމަށް މަސައްކަތް ކުރަމުން އަންނަ ކަމަށް ވިދާޅުވެ "އެކްސް" ގައި ޕޯސްޓެއް ކޮށްފަ އެވެ.
އެންމެ ފަހުން މެޓާގެ ޕްލެޓްފޯމްތައް ޑައުން ވެފައި ވަނީ 2021 ވަނަ އަހަރު އެވެ. އެ ފަހަރު ވަޓްސްއެޕާ އެކު އެހެން ސޯޝަލް މީޑިއާ ޕްލެޓްފޯމްތައް ރަނގަޅުވީ ގަޑިއިރުތަކަކަށް ފަހު އެވެ.