ޖާހު ކުންފުނީގެ ފްލެޓްތަކުގެ މައްސަލަ ހައްލުކޮށްދިނުމަށް އެދި ރައީސަށް ބޮޑު ސިޓީއެއް

ނުނިމި ލަސްވަމުންދާ ޖާހު ކުންފުނީގެ ފްލެޓްތަކުގެ މައްސަލަ ހައްލުކޮށްދިނުމަށް އެދި ރައީސް ޑރ. މުހައްމަދު މުއިއްޒަށް "ބޮޑު" ސިޓީއެއް އިއްޔެ ފޮނުވައިފި އެވެ.

ޖާހު އިންވެސްޓްމަންޓްގެ "ދަ ގާޑަން" އަކީ 2017 ވަނަ އަހަރުން ފެށިގެން މަސައްކަތް ކުރަމުން އަންނަ ތަނެކެވެ. ދެ އަހަރުގެ ތެރޭގައި ނިންމަން ހަވާލުކުރި އެ ފްލެޓްތަކުގެ މަސައްކަތް ހަތް އަހަރުވީއިރު ވެސް ނުނިމޭތީ، އެތަނުން އެޕާޓްމަންޓް ގަތް މީހުން ދަނީ ކަންބޮޑުވުން ފާޅުކުރަމުންނެވެ.

އެ މައްސަލައިގައި ހިމެނޭ މީހުން ތަމްސީލުކުރާ ލޯ ފާމް ކަމަށްވާ ޝުނާނާ އެންޑް ކޯ އިން ރައީސަށް ފޮނުވި ސިޓީގައިވަނީ އެޗްޑީސީން ރިއަލް އެސްޓޭޓް ކުންފުނިތަކާ ހަވާލުކޮށްގެން ކުރިއަށް ގެންދާ ބޯހިޔާވަހިކަމުގެ މަޝްރޫއުތަކުގައި އިހުމާލުތަކުގެ ސަބަބުން އެތައް ބަޔަކަށް ގެއްލުންތައް ލިބެމުންދާ ކަމަށެވެ.

ފްލެޓުތައް ވިއްކަން ބޮޑެތި އަދަދުން ފައިސާ ނަގާފައިވާއިރު، އާއްމުންނަށް ގެއްލުން ނުވާނެ ގޮތަށް މަޝްރޫއު ކުރިއަށް ދޭތޯ ބެލުމަކީ އެޗްޑީސީގެ ޒިންމާއެއް ކަމަށާއި އަދި އެޗްޑީސީ އާއި ރިއަލް އެސްޓޭޓް ކުންފުނިތަކާއެކު ވެފައިވާ އެއްބަސްވުންތަކުގައި އެކަން ހައްލު ކުރެވޭނެ ނިޒާމެއް ބަޔާންކޮށްފައިވާ ކަމަށް އެ ސިޓީގައިވެ އެވެ. ނަމަވެސް ޖާހު ކުންފުނީގެ ފްލެޓްތަކުގެ މައްސަލާގައި އެގޮތަށް އަމަލުކުރަމުން ނުދާތީ އެ ސިޓީގައިވަނީ ކަންބޮޑުވުން ފާޅުކޮށްފަ އެވެ.

އެ ސިޓީގައިވަނީ އެއްބަސްވުންތަކާ އެއްގޮތަށް ފްލެޓުތައް ނުނިންމާނަމަ އެގްރިމެންޓު ބާތިލްކޮށް އެހެން ކުންފުންޏަކާ ހަވާލު ކުރެވޭނެ ކަމަށް، އެއްބަސްވުންތަކުގައި ބުނާ ކަމަށެވެ. އަދި ފްލެޓުތައް ނިންމަން އެހެން ކުންފުންޏަކާ ހަވާލުކުރަން ޖެހުމުން އެޗްޑީސީއަށް ލިބޭ ގެއްލުމަށް އެ ކުންފުނިތަކުން ޒިންމާވާން ޖެހޭނެ ކަމަށާއި އަދި އެއްބަސްވުން ބާތިލް ކުރާއިރު އެ ކުންފުނިތަކަށް އެއްވެސް މާލީ ބަދަލެއް ދޭން ނުޖެހޭނެ ކަމަށް ވެސް އެގްރިމެންޓުގައި ބުނާ ކަމަށް އެ ސިޓީގައިވެ އެވެ.

ނަމަވެސް ފްލެޓްތަކުގެ މަސައްކަތް ނުނިމި ދިގުލައިގެން ދާއިރު ވެސް، އެޗްޑީސީން މުއްދަތު އިތުރު ކުރަމުންދާ ކަމަށް އެ ސިޓީގައިވެ އެވެ.

"ހައުސިން ޑިވެލޮޕްމަންޓް ކޯޕަރޭޝަނުން އަޅަންޖެހޭ އެކަށީގެންވާ ފިޔަވަޅެއް އެޅުމެއް ނެތި ފްލެޓުތައް ނިންމުމަށް ދީފައިވާ މުއްދަތު އެކި ފަހަރު އިތުރުކުރަމުން ދިއުމަކީ ހައުސިން ޑިވެލޮޕްމަންޓް ކޯޕަރޭޝަން މައްޗަށް މަތިކޮށްފައިވާ ޒިންމާއާ ހިލާފު ކަމެކެވެ،" ސިޓީގައިވެ އެވެ.

