ޓޫރިސްޓް ވިސާގައި ރާއްޖެ އެތެރެވެ، މާލެ ތެރޭގައި ވިޔަފާރިކޮށް، އާއްމު ތަންތަނުގައި ނިދައި އުޅުނު ޓޫރިސްޓަކު އިމިގްރޭޝަނުން އިއްޔެ ހިފަހައްޓައިފި އެވެ.
އިމިގްރޭޝަނުން އެ އަންހެން މީހާ އެ އިދާރާގެ ބެލުމުގެ ދަށަށް ގެންދިޔައީ، ވިޔަފާރިކޮށް، އެކި ތަންތަނުގައި ނިދާފައި އޮންނަ ޝަކުވާތަކާ ގުޅިގެންނެވެ.
އިމިގްރޭޝަނުން ބުނި ގޮތުގައި އެއީ، ކުއިޕިން ފެންގު ނަމަކަށް ކިޔާ 33 އަހަރުގެ އަންހެނެކެވެ. އެނގިފައިވާ ގޮތުގައި ޗައިނާގެ އެ އަންހެން މީހާއަށް ވާހަކައެއް ނުދެއްކެ އެވެ. އަދި މީހުން ދައްކާ ވާހަކަ އަޑެއް ވެސް ނީވެ އެވެ.
މިދިޔަ ހަފުތާ ބަންދުގައި އޭނާ މާލޭގެ ބައެއް ކެފޭ/ރެސްޓޯރެންޓުތަކަށް ވަދެ، ތަޅުދަނޑި ފަތިތަކެއް ވިއްކަން އުޅުނެވެ.
އިމިގްރޭޝަނުން ވަނީ ވިސާއާ ހިލާފުވާނަމަ ހަރުކަށި ފިޔަވަޅު އަޅާނެ ކަމަށް ބުނެފަ އެވެ. އަދި އެފަދަ ކަމެއް ހިނގާނަމަ ރިޕޯޓުކުރުމަށް ވެސް ވަނީ އެދިފަ އެވެ. އިމިގްރޭޝަނުން ވަނީ ބިދޭސީން ވިސާއާ އެއްގޮތަށް އުޅޭތޯ ބެލުމަށް ވަރުގަދަ އޮޕަރޭޝަނެއް ފަށައިފަ އެވެ. އޭގެ ތެރެއިން، ވިސާ ނެތި އުޅެމުން ދިޔަ މީހުންނާއެކު 5،000 އެއްހާ ބިދޭސީން ވަނީ ޑީޕޯޓުކޮށްލައިފަ އެވެ.