ބޮޑީވޯން ކެމެރާ ހޯދައިދިނުމުގައި އޮޅުވާލުމެއް ނޯންނާނެ: ޒެޓާ

ފުލުހުންގެ އިދާރާއިން 2022 ވަނަ އަހަރު ބޮޑީވޯން ކެމެރާ ހޯދައިދިނުމުގައި އެއްވެސް ކަމެއް އޮޅުވާލައި، އުސޫލުން ބޭރުން ކަމެއް ކޮށްފައި ނުވާނެ ކަމަށް ޒެޓާ އެންޓަޕްރައިޒަސް އާއި ޒެޓާ ޓެކްނޮލޮޖީސްގެ ވަކީލުން ނެރުނު ބަޔާނެއްގައި ބުނެފި އެވެ.

އެ ދެ ކުންފުނީގެ ވަކީލުންގެ ފަރާތުން މިދިޔަ ބުރާސްފަތި ދުވަހު ނެރުނު ބަޔާނެއްގައި ބުނީ ރައްޔިތުންގެ މަޖިލީހުގެ މާލިއްޔަތު ކޮމިޓީގެ ސަބް ކޮމިޓީން މިދިޔަ ބުދަ ދުވަހު ބޭއްވި ބައްދަލުވުމުގައި އެ ކުންފުނިތަކާ ގުޅޭ ގޮތުން ވާހަކަ ދައްކާފައި ވަނީ ހަގީގަތް އޮޅޭ ގޮތަށް ކަމަށެވެ.

އެ ބަޔާނުގައި ބުނި ގޮތުގައި، ފުލުހުން 1،400 ބޮޑީވޯން ކެމެރާ ސިންގަލް ސޯސް ޕްރޮކިއުމެންޓް އުސޫލުން ހޯދުމަށް ކުރިއަށް ގެންދިޔަ ޓެންޑާގައި ޒެޓާސް އެންޓަޕްރައިޒަސް ޓެންޑަރު އެވޯޑު ނުކުރުމަށް ޓެންޑާ ބޯޑުން މައިގަނޑު ގޮތެއްގައި ނިންމާފައި ވަނީ އެ އުސޫލުން ޓެންޑާ ކުރިއަށް ގެންދަން އެ ބޯޑަށް ނުފެންނާތީ އެވެ.

ޒެޓާސް އެންޓަޕްރައިޒަސް "ކޮލިފައި ނުވާތީ"، އެ ކުންފުނީގެ ވެރިން ހިމެނޭ ޒެޓާސް ޓެކްނޮލޮޖީއާ މަސައްކަތް ހަވާލުކުރި ކަމަށް މާލިއްޔަތުގެ ސަބް ކޮމިޓީގެ މުގައްރިރު އަދި ރައްޔިތުންގެ މަޖިލީހުގެ ނައިބު ރައީސް ދިއްގަރު ދާއިރާގެ މެންބަރު އަހުމަދު ނާޒިމް ވިދާޅުވެފައި ވިޔަސް، އެކަން ހިނގާފައި ވަނީ އެގޮތަށް ނޫން ކަމަށް އެ ބަޔާނުގައި ބުންޏެވެ.

އެ ބަޔާނުގައި ބުނީ އެ މަސައްކަތް ކުރަން ޒެޓާސް އެންޓަޕްރައިޒަސް އިން ޓެންޑާއަށް ބޭނުންވާ ހުރިހާ ލިޔެކިޔުމެއް ހުށަހަޅައި އެކަން ކުރެވޭނެ މާލީ އަދި ފަންނީ ގާބިލުކަން ސާބިތުކޮށްދިނުމަށް ލިޔެކިޔުންތައް ހުށަހަޅާފައިވާ ކަމަށާއި އެ ކުންފުނިން ހުށަހެޅި ޕްރޮޕޯސަލަކީ ފަސް އަހަރުގެ ޕޭމަންޓް ޕްލޭނަކާ އެކު، ދައުލަތަށް މާލީ ގޮތުން ލުއިވާނެ ގޮތަށް ހުށަހެޅި އެއްޗެއް ކަމަށެވެ.

ފުލުހުން 200 ބޮޑީވޯން ކެމެރާ ހޯދަން ފަހުން ކުރި އިއުލާނުގެ ދަށުން ހުޅުވާލި ބީލަމަށް ކުރިމަތިލީ ޒެޓާ ޓެކްނޮލޮޖީސް އިން ކަމަށާއި ފުލުހުން ކުރި އޯޕަން ޓެންޑާ އެ ކުންފުނިން ކާމިޔާބުކޮށް، އެއްބަސްވުމުގެ ދަށުން މަސައްކަތް ފުރިހަމަކޮށްފައިވާނެ ކަމަށް އެ ބަޔާނުގައި ބުންޏެވެ.

