ރަސްގެތީމާއި އަނގޮޅިތީމުގެ ތަރައްގީގެ މަޝްރޫއުތައް މިއަހަރު ފަަށައި ނިންމައިދޭނަން: ރައީސް

ރ. އަނގޮޅިތީމާއި އެ އަތޮޅު ރަސްގެތީމުގެ ރައްޔިތުންނަށް ރިޔާސީ އިންތިހާބުގެ ދުވަސްވަރު ވެވަޑައިގަތް ތަރައްގީގެ މަޝްރޫއުތައް މި އަހަރުގެ ތެރޭގައި ފަށައި ނިންމުމަށް މަސައްކަތްޕުޅު ކުރައްވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރ. އަތޮޅުގެ 11 ރަށަކަށް މިއަދު ފެއްޓެވި ދަތުރުފުޅުގައި އެ ދެ ރަށަށް ވަޑައިގެން ރައީސް ވިދާޅުވީ މިދިޔަ އަހަރު ތަރައްގީގެ މަޝްރޫއުތައް ކުރިއަށް ނުގެންދެވުނީ ރާއްޖެއަށް ދިމާވި އިގްތިސާދީ ދަތިތަކުގެ ސަބަބުންނާއި ބަޖެޓުގެ ތާށިކަމާ ހެދި ކަމަށެވެ.

އެކަމަކު މި އަހަރު ވާނީ އަނގޮޅިތީމާއި ރަސްގެތީމަށް އެ މަނިކުފާނު ވެވަޑައިގަތް އެކި މަޝްރޫއުތައް ހިންގަވާނެ އަހަރަކަށް ކަމަށް ރައީސް ވިދާޅުވި އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ފެށި ފެނާއި ނަރުދަމާގެ މަޝްރޫއުގެ މަސައްކަތް އަނގޮޅިތީމުގައި ވަނީ ހުއްޓިފަ އެވެ. އެކަމަކު، ރައީސް މުއިއްޒު މިއަދު ވިދާޅުވީ އެ މަސައްކަތް އަލުން ފަށައި އެ މަޝްރޫއު ވެސް ނިންމަވައި ދެއްވާނެ ކަމަށެވެ.

މަގު ހެދުމުގެ މަޝްރޫއު ކުރިއަށް ގެންދަވާނީ އެ މަޝްރޫއަށް ފަހު ކަމަށް ވިދާޅުވި އެވެ.

ރައީސް ވަނީ މޫދަށް އެރޭ ސަރަހައްދެއް ހެދުމާއި ބަނދަރުގެ މަސައްކަތުގެ އިތުރުން އެ ރަށުގައި ހޭންޑްބޯލް ކޯޓެއް ވެސް އަޅުއްވައިދެއްވާނެ ކަމަށް ވިދާޅުވެފަ އެވެ.

އެމަނިކުފާނު ވިދާޅުވީ ސިއްހީ ދާއިރާ އާއި ތައުލީމީ ދާއިރާ އަށް އޮތީ މީގެ ކުރިން އިހުމާލުވެފައި ކަމަށެވެ. އެކަމަކު، މި އަހަރުގެ ބަޖެޓުގައި އެކަމަށް ހާއްސަ އިސްކަމެއް ދެއްވައި، އެ ދާއިރާތައް ތަަރައްގީ ކޮށްދެއްވާނެ ކަމަށް ވިދާޅުވި އެވެ.

މިއަދު މެންދުރެއްހާއިރު ރަސްގެތީމުގެ ރައްޔިތުންނާ ބައްދަލުކުރައްވައި ރައީސް ވަނީ އެއީ އާބާދީ ކުޑަ ރަށެއް ނަމަވެސް އެހެން ރަށްރަށެކޭ އެއްގޮތަށް ތަފާތު ކުރުމެއް ނެތި ތަރައްގީގެ މަޝްރޫއުތައް ކުރިއަށް ގެންގޮސްދެއްވާނެ ކަމަށް ވިދާޅުވެފަ އެވެ.

"އަޅުގަނޑު ދެންނެވި ހުރިހާ ކަމެއްހެން މި އަހަރު ތެރޭގައި ފަށައި ގިނަ ކަންކަން ނިންމައި ދިނުމަކީ ސަރުކާރުގެ ޕްލޭނަކީ އަދި އަޒުމަކީ ވެސް،" ރައީސް ވިދާޅުވި އެވެ.

ރައީސް ވިދާޅުވިގޮތުގައި، ކުޅިވަރުގެ ދާއިރާ އިން އެކި ކަންކަން ކޮށްދެއްވުމާއި ކުނި މެނޭޖު ކުރުމާއި ފެނާއި ނަރުދަމާ އާއި މަގުތައް ހެދުން ފަދަ ކަންކަން އެ މަނިކުފާނު ރަސްގެތީމަށް ވައުދުވެވަޑައިގެންފައިވާ ކަމަށެވެ. އަދި ރާއްޖޭގެ ރަށްތަކަށް ދިމާވެފައިވާ ކަރަންޓުގެ މައްސަލަ ހައްލު ކޮށްދެއްވުމަށް ވެސް މަސައްކަތްޕުޅު ކޮށްދެއްވާނެ ކަމަށާއި ރަށްރަށުގެ ހެލްތު ސެންޓަރުތައް ތަރައްގީކުރުމަކީ ވެސް ވެވަޑައިގެންފައިވާ ވައުދެއް ކަމަށް ވިދާޅުވި އެވެ.

ކައުންސިލާ އެކު ބޭއްވުނު މަޝްވަރާތަކަށް ފަހު ރައީސް ވިދާޅުވީ މި އަހަރު އިސްކަމެއް ދީގެން އެ މަޝްރޫއުތައް ފަށައި ނިންމުމަށް މަސައްކަތް ކުރައްވާނެ ކަމަށެވެ. އެ ކަންކަމާ ގުޅޭ މިނިސްޓަރުން މި ދަތުރުފުޅުގައި އެ މަނިކުފާނާ އެކު ބައިވެރިވެވަޑައިގަންނަވާ ސަބަބަކީ ވެސް އެއީ ކަމަށް ރައީސް މުއިއްޒު ވިދާޅުވި އެވެ.

"މިއަހަރުގެ ކުރިއަށް އޮތް ދުވަސްތަކުގައި މި ކަންކަމަށް ވަރަށް އިސްކަން ދީގެން ފެށި އަދި ނިންމަދޭނެ ކަމުގެ ޔަގީންކަން އަޅުގަނޑު އަރުވަން. އަޅުގަނޑާ އެކު މި ދަތުރުގައި އެބަ ބައިވެރިކުރުވަން އެކަންކަމަށް ޒިންމާވާ ވަޒީރުން،" ރައީސް ވިދާޅުވި އެވެ.

ރަސްގެތީމަށް ވަޑައިގެން ރައީސް ވަނީ އެ ރަށުގެ އާ ކައުންސިލް އިމާރާތް ވެސް ހުޅުއްވައި ދެއްވައިފަ އެވެ. އަދި ދެ ރަށުގައި ވެސް ބީއެމްއެލްގެ އޭޓީއެމެއް އެޅުމަށް ކައުންސިލާއި ބީއެމްއެލްއާ ދެމެދު އެއްބަސްވުމެއްގައި ސޮއިކުރި އެވެ.