ނޭޝަނަލް ޑްރަގް އެޖެންސީ (އެންޑީއޭ) ގެ އާ ޗެއާމަނަކަށް އަހުމަދު ސިއްދީގް އިއްޔެ އައްޔަންކުރައްވައިފި އެވެ.
ހޯމް މިނިސްޓްރީގެ ސްޓޭޓް މިނިސްޓަރުކަމުގެ މަގާމުގައި ހުންނެވި ސިއްދީގް އެންޑީއޭގެ އެންމެ އިސްވެރިޔަކަށް އައްޔަން ކުރެއްވީ މިދިޔަ އަހަރުގެ ޖޫން 13 އިން ފެށިގެން އެ މަގާމު ފުރުއްވަމުން ގެންދެވި ލުބްނާ ޒާހިރު ހުސައިން މީގެ ދެ މަހެއްހާ ދުވަސް ކުރިން ފޮރިން މިނިސްޓްރީ އަށް ބަދަލުކުރެއްވުމުން މަގާމު ހުސްވެފައިވާތީ އެވެ.
ހޯމް މިނިސްޓްރީގެ ދަށުން ހިންގަމުން އަންނަ އެންޑީއޭގެ މަސްއޫލިއްޔަތުތަކުގެ ތެރޭގައި ހިމެނެނީ މަސްތުވާތަކެތި ބޭނުންކުރުމާއި ޕެޑްލް ކުރުމާއި ޓްރެފިކް ކުރުމުގެ މައްސަލަ އަށް ހައްލު ހޯދުމަށް ފިޔަވަޅު އެޅުމާއި މަސްތުވާތަކެއްޗާ ގުޅިފައިވާ ކުށްކުށާއި މަސްތުވާތަކެތި ބޭނުންކުރުމާ ގުޅިގެން ހިންގާ ހަރުކަށި އަމަލުތަކާއި މަސްތުވާތަކެތި ބޭނުންކުރުމުގެ ސަބަބުން އުފެދޭ ސިއްހީ މައްސަލަތައް ދެނެގަނެ، އެކަމާ ދެކޮޅަށް ގައުމީ ސިޔާސަތުތައް ތަންފީޒު ކުރުން ފަދަ ކަންކަމެވެ.
މީގެ އިތުރުން މަސްތުވާތަކެތި ބޭނުންކުރާ މީހުންނަށް ފަރުވާ ދީ، އެ މީހުން ރަނގަޅުކޮށް، އަނބުރާ މުޖުތަމައު އަށް ނެރުމަކީ އެންޑީއޭގެ އެންމެ އިސް އެއް މަސްއޫލިއްޔަތެވެ.
އެކަމަކު، މިހާތަނަށް ވެސް އެންޑީއޭގެ ފަރާތުން އެ ޒިންމާ އެންމެ ރަނަގަށް އަދާނުކުރެވުމާއި މަސްތުވާތަކެތި ބޭނުންކުރާ މީހުން ރަނގަޅުކޮށް މުޖުތަމައު އަށް އަނބުރާ ނުގެނެވޭ މައްސަލަ ހައްލު ނުވާތީ އާންމުންގެ ޝަކުވާ އަބަދު ވެސް އިންތިހާއަށް ބޮޑެވެ.
