ރައްޔިތުން އެދުނު ގޮތަށް 50 ކޮޓަރީގެ ކަސާމިއާ ގެސްޓް ހައުސް މަތިވެރި ކައުންސިލަށް

ކާށިދޫ ދާއިރާގެ ކުރީގެ މެމްބަރު އަބްދުﷲ ޖާބިރު ހިންގެވި 50 ކޮޓަރީގެ ގެސްޓް ހައުސް އއ. މަތިވެރި ކައުންސިލާ މިރޭ ހަވާލުކޮށްފި އެވެ.

ކަސާ މިއާ ހުރި ބިން މަތިވެރީގެ ރައްޔިތުންނަށް ލިބޭ ގޮތް ހައްދަވައި ދެއްވުމަށް ރައްޔިތުން އެދުނީ މިދިޔަ އަހަރުގެ ޑިސެމްބަރު މަހު ރައީސް ޑރ. މުހައްމަދު މުއިއްޒު އެ ރަށަށް ކުރެއްވި ދަތުރުފުޅުގަ އެވެ.

އޭރު ކައުންސިލުން ރައީސަށް ހުށަހެޅީ ކަސާ މިއާ ގެސްޓް ހައުސް ހުރި އެ ބިމުން މިދިޔަ 8 އަހަރުގެ ތެރޭގައި ވެސް ރަށަށް އެއްވެސް ފައިދދާ ނުވާ މައްސަލައާ ގުޅުން ހުރި ކަންބޮޑުވުންތަކެވެ. އެހެންވެ، އެ ބިން މަތިވެރީގެ ރައްޔިތުންނަށް ލިބޭނެ ގޮތް ހައްދަވައި ދެއްވުމަށް އޭރު އެ މަނިކުފާނުގެ އަރިހުގައި ދެންނެވުމުން އޮތީ އެ ކަން ކޮށްދެއްވާނެ ކަމުގެ ޔަގީންކަން ދެއްވައިފަ އެވެ.

އޭގެ ފަހުން ދެ ވަނަ ފަހަރަށް މަތިވެރި އަށް ރައީސް މުއިއްޒު މިއަދު ވަޑައިގެން މަތިވެރި ކައުންސިލާ، ކަސާ މިއާ ގެސްޓް ހައުސްގެ ބިން ހަވާލު ކޮށްދެއްވީ އެ ރަށުގެ ރައްޔިތުންނާ އެކު މިރޭ ބޭއްވި ބައްދަލުވުމުގަ އެވެ.

އެ ބިން ކައުންސިލާ ހަވާލު ކޮށްދެއްވީ ޓޫރިޒަމް މިނިސްޓަރު ތާރިގް އިބްރާހިމް އެވެ. ކައުންސިލުން ބިމާ ހަވާލުވެވަޑައިގަތީ ކައުންސިލްގެ ރައީސް އަހުމަދު އަސްލަމް އެވެ.

މަތިވެރީގެ ރައްޔިތުންނާ ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، ކާސާ މިއާ އަކީ އެ ރަށުގެ ތަރައްގީ އަށް ވަރަށް މުހިންމު ތަނެއް ކަމަށެވެ. އަދި ކާސާ މިއާއާ ގުޅޭ ހުރިހާ ކަމެއްގައި ސަރުކާރުގެ ހުރިހާ އިދާރާއެއްގެ އެއްބާރުލުން ބޭނުން ކޮންމެ ވަގުތަކު ލިބޭނެ ކަމުގެ ޔަގީންކަން ވެސް އެ މަނިކުފާނު ދެއްވި އެވެ.

ޖާބިރަށް ދޫކުރި ބިމުގައި ހިންގި ކަސާ މިއާ ގެސްޓް ހައުސްގައި މަސައްކަތްކުރާ މީހުންނަށް މުސާރަ ނުދޭ މައްސަލަ އާއި އެ ތަނުގެ ބިމު ކުއްޔަށް ދައްކަން ޖެހޭ ހަތަރު މިލިއަނަށް ވުރެ ގިނަ ރުފިޔާ އޭނާ ނުދައްކައި އޮތުމުން، ރައްޔިތުންނާއި ކައުންސިލުން މީގެ ކުރިން ކަންބޮޑުވުން ފާޅުކޮށް، ރަށުގައި ހަމަނުޖެހުންތަކެއް ވެސް ހިންގާފައިވެ އެވެ.

Casa mia Guest house in Mathiveri ge rayyithunnag faidhaa vaa goiy hadhanee

The most trusted news source in the Maldives

Mihaaru

އެ ގެސްޓް ހައުސްގެ ކޮޓަރިއެއްގައި ރޯކޮށްލުމުގެ އިތުރުން މަތިވެރި އަށް ޖާބިރު އަރައިވަޑައިގަތުމުން އެ ރަށު ރައްޔިތުން ވަނީ އޭނާއާ ދެކޮޅަށް އިހުތިޖާޖުކޮށް، ރަށުން ވެސް ބާލުވައިފަ އެވެ.

އެ ގެސްޓް ހައުސް މިހާރު ހުރީ ބޭނުންނުކޮށް ފަޅަށެވެ.