ޔޫއެންޑީޕީއަކީ ރާއްޖޭގެ ތަރައްގީގެ މަގު މިއަދާ ހަމައަށް އެކަށައެޅުމުގައި މުހިންމު ދައުރެއް އަދާކޮށްފައިވާ ބައިވެރިއެއް ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ރާއްޖެ އާއި ޔޫއެންޑީޕީގެ ގުޅުމަށް 45 އަހަރު ފުރުން ފާހަގަކުރަން މިރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، ތަރައްގީގެ އަސާސީ ބޭނުންތައް ފުއްދުމަށް ރާއްޖެއިން މަސައްކަތް ފެށި ދުވަސްވަރުން ފެށިގެން މިއަދާއަށް ވެސް ޔޫއެންޑީޕީން އެކި ގޮތްގޮތުން އެހީތެރިވެދީފައިވާ ކަމަށެވެ.
މިގޮތުން، މޫސުމަށް އަންނަ ބަދަލުތަކާ ކުރިމަތިލުމުގެ ގާބިލުކަން އިތުރުކުރުމަށާއި އިގްތިސާދީ ގޮތުން ތަފާތު ދާއިރާތަކަށް ފުޅާވުމަށާއި، އިޖްތިމާއީ ގޮތުން އެންމެންނަށް ހަމަހަމަ ފުރުސަތު ލިބިދިނުމަށާއި، އަންހެނުންގެ ބާރުވެރިކަން އިތުރުކުރުމަށާއި، ގަވަނަންސް ނިޒާމު ރަނގަޅު ކުރުމަށާއި، އަދި މުއައްސަސާތައް އިސްލާހުކުރަން އަމާޒުކޮށްގެން ޔޫއެންޑީޕީއިން ގިނަ އެހީތެރިކަމެއް ވެދީފައިވާ ކަން ރައީސް ފާހަގަކުރެއްވި އެވެ.
ކުރިއެރުމާއި ދެމެހެއްޓެނިވި ތަރައްގީއާ ދިމާއަށް ކުރާ ދަތުރުގައި ރާއްޖެއިން ވަރަށް ބޮޑެތި ކުރިއެރުންތަކެއް ހޯދާފައިވާއިރު، ރައީސް ވަނީ 2011 ވަނަ އަހަރު ކުޑަކޮށް ތަރައްގީވެފައިވާ ގައުމުތަކުގެ ތެރޭގައި ރާއްޖެ ހިމެނުމުގައި ޔޫއެންޑީޕީގެ ދައުރު ފާހަގަކުރައްވައިފަ އެވެ.
"ވޭތުވެދިޔަ 45 އަހަރަށް ވުރެ ގިނަ ދުވަހުގެ ތެރޭގައި އެކުގައި ހިންގުނު ކޮންމެ މަޝްރޫއަކުންނާއި، ކޮންމެ އިސްނެގުމަކުންނާއި ކޮންމެ ކާމިޔާބަކުން ހާމަކޮށްދެނީ އަޅުގަނޑުމެން އެކުގައި ކޮށްފައިވާ މަސައްކަތުން އައިސްފައިވާ ހެޔޮ ބަދަލުތަކުގެ އަސަރު،" ރައީސް ވިދާޅުވި އެވެ.
ރައީސް ވިދާޅުވީ، ގޮންޖެހުންތައް ގިނަ ނަމަވެސް ވިލުންވެރި، އެންމެން ޝާމިލްވާ ރާއްޖެއެއް ބިނާކުރުމަށް ކުރާ ދަތުރުގައި ޔޫއެންޑީޕީ ރާއްޖެއާ އެކުގައިވާ ނަމަ، ކާމިޔާބުވާނެ ކަމުގެ ޔަގީންކަން އެބައޮތް ކަމަށެވެ.