ޒަކާތުގެ ގޮތުގައި ލިބުނު ގޮވާން ބަހަން ފަށައިފި

މި ރޯދަ މަހު ފިތުރު ޒަކާތުގެ ގޮތުގައި ލިބުނު ގޮވާމުގެ ބާވަތްތައް ބެހުމުގެ މަސައްކަތް އިސްލާމިކް މިނިސްޓްރީން ފަށައިފި އެވެ.

އިސްލާމިކް މިނިސްޓްރީގެ ދަށުން ހިންގާ ޒަކާތު ހައުސް އިން ބުނީ ގޮވާމުގެ ބާވަތްތަކުން ޒަކާތް ބެހުމުގެ މަސައްކަތް އިއްޔެއިން ފަށައިގެން ކުރިއަށް ދާއިރު މިއަދުގެ ނިޔަލަށް އެ ތަކެތި ބެހުން އަމީނިއްޔާ ސްކޫލުގެ ހޯލުގައި ކުރިއަށްދާނެ ކަމަށެވެ.

އެތަނުގައި ގޮވާމުން ޒަކާތް ބަހާނީ މާލޭގެ ފަގީރުންނާއި މިސްކީނުންގެ ދަފްތަރުގައި ރަޖިސްޓްރީވެފައިވާ މީހުންނަށް އެކަނި ކަމަށް ވެސް ޒަކާތު ހައުސް އިން ބުންޏެވެ.

ގޮވާމުން ފިތުރު ޒަކާތް ބަހާ ގަޑިތައް:

- މިއަދު 11:00 އިން 3:30 އަށް އަދި މިރޭ 8:30 އިން ރޭގަނޑު 10:30 އަށް

ފިތުރު ޒަކާތުގެ ގޮތުގައި ލިބުނު ގޮވާން ބެހުމުގެ މަސައްކަތް މިހާރު ކުރަމުން އަންނައިރު މި ރޯދަ މަހުގެ ފުރަތަމަ 20 ދުވަހުގެ ތެރޭގައި ޒަކާތުގެ ގޮތުގައި ވަނީ 4.5 މިލިއަން ރުފިޔާ ލިބިފަ އެވެ.

މިދިޔަ ހޮނިހިރު ދުވަހުގެ ނިޔަލަށް އޮންލައިންކޮށް ވެސް ފިތުރު ޒަކާތް ބަލައިގަތެވެ. އަދި ބަންޑޭރި ޕޭ މެދުވެރިކޮށް ރޯދަ މަހުގެ ފަހު ދުވަހާ ހަމައަށް ޒަކާތް ދެއްކޭނެ އިންތިޒާމު ވަނީ ހަމަޖައްސައިފަ އެވެ.

އިސްލާމީ މަރުކަޒުގެ ހޯލުގައި ވެސް ޒަކާތް ބަލައިގަންނަމުން އަންނައިރު ހުކުރު ހޮނިހިރު ފިޔަވައި ކޮންމެ ދުވަހެއްގެ ހެނދުނު 11:00 އިން މެންދުރު ފަހު 2:00 އަށް އެތަނުގައި ޒަކާތް ބަލައިގަންނާނެ އެވެ.