"މި ބީލިން ކުރިއަށް ގެންދިއުމުގައި އަދި އެވޯޑްކުރުމުގައި ކޮރަޕްޝަނަށް މަގުފަހިވާ ފަދަ އެއްވެސް ކަމެއް ހިނގާފައިނުވާކަން އެންޓި-ކޮރަޕްޝަން ކޮމިޝަނުން މައްސަލަ ބެލުމަށް ފަހު ނިންމާފައިވެ އެވެ،" އެ ބަޔާނުގައި ބުންޏެވެ.

އެ ބަޔާނުގައި ބުނީ އިތުރު 1،200 ބޮޑީވޯން ކެމެރާ ގަތުމަށް ނޮވެމްބަރު 27 2022، ފުލުހުން ޒެޓާ ޓެކްނޮލޮޖީސްއާ ހަވާލުކުރީ ސިންގަލް ސޯސް ޕްރޮކިއުމެންޓް އުސޫލުން ޓެންޑާ ކާމިޔާބުކޮށްގެން ކަމަށާއި އެއްބަސްވުމުގައި ސޮއިކޮށް އެ މަސައްކަތް ވެސް ފުރިހަމަކޮށްފައިވާނެ ކަމަށެވެ.

އެ މަސައްކަތަށް ހުށަހެޅި އަގަށް ވުރެ ބޮޑު އަގެއްގައި މަސައްކަތް ކުރި ކަމަށް ކޮށްފައިވާ ތުހުމަތާ ގުޅިގެން ވަކީލުންގެ ބަޔާނުގައި ބުނީ އެއީ ކަމުގެ ހަގީގަތް އޮޅޭ ގޮތަށް ހާމަކޮށްފައިވާ ވާހަކައެއް ކަމަށާއި އެ ދެ ކުންފުނީގެ ފަރާތުން ހުށަހެޅި އެއްވެސް ބީލަމެއްގައި މަސައްކަތުގެ އަގުގެ ގޮތުގައި 48 މިލިއަން ރުފިޔާ ހިމަނައި ޕްރޮޕޯސަލެއް ހުށަހަޅާފައި ނުވާނެ ކަމަށެވެ. ޒެޓާ ޓެކްނޮލޮޖީސް އިން 1،200 ބޮޑީވޯން ކެމެރާ ގަތުމަށް ހުށަހެޅި ބީލަމުގައި މަސައްކަތުގެ އަގުގެ ގޮތުގައި ޓެކްސް ހިމެނޭ ގޮތަށް ހުށަހަޅާފައި ވަނީ 66.4 މިލިއަން ރުފިޔާ ކަމަށް އެ ބަޔާނުގައި ބުންޏެވެ.

އެ އަދަދަށް އެއްވެސް ބަދަލެއް އެއްބަސްވުމުގައި ސޮއިކުރުމުގެ ކުރިންނާއި ފަހުން ވެސް އައިސްފައި ނުވާ ކަމަށް އެ ބަޔާނުގައި ބުންޏެވެ.

މާލިއްޔަތު ކޮމިޓީން މައްސަލަ ބަލައި ދިރާސާކުރުމުގައި އެ ދެ ކުންފުނީގެ ބަހެއް މިހާތަނަށް ހޯދާފައިވާ ނުވާ ކަމަށް ވެސް އެ ބަޔާނުގައިވެ އެވެ.

Body worn camera gannan havaalu kuree sharuthu hamanuvi kunfuneege hissaadhaarunna!

The most trusted news source in the Maldives

މާލިއްޔަތުގެ ސަބް ކޮމިޓީގައި ނާޒިމް ވިދާޅުވެފައި ވަނީ ކެމެރާ ގަތުމުގެ ކަންކަން ހިންގި ޓައިމްލައިން މިހާރު ވަރަށް ފުރިހަމައަށް ސާފުވެއްޖެ ކަމަށާއި ޒެޓާ އެންޓްޕްރައިޒަސް އަކީ ކޮލިފައި ނުވާ ބައެއް ކަމަށް ނިންމުމުން އަނެއްކާވެސް އެއް ހިއްސާދާރުން ހިމެނޭ އެހެން ކުންފުންޏަކަށް ދީފައި އޮތް ކަން ސާފުކޮށް އެނގޭ ކަމަށެވެ.