ތެލެސީމިއާ ސެންޓަރުގެ ހިންގުން މާލޭ ގްރޫޕް އޮފް ހޮސްޕިޓަލްގެ ދަށަށް ބަދަލުކުރަން ނިންމައިފި

ތެލެސީމިއާ ސެންޓަރުގެ ހިންގުން މާލެ ހޮސްޕިޓަލް ގްރޫޕަށް ބަދަލުކުރާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

"ރައްޔިތުންނާ އެކު" ނަމުގައި ރައީސް އޮފީހުން ގެންދާ ޕޮޑްކާސްޓުގައި އެ މަނިކުފާނު މިއަދު ފާހަގަކުރެއްވި ގޮތުގައި، ތެލެސީމިއާ ކުދިންގެ ކަންބޮޑުވުންތަކަށް ހައްލު ހޯދަން ޖާގަ ތަނަވަސް އާ އިމާރާތަކަށް ބަދަލުކޮށް މިއަދު ބޭނުންކުރަން މިހާރު ވަނީ ފަށައިފަ އެވެ. އެކަމަށް ބޭނުންވާ ހުރިހާ ވަސީލަތްތައް ހޯދަން ފިނޭންސް މިނިސްޓްރީއަށް އަންގާފައިވާ ކަމަށް ރައީސް ވިދާޅުވި އެވެ.

ރައީސް ވިދާޅުވީ، ހުޅުމާލެ 1 ގެ "އޮރެންޖު ހިޔާ" އަށް ބަދަލުކުރި ތެލެސީމިއާ ސެންޓަރަށް އިތުރު 12 މުވައްޒަފުން ނަގައި، ތަން ހިންގާ ގޮތް ރަނގަޅު ކުރަމުން އަންނަ ކަމަށް ވިދާޅުވި އެވެ.

ތެލެސީމިއާ ސެންޓަރު މިހާތަނަށް ހިންގީ ހެލްތު މިނިސްޓްރީގެ ދަށުންނެވެ. އެކަމަކު، ހޮސްޕިޓަލެއް ގޮތަށް އެ ތަން ހިންގަން މާލެ ހޮސްޕިޓަލްސް ގްރޫޕުގެ ދަށަށް ބަދަލުކުރަން ނިންމާފައިވާ އެ މަނިކުފާނު ވިދާޅުވި އެވެ.

"މިއީ ވަރަށް މުހިއްމު ބޭނުމެއްގައި ކުރާ ކަމެއް. ތަނުގެ ފަރާތުން ތެލެސީމިއާ ކުދިންނަށް ދޭ ހިދުމަތް ރަނގަޅު ކުރުމަށް ވަރަށް މުހިއްމު ކަމެއްގެ ގޮތުގައި އެ ކުދިންގެ ފަރާތުން ވެސް އަޅުގަނޑަށް ލިބުނު ހިޔާލެއް މިއީ. އަޅުގަނޑު ވިސްނާލާއިރު ވެސް ރަނގަޅު ކަމެއް މިއީ،" ރައީސް މުއިއްޒު ވިދާޅުވި އެވެ.

ވަކި ބޯޑެއްގެ ދަށުން ރައީސް އުފައްދަވާފައިވާ މާލެ ގްރޫޕު އޮފް ހޮސްޕިޓަލްސްގެ ދަށުން މި ވަގުތު ހިންގަނީ އައިޖީއެމްއެޗާއި ހުޅުމާލެ ހޮސްޕިޓަލާއި ވިލިމާލެ ހޮސްޕިޓަލެވެ.

ރައީސް ވިދާޅުވީ އެ ގްރޫޕުގެ ދަށަށް ތެލެސީމިއާ ސެންޓަރު ބަދަލުކުރުމުން އެ ކުދިންނަށް ވަރަށް ރަނގަޅު ފައިދާތަކެއް ވާ ކަމަށެވެ. އޭގެ ތެރޭގައި ސްޕެޝަލިސްޓު ޑޮކްޓަރުންނަށް ދެއްކުމުގައި ފަސޭހަތަކެއް ވާނެ ކަން ފާހަގަކުރެއްވި އެވެ.

އިދާރީ ބަދަލުތައް ގެނައުމުގެ މަސައްކަތް ކުރަމުން އަންނަ ކަމަށާއި ކުރިއަށް އޮތް 10 ދުވަހުގެ ތެރޭގައި، ބްލަޑް ސާވިސްގެ ކަންކަމާ މާލެ ސިޓީ ގްރޫޕު އޮފް ހޮސްޕިޓަލުން ހަވާލުވާނެ ކަމަށް ރައީސް ވިދާޅުވި އެވެ.