މަޖިލީހުގެ ޖަލްސާއެއް ހަވީރު، އެޖެންޑާ އަދި ނޭނގޭ

ރައްޔިތުންގެ މަޖިލީހުގެ ދައުރުން ބޭރުން ބާއްވާ ޖަލްސާއެއް މިއަދު ހަވީރު 4:00 އަށް އެޖެންޑާކޮށްފި އެވެ.

ހަވީރު ގަޑީގައި ޖަލްސާއެއް ބާއްވަން ނިންމިޔަސް، އެ ޖަލްސާގައި ކުރާނެ އެޖެންޑާއެއް އާންމެއް ނުކުރެ އެވެ.

އެކަމަކު ބެލެވޭ ގޮތުގައި ޖަލްސާގައި ކުރިއަށް ދާނީ މަޖިލީހުގެ މިނިވަން މުއައްސަސާތަކާބެހޭ ކޮމެޓީން އިއްޔެ ފާސްކުރި މީޑިއާ ރެގިއުލޭޓް ކުރުމުގެ ނަމުގައި ހުށަހަޅާފައިވާ ބިލުގެ މަސައްކަތެވެ. އެ ބިލް ކޮމެޓީން އިއްޔެ ފާސްކުރި ބިލް އަލުން ދިރާސާކުރަން މިއަދު މެންދުރު 2:00 އަށް އެ ކޮމެޓީ ވަނީ ތާވަލްކޮށްފަ އެވެ.

ތުޅާދޫ ދާއިރާގެ އަމިއްލަ މެމްބަރު އަބްދުލް ހަންނާނު އަބޫބަކުރު ހުށަހަޅުއްވާފައިވާ އެ ބިލަށް މަޖިލީހުގެ ސުޕަމެޖޯރިޓީ އޮންނަ ޕީއެންސީން ތާއީދުކުރެ އެވެ.

ނޫސްވެރިންނާ މަޝްވަރާއެއް ނުކޮށް ހުށަހަޅާފައިވާ އެ ބިލު ދިރާސާކުރުމުގެ މަސައްކަތް މިނިވަން މުއައްސަސާތަކުގެ ކޮމިޓީން ރޭ ނިންމާލާފައި ވަނީ ބިލު އަނބުރާ ގެންދަން 150 އަށް ވުރެ ގިނަ ނޫސްވެރިންގެ ސޮޔާ އެކު ރައީސް އާއި ރައްޔިތުންގެ މަޖިލީހަށް ޕެޓިޝަނެއް ވެސް ހުށަހަޅާފައި ވަނިކޮށެވެ.

ބިލު ދިރާސާކުރަން ބޭއްވި ކޮމިޓީތައް ވެސް ބާއްވާފައި ވަނީ ސިއްރުކޮށްގެންނެވެ.

ނޫސްވެރިކަމުގެ މިނިވަންކަމަށް ވަކާލާތުކުރާ ޖަމިއްޔާ "ރިޕޯޓާސް ވިތައުޓް ބޯޑާސް" ހިމެނޭ ގޮތަށް 22 ޖަމިއްޔާއަކުން ބިލު އަނބުރާ ގެންދަން ގޮވާލާފައި ވަނީ އެ ބިލުގެ ސަބަބުން ރާއްޖޭގެ ނޫސްވެރިކަމުގެ މިނިވަންކަން ވަރަށް ބޮޑަށް ފަހަތަށް ދާނެ ކަމަށް ބުނެ އެވެ.

އެ ބިލް މަޖިލީހުން މިއަދު ފާސްކުރަން އުޅޭ ކަމަށް ބުނެ ނޫސްވެރިން ދަނީ ހެނދުނުން ފެށިގެން މަޖިލިސް ދޮށުގައި މުޒާހަރާ ކުރަމުންނެވެ.

ހެނދުނު 8:30 އިން ފެށިގެން މަޖިލިސް ދޮށުގައި، އެކި މީޑިއާތަކަށް ނިސްބަތްވާ ނޫސްވެރިން ބިލާ ދެކޮޅަށް އަޑު އުފުލަމުން ދާއިރު ފުލުހުން ވަނީ ނޫސްވެރިން ފަހަތަށް ޖަހައްސައި ބެރިކޭޑު ޖަހައި ދުރުކޮށްފަ އެވެ.

ނަމަވެސް އެ ސަރަހައްދުގައި ތިބެ ނޫސްވެރިންނާއި އާންމުންގެ ތެރެއިން ވެސް ބަޔަކު ދަނީ އެ ބިލު ބޭރުކުރަން ގޮވަމުންނެވެ.