ކުރިއަށް އޮތް ދެ އަހަރު ވެސް ގައުމީ ދުވަސް އުތީމުގައި ފާހަގަކުރަން ރައީސް ނިންމަވައިފި

ދެ އަހަރަށް ދެމިގެންދާ މަޝްރޫއުއެއް ގޮތަށް ހއ. އުތީމުގައި ގައުމީ ދުވަސް ފާހަގަކުރަން ރައީސް ޑރ. މުހައްމަދު މުއިއްޒު ނިންމަވައިފި އެވެ.

ހއ. އަތޮޅަށް ކުރައްވާ ދަތުރުފުޅުގައި އުތީމަށް ވަޑައިގެން ރައްޔިތުންނާ ބައްދަލުކުރައްވައި ރައީސް ވިދާޅުވީ އެ ރަށަށް ވަޑައިގެންނެވުމުން ހާއްސަ އިހުސާސުތަކެއް ކުރެއްވޭ ކަމަށެވެ. ރައީސް ވިދާޅުވި ގޮތުގައި އެއީ އެއީ ގައުމީ އިހުސާސުތަކެކެވެ.

އެ މަނިކުފާނު ވިދާޅުވި ގޮތުގައި، އުތީމުގައި ގައުމީ ދުވަސް ފާހަގަކުރުމަކީ ކޮންމެ ދައުރެއްގައި ވެސް ކޮންމެވެސް އެއް އަހަރަކު އެ އިރެއްގައި އޮންނަ ސަރުކާރަކުން ކުރަމުން އަންނަ ކަމެއް ނަމަވެސް އެގޮތާ ހިތްހަމަ ޖެހި ވަޑައިނުގަންނަވާ ކަމަށެވެ. އެހެންވެ އެ ރަށުގައި ގައުމީ ދުވަހަކީ ގައުމީ މަޝްރޫއެއް ގޮތަށް ފާހަގަކުރަން ނިންމަވާފައިވާ ކަމަށް ރައީސް ވިދާޅުވި އެވެ.

"އަޅުގަނޑު ގަސްދުކުރަނީ މިއީ މަޝްރޫއުއެއް ގޮތަށް ކުރިއަށް ގެންދަން. މި މަރުކަޒާއި ގަނޑުވަރާއި އަދި މި ރަށުގައި މި ހުރި ތާރީހީ ތަންތަން ހިމަނައިގެން" ރައީސް ވިދާޅުވި އެވެ.

އެ ނިންމެވުމާ އެކު މި އަހަރާއި އަންނަ އަހަރު، ރަސްމީ ގޮތުން ގައުމީ ދުވަސް ފާހަގަކުރާނެ ރަށަކަށް އުތީމު ހަމަޖައްސަވާފައިވާކަން ރައީސް އިއުލާނު ކުރެއްވި އެވެ.

ހއ. އުތީމަކީ ޕޯޗްގީޒުންގެ އަތްދަށުން ރާއްޖެ ސަލާމަތްކުރި ޖިހާދުގެ ތިން ބަތަލުން ނިސްބަތްވާ ރަށެވެ. މި ރަށުގެ އެންމެ ޚާއްސަ ތަނަކީ ޕޯޗްގީޒުންނާ ދެކޮޅަށް ޖިހާދުކުރެއްވުމުގައި އިސްކޮށް ހުންނެވި ބޮޑުތަކުރުފާނުގެ ގެކޮޅު ކަމަށްވާ، 16 ވަނަ ގަރުނުގައި ބިނާކޮށްފައިވާ "އުތީމު ގަނޑުވަރު" އެވެ.

ގައުމީ ދުވަސް ފާހަގަކުރަނީ ބޮޑުތަކުރުފާނުގެ ޖިހާދުގެ ޒިކުރާ އާކުރުމަށް، ރަބީއުލް އައްވަލް މަހުގެ 1 ވަނަ ދުވަހު އެވެ.