އެމްޑީޕީން މީގެ ކުރިން ބޭއްވި ބޮޑު މުޒާހަރާގައި ކުރީގެ ނައިބު ރައީސް ފައިސަލް ނަސީމް ވާހަކަ ދައްކަވަނީ-- ފޮޓޯ: ނިޝާން އަލީ/ މިހާރު
27 ނޮވެމްބަރ 2025 - 11:27
ކުރީގެ ނައިބު ރައީސުންނަށް ވެސް ދައުލަތުން އިނާޔަތް ލިބޭ ގޮތަށް ގާނޫނަށް ހުށަހެޅި އިސްލާހު ރައްޔިތުންގެ މަޖިލިހުން ފާސްވުމުން، އެ އިނާޔަތަށް ޝަރުތު ހަމަވާ ހަމައެކަނި ބޭފުޅަކީ އެމްޑީޕީގެ އެންމެ ފަހުގެ ވެރިކަމުގައި އެ މަގާމު ފުރުއްވި ފައިސަލް ނަސީމް އެވެ.
ކުރީގެ ރައީސުންނަށް އިނާޔަތާއި ރައްކާތެރިކަން ދިނުމުގެ ގާނޫނަށް ސަރުކާރުގެ ފަރާތުން ހުޅުދޫ ދާއިރާގެ ޕީއެންސީގެ މެމްބަރު މުހައްމަދު ޝާހިދު ވަނީ އިސްލާހު ހުށަހަޅުއްވައިފަ އެވެ. އެ ބިލްގެ ފުރަތަމަ ކިޔުން ރައްޔިތުންގެ މަޖިލިހުގެ މިއަދުގެ ޖަލްސާގައި ވަނީ އިއްވައިފަ އެވެ.
އެ ގާނޫނަށް ގެނައި އިސްލާހުތަކުގައި ވަނީ ކުރީގެ ނައިބު ރައީސުންނަށް ކޮންމެ މަހަކު ދައުލަތުން 25،000ރ. އިނާޔަތެއް ދިނުމަށް ހިމަނައިފަ އެވެ. އަދި އެ ބޭފުޅުންނަށް ވެސް ރާއްޖެ އާއި ބޭރު ގައުމުތަކުން ސިއްހީ ހިދުމަތް ލިބޭނެ އިންތިޒާމު ހަމަޖައްސަން އިސްލާހުގައި ހިމަނާފައި ވެ އެވެ. ނަމަވެސް ނައިބު ރައީސްކަން ކުރައްވާފައިވާ ބޭފުޅެއް ކަމަށް ބަލާނީ ގާނޫނުއަސާސީގައިވާ ގޮތުގެ މަތިން ފަސް އަހަރުގެ ރިޔާސީ ދައުރެއް ފުރިހަމަ ކޮށްފައިވާ ނަމަ ކަމަށް އިސްލާހުގައި ވެ އެވެ.
އެ އުސޫލުން ބަލާއިރު، އެ އިނާޔާތްތައް ލިބިވަޑައިގަންނަވަނީ މިހާތަނަށް ފަސް އަހަރުގެ ރިޔާސީ ދައުރެއް ފުރިހަމަ ކުރެއްވި ހަމައެކަނި ނައިބު ރައީސް ފައިސަލަށް އެކަންޏެވެ. އިތުރު އެހެން ބޭފުޅަކަށް ނައިބު ރައީސްކަމުގައި ފަސް އަހަރުގެ ދައުރެއް ފުރިހަމަ ކުރެއްވިފައެއް ނުވެ އެވެ.
ކުރީގެ ނައިބު ރައީސް މުހައްމަދު ވަހީދާާއި މުހައްމަދު ވަހީދުއްދީން (ޑީން) އާއި ޑރ. މުހައްމަދު ޖަމީލް އަހުމަދާއި އަބްދުﷲ ޖިހާދާއި އަހުމަދު އަދީބަށް އެކި ސަބަބުތަކާ ހެދި ފަސް އަހަރުގެ ރިޔާސީ ދައުރު ފުރިހަމަ ކުރެއްވިފައެއް ނުވެ އެވެ. އެހެންވެ، ގާނޫނަށް ގެނައި އިސްލާހު ފާސްވެއްޖެ ނަމަ ކުރީގެ ނައިބު ރައީސުންގެ އެއްވެސް އިނާޔަތެއް އެ ފަސް ބޭފުޅުންނަށް ލިބިވަޑައެއް ނުގަންނަވާނެ އެވެ.
