މާލެ ގެއެއްގެ ބަދިގޭގައި ރޯވެ، ގެއްލުންތަކެއް

މާލޭ ގެއެއްގެ ބަދިގޭގައި ރޯވެ، ގެއްލުންތަކެއް ލިބިއްޖެ އެވެ.

އެ އަލިފާނުގެ ހާދިސާ ހިނގާފައިވަނީ ހ. މެލްބޯން ގޭގެ ދެވަނަ ފަންގިފިލާގައި ހުރި އެޕާޓްމަންޓެއްގަ އެވެ.

އެމްއެންޑީއެފުން ބުނީ އަލިފާނުގެ ހާދިސާ ހިނގާފައި ވަނީ އެ ގޭގެ ބަދިގޭގައި ބައްޓާފައި ހުރި ހުޑެއްގައި ކަމަށެވެ.

އެ ހާދިސާ ހިނގައިގެން ރިޕޯޓު ކޮށްފައި ވަނީ 11:00 ހާއިރު ކަމަށާއި ހުޑްގައި ރޯވި އަލިފާން، 11:17ގައި އެމްއެންޑީއެފުން ނިނިއްވާލައިފައިވާ ކަމަށް ވެސް ބުންޏެވެ.

އެ ހާދިސާގައި މީހަކަށް އަނިޔާއެއް ނުލިބުނު ނަމަވެސް ފޮޓޯތަކުން ފެންނަނީ ހުޑާއި ކަބަޑުތައް ވެސް ބޭނުން ނުކުރެވޭ ވަރަށް އަނދާފައި ހުރި ތަނެވެ. އަދި އެ ތަނުގައި ބަހައްޓާފައި ހުރި އުނދުނާއި އޭގެ މަތީގައި ހުރި ތެލިތައް ވެސް ވަނީ އަނދައިފަ އެވެ.

ބަދިގޭގައި ހުރި މިކްސަރު ފަދަ ކަރަންޓު ސާމާނަށް ވަނީ ގެއްލުންތަކެއް ލިބިފަ އެވެ.