ލިބިދާނެ މާލީ ފައިދާއަށްޓަކައި ގައުމުގެ އިސްތިގުލާލު ގުރުބާން ކޮށްގެން ނުވާނެ ކަމަށް ވިދާޅުވެ، ބިދޭސީންނަށް ރާއްޖޭގެ ބިންތައް މިލްކު ކުރުމާ ޕީޕީއެމްގެ މަޑުއްވަރީ ދާއިރާގެ މެމްބަރު މުހައްމަދު އަމީތު މިރޭ ދެކޮޅު ހައްދަވައިފި އެވެ.
މީގެ އިރުކޮޅެއް ކުރިން ކުރެއްވި ޓްވީޓެއްގައި އަމީތު ވިދާޅުވީ "ލިބިދާނެ މާލީ ފައިދާއަކަށް ގައުމުގެ އިސްތިގުލާލު ގުރުބާން ވެދާނެ ކަމެއް ކޮށްގެން ނުވާނެ" ކަމަށެވެ.
ނަމަވެސް އޭނާގެ މި ޓްވީޓާ ގުޅޭ ތަފުސީލެއް އަދި ނުލިބެ އެވެ.
އަމީތު އަކީ ބިދޭސީންނަށް ބިން މިލްކު ކުރެވޭ ގޮތަށް ގާނޫނުއަސާސީ އަށް ގެނައި އިސްލާހަށް ވޯޓު ދެއްވި ބޭފުޅެކެވެ.
ސަރުކާރާ ސިޔާސަތަކާ ދެކޮޅަށް އަމީތު ފުރަތަމަ ފަހަރަށް ވާހަކަ ދެެއްކެވިއިރު، ޕީޕީއެމްގެ ކައުންސިލުން އޭނާ ވަނީ މީގެ ދުވަސްކޮޅެއް ކުރިން އިސްތިއުފާ ދެއްވައިފަ އެވެ. ކައުންސިލުން ވަކިވެވަޑައިގަތީ ވެސް ޕީޕީއެމްގެ އެތެރޭގެ ކޯޅުން ބޮޑުވުމާ އެކު، ކައުންސިލްގެ ބައްދަލުވުމަށް ވަޑައިނުގަންނަވާތާ ދުވަސްކޮޅެއް ފަހުންނެވެ.
އަދި ޕީޕީއެމްގެ ރައީސް މައުމޫނާއި ރައީސް ޔާމީނާ ދެ ބޭފުޅުންގެ ކޯޅުން އެންމެ ބޮޑުވި ވަގުތު އަމީތު ހިމޭނުން ހުންނެވިކަން ފާހަގަކުރެވެ އެވެ. އެކަމަކު ޕީޕީއެމްގެ މުސްތަޝާރު އަދި ރައީސް ޔާމީންގެ ފެކްޝަންގެ ބައެއް ޖަލްސާތަކުގައި އޭނާ ފަހަކަށް އައިސް ބައިވެރިވެވަޑައިގަންނަވަމުން ގެންދެވި އެވެ.
ރައްޔިތުންގެ މަޖިލީހުގެ ޕީޕީއެމްގެ މެމްބަރުންގެ ތެރެއިން އަށެއްކަ މެމްބަރުން މީގެ ކުރިން މައުމޫންގެ ފެކްޝަނާ ވެސް ގުޅިވަޑައިގަތެވެ. އެކަމަކު ތަފާތު ފިއްތުންތަކާ ގުޅިގެން އޭގެ ތެރެއިން ގިނަ މެމްބަރުން ވަނީ ރައީސް ޔާމީންގެ ފެކްޝަނާ އަލުން ގުޅިވަޑައިގެންފަ އެވެ. މައުމޫނާ އެކު މިހާރު ތިއްބެވީ ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހީމް (ލޯޔަރު ވައްޑެ) އާއި ތިމަރަފުށި ދާއިރާގެ މެމްބަރު މުހައްމަދު މުސްތަފާ އާއި ނޮޅިވަރަމް ދާއިރާގެ އެމްޑީއޭގެ މެމްބަރު ހުސެއިން އަރީފު އަދި މައުމޫންގެ ދަރިކަލުން ދިއްގަރު ދާއިރާގެ އަހުމަދު ފާރިސް އެވެ.
ސަރުކާރުގެ ނިންމުމަކާ ދެކޮޅަށް އަމީތު ކުރެއްވި ކުއްލި ޓްވީޓާ އެކު، ދެން އޭނާ އަމަލު ކުރައްވާނެ ގޮތެއް ނޭނގެ އެވެ.
ލިބިދާނެ މާލީ ފައިދާއަކަށް ގައުމުގެ އިސްތިގުލާލު ގުރުބާން ކޮށްގެން ނުވާނެ ކަމަށް އަމީތު ވިދާޅުވިއިރު، ފ. އަތޮޅުގައި ތަރައްގީގެ ބިޔަ މަޝްރޫއެެއް ހިންގުމަށް ސައޫދީ އަށް ވިއްކާލަން އުޅޭ ކަމަށް ބުނެ އެކަން ވަނީ ބޮޑު މައްސަލަ އަކަށް ވެފަ އެވެެ. އެކަމަކު ސަރުކާރުން އެ ވާހަކަތައް ދޮގުކުރެ އެވެ. ރައީސް ޔާމީން ވިދާޅުވެފައި ވަނީ ފ. އަތޮޅުގައި ހިންގާނީ 10 ބިލިއަން ޑޮލަރުގެ މަޝްރޫއެއް ކަމަށެވެ.