ފްލެޓު ލިސްޓު ނެރުން ލަސްވަނީ އިންސާފުވެރިކަމާ އެކު އެކަން ކުރާތީ: ރައީސް

ފްލެޓު ލިސްޓު ނެރުން ލަސްވަނީ އިންސާފުވެރިކަމާއެކު އެ މަސައްކަތް ކުރުމަށް ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

މި ސަރުކާރަށް އެއް އަހަރު ފުރުން ފާހަގަކުރަން ސޯޝަލް ސެންޓަރުގައި ބޭއްވި ރަސްމިއްޔާތުގައި، ރައީސް ވިދާޅުވީ، ކުރީގެ ސަރުކާރުން ގެޒެޓް ކޮށްފައިވާ ލިސްޓެއް އަތުލުމަކީ ކުރައްވާނެ ކަމެއް ނޫން ކަމަށެވެ. ނަމަވެސް، ދޮގު މައުލޫމާތާއި މަކަރު ހަދައިގެން ފްލެޓު ހޯދައިފި ނަމަ ލިސްޓުން ކެންސަލްވާނެ ކަމަށާއި އެއީ އެކަން އޮންނާނެ ގޮތް ކަމަށް ވިދާޅުވި އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ހުޅުމާލެ 2 ގައި އިމާރާތްކުރަން ފެށި 4،000 ފްލެޓު ލިބޭ މީހުންގެ ލިސްޓު ރިވިއުކޮށް މިދިޔަ މަސް ނިމުމުގެ ކުރިން އާއްމުކުރާނެ ކަމަށް ކުރިން އިއުލާންކުރި އެވެ. އޭގެ ފަހުން، މި މަހުގެ ފުރަތަމަ ދެ ހަފުތާ އަދި އިއްޔެ ވެސް އެ ލިސްޓް އާއްމުކުރަން ހައުސިން މިނިސްޓްރީން މަސައްކަތްކުރި އެވެ.

އެކަމަކު، ފްލެޓު ލިބޭ ލިސްޓު އާއްމުނުކޮށް ދިގުލައިގެން ދާތީ އެ މިނިސްޓްރީއަށް ބަޔަކު އެއްވެ ވަނީ ހިތްހަމަނުޖެހުން ފާޅުކޮށްފަ އެވެ.

ރައީސް މިރޭ ވިދާޅުވީ ރަނގަޅު ތެދު މައުލޫމާތު ހުށަހަޅައިފި ނަމަ އެއްވެސް ގޯއްޗެއް އަދި ފްލެޓެއް ވެސް އަތުނުލާނެ ކަމަށާއި ހުޅުމާލެ 2 އިން ހުރިހާ ގޯއްޗެއް ވެސް ހަވާލުކުރީ އެހެންވެ ކަމަށެވެ.

ހުޅުމާލެ 3، ގުޅިފަޅު އަދި ގިރާވަރުފަޅު ހިއްކާ ނިމޭއިރަށް އެ ތަނުން ވެސް ގޯތި ހަވާލުކުރާނެ ކަމަށް އެ މަނިކުފާނު ވިދާޅުވި އެވެ.

އުސޫލާ ހިލާފަށް ބައެއް ފަރާތްތަކަށް ފްލެޓު ދިނުމަށްޓަކައި ޕޯޓަލްގެ ބެކްއެންޑުން މާކްސް ޝީޓު ބަދަލުކޮށްފައި އެބަހުރި. ދެން އެ ބޭފުޅުން ކިހާ ވަރަކަށް މިކަމާ އުޅޭނެ ނޫންތޯ؟--- ރައީސް

"ފްލެޓު ލިސްޓުގައި މި ވެގެން އުޅޭ ގޮތަކީ ހައުސިން މިނިސްޓްރީން ވަރަށް ގިނަ ވަގުތު ހޭދަކުރޭ އެކަމުގައި. އަދި އެކަމަށްޓަކައި ނަގާފައި އޮތް ކޮމެޓީތަކުން ވެސް އެކަން އޯވަސީ ކުރަމުން އެ ގެންދަނީ. އެކަން މި ކުރަނީ އެއްވެސް ފަރާތެއްގެ ނުފޫޒު އެއަށް ނުވަންނަ ގޮތަށް، އެއްވެސް ފަރާތެއްގެ ނުފޫޒެއް ނުފޯރުވޭނެ. އެކަމެއް ނުކުރެވޭނެ.

