72 ކިލޯ ޑްރަގް މައްސަލަ: ކުށް ސާބިތުނުވި މައްސަލަ އިސްތިއުނާފުކުރަން އިތުރު ވަގުތު ދީފި

ރާއްޖެ އެތެރެކުރަނިކޮށް އަތުލައިގަތް 72 ކިލޯގެ މަސްތުވާތަކެތީގެ މައްސަލައިގައި ދައުލަތުން ދައުވާކުރި ސ. ހުޅުދޫ ދޭލިއާގޭ އިރުފާން ތަގިއްޔު އާއި އިތުރު ދެ މީހެއްގެ މައްޗަށް ކުށް ސާބިތުނުވި މައްސަލަ އިސްތިއުނާފުކުރުމުގެ މުއްދަތު ހަމަވުމުން އިތުރު ވަގުތު ދީފައިވާ ކަމަށާއި އެހެންވެ ހައި ކޯޓުގައި އިސްތިއުނާފުކުރުމުގެ މަސައްކަތް ކުރަމުން އަންނަ ކަމަށް ޕްރޮސިކިއުޓާ ޖެނަރަލްގެ އޮފީހުން ބުނެފި އެވެ.

ޑިސެމްބަރު 2020 ގައި ކަނޑުމަގުން ރާއްޖެ އެތެރެކުރަނިކޮށް އަތުލައިގަތް 72 ކިލޯގެ ޑްރަގް މައްސަލައިގައި އެންމެ އިސް މީހެއްގެ ގޮތުގައި ތުހުމަތު ކުރެވޭ އިރުފާން ތަގިއްޔުއަށް އުފުލީ ޑައިފޯމިން ޓްރެފިކް ކުރުމުގެ ކުށުގެ ދައުވާ އެވެ. އޭނާގެ އިތުރުން ދެން ދައުވާ އުފުލީ އަހްމަދު ނަސީރު، އަނބުގަސްދޮށުގެ، ދ. މާއެނބޫދޫ އާއި މުހައްމަދު އަކްރަމް، ހ. ގާޑްންބިޔުޓީގެ މައްޗަށެވެ.

މި ތިން މީހުންގެ މައްޗަށް ވެސް ކުށް ސާބިތުނުވާ ކަމަށް ކްރިމިނަލް ކޯޓުން މި އަހަރުގެ ޖެނުއަރީ މަހު ހުކުމްކޮށްފައިވެ އެވެ. އެގޮތަށް ހުކުމްކުރީ ދައުލަތުން ހުށަހެޅި ހެކިތަކުން، ދޯނިން މަސްތުވާތަކެތި އެތެރެކުރިކަން ސާބިތުނުވާތީ ކަމަށް ކަނޑައަޅައިފަ އެވެ.

ކްރިމިނަލް ކޯޓުން ކުރި އެ ހުކުމް އިސްތިއުނާފު ކުރާނެ ކަމަށް ޕީޖީ އޮފީހުން ކުރިން ވެސް އިއުލާންކުރި އެވެ. ނަމަވެސް، އިސްތިއުނާފުކުރަން ލިބޭ 60 ދުވަހުގެ މުއްދަތުގައި އިސްތިއުނާފަށް ހުށައެއްނާޅަ އެވެ. އެކަން އެގޮތަށް ނުވެ އޮތީ ދަށު ކޯޓުން މައްސަލައިގެ ރިޕޯޓްތައް ދޫކުރުން ލަސްވުމުން ކަމަށް ޕީޖީ އޮފީހުން ވަނީ ބުނެފަ އެވެ.

ޖިނާއީ އިޖުރާއަތުގެ ގާނޫނަށް ގެނެސްފައިވާ އިސްލާހެއްގައިވާ ގޮތުން ދަށު ކޯޓުން ރިޕޯޓްތައް ދޫކުރާ ތާރީހުން ފެށިގެން އިސްތިއުނާފުގެ މުއްދަތު ގުނުމުގެ ހުއްދަ ކޯޓަށް ދެވިދާނެ އެވެ. އެ ފުރުސަތަށް ޕީޖީ އޮފީހުގެ ފަރާތުން މި މައްސަލައިގައި ހައި ކޯޓުގައި އެދުމުން، އެ ފުރުސަތު ވަނީ ދީފައި ކަމަށް ޕީޖީ އޮފީހުން ބުންޏެވެ.

އެ އޮފީހުން ބުނި ގޮތުގައި މިހާރު ގުނަމުންދާ މުއްދަތު އޮތް ގޮތުން އިސްތިއުނާފުގެ މުއްދަތު ހަމަވާނީ މި މަހުގެ 31 ވަނަ ދުވަހުގެ ނިޔަލަށެވެ. އެ އޮފީހުން ބުނީ އިސްތިއުނާފު ފޯމް ތައްޔާރުކުރުމުގެ މަސައްކަތް ކުރަމުން އަންނަ ކަމަށެވެ.

މި މައްސަލައިގައި ދައުލަތުން 10 މީހެއްގެ މައްޗަށް ދައުވާ އުފުލި ނަމަވެސް، ހަތް މީހެއްގެ މައްޗަށް އުފުލި ދައުވާ އަނބުރާ ގެންދިޔަ އެވެ. ޕްރޮސެކިއުޓާ ޖެނެރަލްގެ އޮފީހުން ބުނެފައިވާ ގޮތުގައި އެ މީހުންގެ ބައި އަނބުރާ ގެންދިޔައީ މަތީ މަރުހަލާގެ ކޯޓުތަކުގެ ނިންމުންތައް މިހާރު ހުރި ގޮތުން އެ މީހުންގެ މައްޗަށް ކުށް ސާބިތުވާ ވަރުގެ ހެކި ނެތް ކަމަށް ގަބޫލުކުރެވޭތީ އެވެ.