ސްވައިން ފުލޫ ޖެހިގެން ހާލު ސީރިއަސްވި މާބަނޑު މީހާގެ ދަރިފުޅު ސިޒޭރިއަން ހަދައިގެން މިރޭ ނަގައިފި އެވެ.
އައިޖީއެމްއެޗުގެ އޮފިޝަލަކު މިރޭ ވިދާޅުވީ ސިޒޭރިއަން ހަދައިގެން ދަރިފުޅު ނެގީ އަންހެން މީހާގެ ހާލު ސީރިއަސްވެގެން ކަމަށެވެ. ކުޅުދުއްފުށިން ގެނައި އެ އަންހެން މީހާ އޮތީ ވެންޓިލޭޓަރެއްގަ އެވެ.
އޮފިޝަލް ވިދާޅުވީ އަންހެން މީހާގެ ހާލު އިތުރަށް ގޯސް ނުވާ ކަމަށާއި ރަނގަޅު ވެސް ވަމުން ނާންނަ ކަމަށެވެ. ދަރިފުޅުގެ ހާލަތާ ބެހޭ ގޮތުން ހޮސްޕިޓަލުން ވަކި އެއްޗެއް ނުބުނެ އެވެ. އެހެން ނަމަވެސް އެނގިފައިވާ ގޮތުގައި ފަސް މަހުގައި ނެގި ދަރިފުޅަށް އައިޖީއެމްއެޗުގައި އަންނަނީ ފަރުވާ ދެމުންނެވެ.
މި އަންހެން މީހާ އަކީ، މިހާރު ރާއްޖޭގައި ހަލުއިކަމާ އެކު ފެތުރެމުންދާ ރޯގާގައި މި ވަގުތު އޮތް އެންމެ ހާލު ބޮޑު ބަލި މީހާ ކަމަށް ކަމާ ބެހޭ ފަރާތްތަކުން ރޭ ވަނީ ބުނެފަ އެވެ.