އިބްރާހިމް ފަލާހު: ނޫސްވެރިން މަރަން ގޮވުމުން، ގިނަ ބަޔަކު ދަނީ އޭނާއަށް ފާޑުކިޔަމުން.
28 އޯގަސްޓް 2025 - 16:23
ނޫސްވެރިން ލާންވީ ޖަލަށް ނޫން ކަމަށާއި އެ މީހުން "އުލުބައިންދަންވީ" ކަމަށް ވިދާޅުވެ ޕީއެންސީގެ ޕީޖީ ގްރޫޕްގެ ލީޑަރު އަދި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު އިބްރާހިމް ފަލާހު މަޖިލީހުގެ އިއްޔެގެ ޖަލްސާގައި ގޮވާލެއްވި މައްސަލަ ނޫސްވެރިންގެ ޖަމިއްޔާ (އެމްޖޭއޭ) އިން ފުލުހަށް ހުށަހަޅައިފި އެވެ.
އެމްޖޭއޭއިން މިއަދު ނެރުނު ބަޔާނެއްގައި ބުނީ އިސްލާމްދީނުގެ މައިގަނޑު އަސާސްތަކުގެ ތެރޭގައި އެއްވެސް މީހަކަށް އަނިޔާވެރިނުވުން ހިމެނޭއިރު، ފަލާހް ދެއްކެވި ވާހަކައަކީ އިސްލާމްދީނުގެ އަސްލަކާ ހިލާފު ވާހަކައެއް ކަމަށެވެ.
އެކަމަކީ ނޫސްވެރިންނާއި މީޑިއާތަކުގައި މަސައްކަތްކުރާ މީހުންނަށް އެކަމުގެ ސަބަބުން ބިރުވެރިކަމުގެ ތެރެއަށް ވެއްޓޭ ކަމަށާއި އެއީ މުޖުތަމައުގެ އަމަންއަމާންކަން ގެއްލި ހަމަނުޖެހުމަށް ގައުމު ވެއްޓިގެން ހިނގައިދާނެ ފަދަ ވާހަކަތަކެއް ކަމަށް ވެސް އެ ބަޔާނުގައިވެ އެވެ.
އެހެންވެ، އެމްޖޭއޭއިން ވަނީ ފަލާހްގެ މައްސަލަ ތަހުގީގުކޮށް، ފިޔަވަޅު އަޅައިދޭން އެދިފަ އެވެ.
މިއަހަރުގެ ދެވަނަ ދައުރު ނިންމައި، ޗުއްޓީގައި އޮތް މަޖިލީހުގެ ދައުރުން ބޭރުން ބޭއްވި އިއްޔެ ޖަލްސާގައި "މީޑީއާ ކޮންޓްރޯލްކުރާ ބިލް" ގެ ބަހުސް ކުރައްވަމުން ފަލާހު ވިދާޅުވީ އެއީ މުހިއްމު ބިލެއް ކަމަށާއި އެއީ މީޑިއާގައި މަސައްކަތްކުރާ އެއްވެސް ފަރާތަކަށް ހުރަހެއް އޮތް ބިލެއް ނޫން ކަމަށެެވެ.
މީޑިއާގެ ސަބަބުން ވަރަށް ނިކަމެތި ކަމެއް ލިބުނު ކަމަށް ވިދާޅުވެ ފަލާހު ވަނީ އޭނާއަކީ "އެއްޖިންސުން ގުޅުން ހިންގާ" މީހެއް ކަމަށް މީޑިއާގައި ފަތުރާފައިވާ ކަމަށާއި އޭގެ ސަބަބުން އާއިލާ އަށް ވެސް އޭގެ އަސަރުކުރި ކަމަށެވެ.
އެފަދަ ކަންކަން ކުރާ ނަމަ ނޫސްވެރިން ޖަލަށް ލުމުގެ ބަދަލުގައި "އުލުބައިންދަންވީ" ކަމަށް އޭނާ މަޖިލީހުގެ ތަޅުމުގައި ތަކުރާރުކޮށް ވިދާޅުވި އެވެ.
ފަލާހް އެގޮތަށް ވިދާޅުވި ނަމަވެސް އެ ވާހަކަތަކަކީ އޭރު ސޯޝަލް މީޑިއާގައި ބަޔަކު ދެއްކި ވާހަކަތަކެކެވެ.
ރަދީފުގައިވާ ގޮތުން އުލުބޭންދުމަކީ އިހުޒަމާނުގައި މީހުން މަރަން ހަދާ ގޮތެކެވެ.