އެ ފަސް ބޭފުޅުންގެ ތެރެއިން އަދީބުގެ މައްޗަށް ވަނީ ޖިނާއީ މައްސަލައެއް ވެސް ސާބިތުވެ ހުކުމް ކޮށްފަ އެވެ.
ކުރީގެ ރައީސުންނަށް ދައުލަތުން އިނާޔަތާއި ރައްކާތެރިކަން ދިނުމުގެ ގާނޫނުގައިވާ ގޮތުން މަގާމުގައި ތިއްބެވި އިރު، ޖިނާއީ ކުށެއް ކުރި ކަން ޝަރީއަތަށް ސާބިތުވާ ވަގުތުން ފެށިގެން އޭނާ އާއި އަނބިމީހާ ނުވަތަ ފިރިމީހާ އަށް ގާނޫނުގެ ދަށުން ލިބިދޭ ރައްކާތެރިކަމާއި އިނާޔަޔްތަކުން މަހުރޫމް ވާނެ އެވެ. ކުރީގެ ރައީސުންގެ ގާނޫނަށް ގެންނަން ހުށަހެޅި އިސްލާހުތަކުގައި ކުރީގެ ނައިބު ރައީސުންގެ އިނާޔަތުގެ ވާހަކަ ހިމަނާފައި ވާތީ އެ ބޭފުޅުންނަށް ވެސް އެ އުސޫލު ހިންގާނެ އެވެ.
އެ ގާނޫނަށް ގެނައި އިސްލާހުގައި ވަނީ ކުރީގެ ރައީސުންގެ އޮފީސް ހިންގުމުގެ ހަރަދަށް ދައުލަތުގެ ބަޖެޓުން ކޮންމެ މަހަކަށް ކަނޑައަޅާފައިވާ 175،000ރ. ގެ ފައިސާގެ އިނާޔަތާއި އެކަމާ ގުޅޭ އެހެން ކަންކަން ވެސް ކަނޑާލަން ހިމަނައިފަ އެވެ.
ގާނޫނަށް ހުށަހެޅުއްވި އިސްލާހުތަކުގެ ތެރެއިން އެއް އިސްލާހުގައި ވަނީ ކުރީގެ ރައީސަކު ރިޔާސީ ދެވަނަ ދައުރަކަށް އިންތިހާބުވެއްޖެ ނަމަ އަދި ދައުލަތުގެ އެ ނޫން މަގާމެއް ވެސް އަދާކުރައްވާ ނަމަ އެ މުއްދަތަށް ކުރީގެ ރައީސުންގެ އިނާޔަތް ލިބިވަޑައިނުގަންނަވާނެ ކަމަށެވެ.
ކުރީގެ ރައީސަކު ރާއްޖެ އިން ބޭރުގައި ދިރިއުޅުއްވާ ނަމަވެސް ހިމާޔަތާއި ރައްކާތެރިކަން ދިނުން ލާޒިމް ނޫން ކަަމަށް އިސްލާހުގައި ވެ އެވެ. އެކަމަކު އެ ބޭފުޅަކު ރާއްޖެ ވަޑައިގެންފި ނަމަ ހިމާޔަތާއި ރައްކާތެރިކަން ދޭން ވާނެ ކަމަށް ބިލްގައި ބަޔާންކޮށްފައި ވެ އެވެ.
Copyright © 2025 Mihaaru · Terms and Conditions · Privacy Policy · Code of Ethics · Editorial Policy
ކޮމެންޓްތައް
އަލީ
28 November 2025
ފައިސަލްއަކީ ތިކަމުގައި ފުރިހަމަ ނަމޫނާއެއް , މަރުޙަބާ ފައިސަލް
ވަޖިންދު
28 November 2025
މަގާމުގެއްލޭހިސާބުން އެމީހުން ހިންގަނީ ކޮން އޮފީހެއްތަ ހައްތަހާވެސް ފެންނަނީ އަމިއްލަ ޕާޓީގެ ކަންކަމުގަ ނޫނީ އަމިއްލަ އާއިލާ ކަންކަމުގަ އުޅޭތަން. މި ފެންނަނީ ރައްޔިތުންގެ ފައިސާއިން ވަކިބަޔަކަށް ބަލަދު އަރާގޮތައް ހަދާފަހުންނަ ގާނޫނުތައް އެހެޔޮ ވެރިކަމުގަ ހުރެގެންވެސް ރައްޔިތުންގެ ފައިސާ ހިޔާނާތްވިޔަސް. ބޭސްފަރުވާއަށްވެސް މިމީހުންނަށް ހިލޭ.