ރައީސް މުއިއްޒު ވިދާޅުވި ގޮތުގައި، އެ މަނިކުފާނު ބޭނުންފުޅު ވަނީ ނަޒާހަތްތެރިކަމާ އެކު، އެންމެ އިންސާފުވެރިކޮށް އަދި އިއުލާން ކޮށްފައިވާ ޝަރުތުތަކުގެ ތެރެއިން، ޕޮއިންޓް ނިޒާމާ އެއްގޮތަށް ތަރުތީބުން 4،000 ފްލެޓް ދޫކުރާށެވެ.

"އެ ތަރުތީބުން ލިބޭ 4،000 މީހުންނަށް އެ ފްލެޓުތައް ދެވޭނީ. ޑޮކިއުމަންޓް އޮޅުވާލައިގެން ނޫނީ އެހެން ގޮތަކުން ލާފައި އިން މީހެއް ވިއްޔާ އެއީ އަބަދު ވެސް ކެންސަލް ވާނެ ކަމެެއް، އެކަން އަޅުގަނޑު ކުރިން ވެސް ދަންނަވާފައި އޮންނާނެ،" ރައީސް ވިދާޅުވި އެވެ.

އެ މަނިކުފާނު ވިދާޅުވީ ފްލެޓު ލިސްޓުގައި ބަލަންޖެހޭ ކަންކަން ވަރަށް ގިނަ ކަމަށެވެ. އޭގެ ތެރެއިން، ކުރީގެ ސަރުކާރުން އުފެއްދި ފްލެޓު ކޮމިޓީގެ ސިޔާސީ މެމްބަރުންނަށް އުސޫލާ ހިލާފަށް ފްލެޓު ލިބޭ ގޮތަށް މާކްސް ބަދަލުކޮށްފައިވާ ކަމަށް ވިދާޅުވި އެވެ. އެކަމުގެ ތަފްސީލުތައް އާއްމުކުރާނެ ކަމަށް ރައީސް ވިދާޅުވި އެވެ.

ކުރީގެ ސަރުކާރުގެ އިސްވެރިންގެ އާއިލާ މީހުންނާއި ނުފޫޒު ގަދަ އާއިލާގައި ގިނަ ބަޔަކަށް ފްލެޓުތައް ބަހާލާފައިވާ ކަމަށް ވެސް އެ މަނިކުފާނު ވިދާޅުވި އެވެ. ޕޯޓަލް އަށް ހުށަހެޅި ލިޔުންތަކުގެ އިތުރުން ބައެއް މީހުން ހުށަހެޅި ލިޔުންތައް ބަލައިގަނެ ފްލެޓު ދީފައިވާ ކަމަށާއި ހަމައެކަނި އައިޑީ ކާޑު ހުށަހަޅައިގެން ވެސް ބައެއް މީހުންނަށް ފްލެޓު ދީފައިވާ ކަމަށް ރައީސް މުއިއްޒު ވިދާޅުވި އެވެ.

"ދެން އެ ބޭފުޅުން ކޮން ވާހަކައެއްތޯ މި ދައްކަވަނީ؟ އުސޫލާ ހިލާފަށް ބައެއް ފަރާތްތަކަށް ފްލެޓު ދިނުމަށްޓަކައި ޕޯޓަލްގެ ބެކްއެންޑުން މާކްސް ޝީޓު ބަދަލުކޮށްފައި އެބަހުރި. ދެން އެ ބޭފުޅުން ކިހާ ވަރަކަށް މިކަމާ އުޅޭނެ ނޫންތޯ؟ އެހެންވީމަ ލަސްވަނީ [ލިސްޓު ނެރުން]. އެހެންވީމާ ލަސްވާނެ ދެއްތޯ. މި ހުރިހާ ކަމެއް ބަލާފައި އިރާދަކުރެއްވިއްޔާ އަޅުގަނޑުމެން މިކަން ނިންމަދޭނަން އިންސާފުވެރިކަމާ އެކު." ރައީސް ވިދާޅުވި އެވެ.