މަޖިލީހުގެ ތަޅުމުގައި ފާޅުކަން ބޮޑު ގޮތެއްގައި ބައެއްގެ މައްޗަށް އަނިޔާވެރިވުމަށް ފަލާހު ގޮވާލެއްވި މައްސަލާގައި ޕީއެންސީން އޭނާއާ މެދު އަހުލާގީ ފިޔަވަޅު އެޅުމަށް ވެސް އެމްޖޭއޭ އިން ވަނީ ގޮވާލައިފަ އެވެ. އަދި އާންމުކޮށް އެނގޭނެހެން އެ ވާހަކަތަކަށް މާފަށް އެދުމަށް އެ ޖަމިއްޔާއިން ވަނީ އިލްތިމާސް ކޮށްފަ އެވެ.
ނޫސްވެރިން މެރުމަށް ގޮވުމުން ފަލާހަށް ގިނަ ފާޑުކިޔުންތަކެއް ވަނީ އަމާޒުވެފަ އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ހަސަންޓެބެ
29 August 2025
އިޒުރޭލުން, ގާޒާ ނޫސްވެރިން އުލު ބައިންދާ, މިސްރު ސަރުކާރުން ވެސް, އެގައުމުގެ ސަރުކާރު ވެރީންގެ ދިމާލަށް އެއްޗެހި ކިޔާމީހުން އުލުބައިންދާ, ނިޒާމުން ގެއްލޭނެ. ބަލަ, ގާޒާ ކަންތަކާއި އަގައިން ބުނާކަށްވެސް ނުކެރޭނެ. މިސްރު, ޖޯދަން ސަައުދީވެސް.
ޢާން
29 August 2025
މީނަ ބޭރުކޮށްފަ ޖ ނާޒިމް ޕީޖީ ލީޑަރަކަށް ލާންވީ. ނާޒިމް އެންމެ ލޯޔަލް އީ މުއިއްޒުއަށް.
ބޭނުންހާކަމެއް ނުވާނެ
29 August 2025
މީޑިއާތައް ރޯކޮށް އުވާލަންވީ. ޕްރައިވެޓް ނޫސްވެރިކަން އެއްކޮށް މަނާ ކުރަންވީ. ސަރުކާރު ޓީވީ/ރޭޑިއޯ އެކަނި ބާއްވަންވީ. ނޫސްވެރިކަން ކުރާ ހިތްވާ މީހުން ސްކްރީން ކޮށްފަ އެދެތަނުން އެކަނި ވަޒީފާ ދޭންވީ. ނިމުނީ. ކޮން ނޫސްވެރިކަނެއްތަ މަގޭ ރައީސް ފަހަތުން ތިގޮތަށް ނުދުވެވޭނެ
ހަމްދާ
29 August 2025
މީވާ ގައުމެއް.
ނަށީދު
29 August 2025
މަޖިލިސް ތަޅުމުގައި ދައްކާ ވާހަކަ އަށް ދައުވާ ނުކުރެވޭކަން ހަމަ ނޭގެނީބާ؟ ހަހަހަހަ
ގުއިއްޒު
28 August 2025
މަޖިލީހުގަ އެބަ އުޅޭތަ ކިޔޭ ނުކިޔޭ އެއްޗެއް އެނގޭ މީހަކު. އަމުދުން ތިޔަ ބައިބޯ ގުރޫޕުގަ.
ހުސައިން
28 August 2025
އެއީ ކަމަކާއި ގުޅިގެން ދެއްކި ވާހަކައެއް ނޫންތޯ؟ އެފަދަ ވާހަކައެއް ދެއްކިނަމަ އެފަދަ އެއްޗެއް ބުނެވިދާނެ. މީޑިއާ ވެސް ބައެއްފަހަރު ކޮންޓްރޯލް އިން ނައްޓައިގެން ގޮސްފައިވޭ.
ހައިހައި
28 August 2025
އެއްވެސް މީހަކު އުލުބައިންދަން ނުގޮވަ. މީޑިޔާ އުލުބައިންދަން ބުނީ.
ޣުއިއްޓޭ
28 August 2025
ކަލޯ މީނަ މިހުރީ 2 ޕެނީ ލިބުނީމާ އޮޅިފައި؟
ސޭކު
28 August 2025
މީ އަދީބަށް ވާހިއްވެގެން އުޅޭމީހެއް