ފެނަކަ ސައީދު ހަތަރު އަހަރަށް ޖަލަށް!

ފެނަކަ ކޯޕަރޭޝަންގެ މެނޭޖިން ޑިރެކްޓަރުގެ މަގާމުގައި އަހުމަދު ސައީދު (ފެނަކަ ސައީދު) ހުންނެވި ދުވަސްވަރު ހިންގި ކޮރަޕްޝަންގެ މައްސަލައެއް ސާބިތުވެ، ހަތަރު އަހަރަށް އޭނާ ޖަލަށް ލާން ކްރިމިނަލް ކޯޓުން މިއަދު ހުކުމްކޮށްފި އެވެ.

އޭނާގެ މައްޗަށް ހަތަރު އަހަރުގެ ޖަލު ހުކުމެއް އައީ ފެނަކަ އާއި ބްލޭޒަން އިންކް ކުންފުންޏާ ދެމެދު 2019 ވަނަ އަހަރު ހެދި އެއްބަސްވުމުގެ ދަށުން ބްލޭޒަން އިންކް ކުންފުނިން މަސައްކަތް ފުރިހަމަ ނުކުރަނީސް އަދި މަސައްކަތް ނިންމިކަން ކަށަވަރު ކުރުމެއް ނެތި، އެ މަސައްކަތަށް ވާ ފައިސާ ބްލޭޒަން އިންކް ކުންފުންޏަށް ދޫކުރި މައްސަލައިގަ އެވެ.

އޭނާގެ މައްޗަށް އެ ކުށް ސާބިތުވުމާ އެކު، ކްރިމިނަލް ކޯޓުގެ އިސް ގާޒީ އާދަމް މުހައްމަދު ހުކުމް އިއްވަމުން ވިދާޅުވީ، އެ ކުށުގެ އަސާސީ އަދަބަކީ އެއް އަހަރާއި ހަތް މަހާއި ހަ ދުވަހަށް ޖަލަށްލުން ކަމަށާއި އަދަބު މަތިވާ ހާލަތެއް ނެތް ކަމަށް ދައުލަތުން ބުންޏަސް ގާޒީ އަށް ލިބޭ އިހުތިޔާރުގެ ދަށުން އަދަބުގެ ދަރަޖަ މަތިކުރެވޭ ކަމަށެވެ. އެހެންވެ، ކަމާ ގުޅޭ މާއްދާ އަށް ރިއާޔަތްކޮށް، ގާނޫނުގައި ކަނޑައަޅާފައިވާ އެންމެ ހަރުކަށި އަދަބު ކަމުގައިވާ ހަތަރު އަހަރުގެ ޖަލު އަދަބު ކަނޑައަޅަންޖެހޭ ކަމަށް އިސް ގާޒީ ވިދާޅުވި އެވެ.

އިސްގާޒީ އާދަމް މުހައްމަދު ވިދާޅުވީ، ދައުލަތުގެ ކުންފުނިތަކުގައި ކޮރަޕްޝަން ހިންގުން އާންމުވެފައިވާ ކަމަށެވެ. އަދި ދައުލަތުގެ ފައިސާ އަށް ހިޔާނާތްތެރިވެ، ކޮރަޕްޝަންގެ އަމަލުތައް ހިންގުމަކީ އާދައިގެ މަތިން އާންމު އުސޫލުން ހިނގާ ކަމެއްގެ ގޮތުގައި ބެލެވޭ މިންވަރަށް އެކަން އާންމު ވެފައިވާ ކަމަށް އޭނާ ވިދާޅުވި އެވެ.

ކޮރަޕްޝަން ހިންގާ މީހުންނަށް އަދަބު ލިބޭ ތަން ފެންނަނީ މަދުން ކަމަށާއި އަދި އަދަބު ލިބޭ ނަމަ އެ ލިބޭ އަދަބަކީ ވެސް ނިސްބަތުން ކުޑަ އަދަބަކަށް ވުމަކީ، މިފަދަ އަމަލުތައް ހިންގާ މީހުންނަށް ލިބޭ ހިތްވަރަކަށް ވާތީ އެންމެ ހަރުކަށި އަދަބު ކަނޑައަޅަންޖެހޭ ކަމަށް އިސްގާޒީ ވިދާޅުވި އެވެ.

އަދަބު މަތިކުރަންޖެހޭ ސަބަބުގެ ގޮތުގައި އިސްގާޒީ ވިދާޅުވީ، މި މައްސަލާގައި ހިމެނެނީ، އެއްބަސްވުންތަކެއް ހަދައިގެން މަސައްކަތް ނުކުރާ ބަޔަކަށް ގިނަ އަދަދެއްގެ ފައިސާތަކެއް ފެނަކައިގެ އިސްވެރިން ދީފައިވުން ކަމަށެވެ. ރައްޔިތުންގެ ފައިސާއިން ހިންގާ ކުންފުނިތަކުގެ އިސްވެރިންގެ ގޮތުގައި ތިބޭ މީހުން ހިންގާ ބޮޑެތި ކޮރަޕްޝަން އަމަލުތަކުގެ ސަބަބުން، އެ ކުންފުނިތަކުގެ ތެރޭގައި ވެސް ކޮރަޕްޝަނަށް ދޮރު ހުޅުވި، އެ ފަސާދަ ފުޅާވެގެން ދިއުމަކީ ކަންބޮޑުވާންޖެހޭ ކަމަކަށް ވާތީ އެ މީހުންގެ މައްޗަށް، އެ ކުށާ ގުޅިގެން ގާނޫނުގައި ކަނޑައަޅާފައިވާ އެންމެ ހަރުކަށި އަދަބު ދޭން ޖެހޭނެ ކަމަށް ގަބޫލު ކުރައްވާ ކަމަށް އިސްގާޒީ ވިދާޅުވި އެވެ.

އެ މައްސަލައިގައި ބްލޭޒް ކުންފުންޏަށް ނާޖާއިޒު މަންފާ ހޯދާއިދީފައިވާ މައްސަލާގައި ސައީދުގެ މައްޗަށް އުފުލީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ އެވެ. އަދި ބްލޭޒަން ކުންފުނިން މަސައްކަތް ނިންމިކަން އަންގާފައި ނުވަނީސް އިތުރު އެއްބަސްވުމެއް ހަދާފައި ވުމަކީ ވެސް ދައުވާ ކުރި އެއް ސަބަބެވެ.

Fenakaige kureege Managin director Saeed ah dhauvaa koffi

The most trusted news source in the Maldives

Mihaaru

ސައީދުގެ އިތުރުން ފެނަކައިގެ އޭރުގެ ޕްރޮކިއުމަންޓް ހެޑް، މަރިޔަމް ދީނާގެ މައްޗަށް ވެސް ދައުވާ ކުރެ އެވެ. އެކަމަކު، އޭނާގެ ބައި މިއަދަކު ނެތެވެ.