ޖާހު ކުންފުނީގެ ފްލެޓުތައް ނުނިމި ދިގުލައިގެން ދިޔައީ ކޮވިޑް-19 ގެ ހާލަތާ ހެދި ދިމާވި ދަތިތަކާ ހެދި ކަމަށް ޖާހު ކުންފުނިން ކުރިން ބުނި ކަމަށް ސިޓީގައި ބުންޏެވެ. ނަމަވެސް، ކޮވިޑްގެ ހާލަތު އައީ ފްލެޓު ނިންމަންޖެހޭ މުއްދަތަށް ވުރެ އެތައް މަސްތަކެއް ފަހުން ކަމަށާއި އަދި ގިނަ މީހުން ފްލެޓަށް ފައިސާ ދައްކާފައިވަނީ ލޯނު ނަގައިގެން ކަމަށްވާތީ، ފްލެޓު ހަވާލު ކުރުން ލަސްވުމަކީ އެ މީހުންނަށް ވެސް ލިބޭނެ ގެއްލުމެއް ކަމަށް ބުންޏެވެ.

ފްލެޓު ހަވާލުކުރަން ދީފައިވާ ފުރަތަމަ މުއްދަތު ހަމަވުމުން އެ ކުންފުނީގައި ފްލެޓުގެ މަސައްކަތް ނިންމޭނެ މާލީ ގާބިލްކަން ހުރިތޯ ބަލައި ކަށަވަރުކޮށްފައި ނެތުމަކީ ވެސް އެޗްޑީސީގެ އިހުމާލެއް ކަމަށް އެ ސިޓީގައިވެ އެވެ.

ފްލެޓު ހަދަން ބޭރުން ގެނައި މުވައްޒަފުންނަށް މުސާރަ ނުދޭތީ މަސައްކަތް ހުއްޓާލައި، މުޒާހަރާކޮށް ކަމާބެހޭ އިދާރާތަކަށް މައްސަލަ ހުށަހަޅާފައިވާ ކަމަށް ވެސް ސިޓީގައިވެ އެވެ. ނަމަވެސް، އެ މައްސަލައިގައި އެޗްޑީސީން ޖާހު ކުންފުންޏާ ދެކޮޅަށް އެކަށީގެންވާ ފިޔަވަޅެއް އަޅާފައި ނުވާއިރު، ފްލެޓު ގަތުމަށް ފައިސާ ދެއްކި މީހުންގެ ހައްގުތައް ހިމާޔަތް ކުރުމުގައި އިހުމާލުވެފައިވާ ކަމަށް އެ ސިޓީގައިވެ އެވެ.

"ޖާހު އިންވެސްޓްމަންޓާ މެދު ފިޔަވަޅު އެޅުމެއް ނެތި، ރައްޔިތުންނަށް މި ދެމުންދާ ބޮޑު ގެއްލުން ހުއްޓާލުމަށްޓަކައި މަސައްކަތް ކޮށްފައިނުވެ އެވެ. މިކަމުގައި ހައްލެއް ހޯދުމަށް މަނިކުފާނުގެ ކިބައިން އެދެން ޖެހުނީ މި މައްސަލަ ކަމާބެހޭ މުއައްސަސާތަކަށް ހުށަހެޅުމަށްފަހު ހައްލެއް ނުލިބި ދެ އަހަރު ދުވަސްވެފައިވާތީ އެވެ،" އެ ސިޓީގައިވެ އެވެ.

އެހެންވެ، ފްލެޓު ގަތުމަށް ފައިސާ ދައްކާފައިވާ މީހުންގެ ހައްގުތައް ހިމާޔަތްކުރުމަށް ފްލެޓުތައް ނިންމޭނެ ގޮތަކާއި ގެއްލުމުގެ ބަދަލު ލިބޭނެ ގޮތް ހަދައިދިނުމަށް އެ ސިޓީގައި އެދިފައިވެ އެވެ.

އެޗްޑީސީން އޮކްޓޯބަރު، 2023 ގައި ބުނެފައިވަނީ ޖާހު ކުންފުނީގެ ފްލެޓްތަކުގެ 10 ވަނަ ފްލޯއިން ތިރީގެ ހުރިހާ ފްލޯތަކުގެ ފިނިޝިން މަސައްކަތް ފަށާފައިވާ ކަމަށެވެ. އޭގެ ތެރޭގައި ހިމެނެނީ ޕްލާސްޓަރިން އާއި ޕުޓީގެ މަސައްކަތާއި މުށި އަދި ސީލިންގުގެ މަސައްކަތްތަކެވެ. އަދި އެ އިމާރާތުގައި ނުނިމި ހުރިހާ މަސައްކަތްތަކެއް ވެސް ހަ މަސް ދުވަހުގެ ތެރޭގައި ނިންމާލެވޭނެ ކަމަށް އެޗްޑީސީން އޭރު ބުނެފައިވެ އެވެ.

އޭރު ހަދަމުންދިޔަ 83 އެޕާޓްމަންޓްގެ ފެލްޓްތައް 30 ދުވަހުގެ ތެރޭގައި ނިންމައި، އާބަންކޯ އަށް ބިމުގެ އަގު ދައްކަން 30 ދުވަހުގެ ނޯޓިސް ވެސް އޭރު ދިނެވެ. އެކަމަކު މުއްދަތު ހަމަވިއިރު ފައިސާ ނުދައްކާފައި ނުވާއިރު، މަސައްކަތް ވެސް ނުނިންމަ އެވެ.

މިކަމުގައި އެޗްޑީސީ އަދި ޖާހުގެ ބަހެއް އަދި ނުލިބެ އެވެ.