ޢައްބާސު
28 November 2025
މިގައުމަށް ނައިބު ރައީސުން ބޭނުންވޭތަ، ބޭނުމެއްނެތް ބޭކާރު ޚަރަދު ކުރަންޖެހޭ މަޤާމެއް... ފަސްޓްލޭޑީއެއް ހުރީމަ ފުދޭ ކަމުގެ އިހްސާސް ކުރެވެނީ. ފައިސަލް ފިޔަވައި ނައިބު ރައީސްގެ ގޮތުގައި ޖަލްސާތަކާއި އިވެންޓްތަކުން ފެނުނު މީހަކުވެސް ނެތް. ރައީސް ނެތް ހާލަތަކު މަޖިލީސް ރައީސް ގައުމުހިންގާނެ. ޤާނޫނަށް ގެންނަންޖެހޭ ބަދަލެއްމިވެސް..
ޕޫރުބެ
27 November 2025
ތީ ތަފާތު ކުރުމެއް! ރައީސްކަން ކުރި މީހުންގެ ތެރޭގައި ދައުރު ފުރިހަމަނުކުރާ 2 މީހަކަށް ޕެކޭޖު ލިބެނީ ކީއްވެ؟ ކަމެއް ކުރާއިރު އިންޞާފުން އެންމެ ކަމެއްވެސް ކޮށްލަން ނުކެރޭ
ޓޯން
27 November 2025
انشالله ފިއުޗަރ ޕްރެޒިޑެންޓް އޮފް މޯލްޑިވްސް. ކުރިމަތި ލައިފިއްޔާ. ކުރިމަތި ލާނެ ނަމަ ކިތަންމެ ހާވެސް ރަނގަޅު.
ހެޔޮނިޔަތުގައި
27 November 2025
ސިފައިންގެ ތެރެއިން ރިތަޔަރ ކޮށްފައިވާ ކާނަލުންނާ ކެޕްޓަނުންނާ ފުލުހުންގެ ތެރެއިން މަތީ މަޤާމްތަކުން ރިޓަޔާ ކޮށްފައިވާމީހުން ދައުލަތުގެ މިނިސްޓަރ ކަމާއި މަޖުލީހުގެ މެމބަރކަން ކުރމުން ގެންދާއިރު ރިޓަޔަރމެންޓް އިނާޔަތްތައް ނުދޭގޮތަށް ހަމަޖައްސަން ވާނެއެވެ.
އިހްސާސް
27 November 2025
ދައުލަތުގެ ބަޖެޓުން ހިންގާ ސިޔާސީ ޕާޓީތައްވެސް އެނޫން ގޮތަކަށް ބަދަލު ކުރަންޖެހޭ.. އެޕާޓީއެއްގެ އެންމެހާ މެމްބަރުން އަތުން ޗަންދާނަގައިގެންނާ ސްޕޮންސަރުން ހޯދައިގެން ހިންގަންޖެހޭނީ. ދައުލަތް ދަރަނިކޮށްގެން ސިޔާސީ ޕާޓީތަކަށް ފައިސާދިނުން ހުއްޓާ..
ދިއްދޫމީހާ
27 November 2025
ބަލަ ވަހީދުއަ އިނާޔަތް ލިބެންޔާ ދައުރު ފުރިހަމަ ނުކުރާ ނައިބުންނަވެސް ލިބެންވާނެ…ވަހީދު ރައީސްކަމުގެ ފަސްއަހަރު ދައުރެއް އަދާކުރިތޯ؟
އަހްލަމް ހަލީމް
27 November 2025
ވަރަށް ބޭކާރު ހަރަދެެއް ބޮޑު ތަނުން މި ކުޑަވީ. މީގެން އެހެން ރަނގަޅު ކަންކަމަށް ދެން ހަރަދު ކުރެވޭނެ
އަމީން މުހައްމަދު
27 November 2025
ހަރަދު ކުޑަކުރަން ފަށަން އެއްމެ ރަނގަޅު ކަންކަމުން މި ފެށީ