ބޮލީވުޑްގެ އާ އެކްޓަރު އަދި ސުޕަސްޓާރު އަަމީތާބް ބައްޗަންގެ ކާފަ ދަރިފުޅު އަގަސްތިޔަ ނަންދާގެ ދެވަނަ ފިލްމު "އިއްކިސް"އަށް ބޮކްސް އޮފީހުގައި ފުރަތަމަ ތިން ދުވަހު ރަނގަޅު އާމްދަނީއެއް ލިބިއްޖެ އެވެ.
ރިޕޯޓްތައް ބުނި ގޮތުގައި، މިދިޔަ ބުރާސްފަތި ދުވަހު ރިލީޒްކުރި އެ ފިލްމަށް ފުރަތަމަ ތިން ދުވަހު ވަނީ 15.1 ކްރޯޑް ރުޕީސް ލިބިފަ އެވެ.
ހަގީގީ ހާދިސާއެއްގެ މައްޗަށް ބިނާކޮށް މެޑޮކް ފިލްމްސް އިން ގެނެސްދޭ ހަނގުރާމަ މަތީ ފިލްމު "އިއްކިސް"އަށް ޖުމްލަކޮށް ލިބިފައި ވަނީ ވެސް ރަނގަޅު ރިވިއުތަކެވެ.
އެ ފިލްމުގައި އަގަސްތިޔަ ކުޅެނީ އިންޑިއާގެ އަސްކަރިއްޔާގެ ސެކަންޑް ލުޓެނެންޓް އަރުން ކެތަރުޕަލްގެ ރޯލެވެ. އަރުންއަކީ އިންޑިއާގެ އަސްކަރިއްޔާއިން ދޭ އެންމެ މަތީ ޝަރަފުގެ އެވޯޑް ކަމަށްވާ ޕަރަމް ވީ ޗަކްރާ އެންމެ ހަގު އުމުރުގައި ލިބުނު ސިފައިންގެ މީހާ އެވެ. އޭނާއަށް އެ އެވޯޑް ލިބުނީ 21 އަހަރުގަ އެވެ.
އަގަސްތިޔައަކީ އަމީތާބްގެ ދޮށީ ދަރިފުޅު ޝްވެތާ ބައްޗަން ނަންދާގެ ހަގު ދަރިފުޅެވެ. ޝްވެތާގެ ފިރިމީހާ ނިކިލް ނަންދާއަކީ ބޮލީވުޑްގެ ކުރީގެ ލެޖެންޑް ރާޖް ކަޕޫރުގެ ދަރިފުޅު ރީތޫ ނަންދާ ދަރިއެކެވެ. އެހެންކަމުން، އަގަސްތިޔައަކީ ރާޖް ކަޕޫރަށް މުނިކާފަ ކިޔާ ކުއްޖެކެވެ.
އެ ފިލްމުގައި ދައްކާނީ އަރުންގެ ސިފައިންގެ ތެރެއަށް ވަތް ހިސާބުން އޭނާގެ ދިރިއުޅުމުގައި ހިނގާފައިވާ ކަންކަމެވެ.
އަގަސްތިޔަ ބޮލީވުޑަށް ތައާރަފުވީ މިދިޔަ އަހަރު ނެޓްފްލިކްސް އިން ގެނެސްދިން "ދި އާޗީސް" އިންނެވެ. އެ ފިލްމަށް މާ ބޮޑު ތަރުހީބެއް ނުލިބުނު ނަމަވެސް، އަގަސްތިޔަގެ އެކްޓިންނަށް ތައުރީފު ލިބިފައިވެ އެވެ.
"އިއްކިސް" ޑައިރެކްޓުކުރީ "ބަދުލާޕޫރް" އާއި "އަންދާދުން" އަދި "މެރީ ކްރިސްމަސް" ކަހަލަ ފިލްމުތައް ގެނެސްދީފައިވާ ސްރީރާމް ރާގަވަން އެވެ.