ކުރީގެ ރައީސް އަބްދުﷲ ޔާމީންގެ ވެރިކަމުގައި ދެ ރަށެއްގައި ނަރުދަމާ ނިޒާމު ގާއިމުކުރަން ހަވާލުކުރި އެއްބަސްވުމަކާ އެއްގޮތަށް ފައިސާ ނުދައްކާ އޮތް މައްސަލައެއްގައި މިދިޔަ ސަރުކާރުން ހެދި ސެޓުލްމަންޓް އެއްބަސްވުމަކަށް މި ސަރުކާރުން އަމަލު ނުކުރުމުން ހައުސިން އެންޑް ކޮންސްޓްރަކްޝަން މިނިސްޓްރީއާ ދެކޮޅަށް އެ ކުންފުނިން ދައުވާކޮށްފި އެވެ.
މިނިސްޓްރީއާ ދެކޮޅަށް ސިވިލް ކޯޓުގައި ދައުވާކޮށްފައިވަނީ ތ. ވޭމަންޑު އާއި ޅ. ނައިފަރުގައި ފެނާއި ނަރުދަމާ ނިޒާމް ގާއިމްކުރަން 2017 ވަނަ އަހަރު ހަވާލުކުރި އެލްއީ ޓްރިވޭނީ ޖޭވީ ކުންފުނިންނެވެ.
އެ މަޝްރޫއުގެ އެއްބަސްވުމުގެ ދަށުން ލިބެންޖެހޭ ފައިސާތަކެއް ނުލިބިގެން ފައިސާ ހޯދުމުގެ މައްސަލަ ހައްލުކުރުމަށް އާބިޓްރޭޝަންގެ ނޯޓިސް ފޮނުވާފައިވެ އެވެ. އަދި އިންޑިއާގެ ނިއު ދިއްލީގެ ހައި ކޯޓަށް މައްސަލައެއް ވެސް ހުށަހަޅާފައިވެ އެވެ.
އެއާ އެކު، ދިވެހި ސަރުކާރުން ވަނީ އެ ކުންފުންޏާ އެކު އާބިޓްރޭޝަނުން ބޭރުން މައްސަލަ ހައްލުކުރަން ގިނަ މަޝްވަރާތަކެއްކޮށް، ސެޓުލްމަންޓް އެއްބަސްވުމެއް ހަދައިފަ އެވެ. އެ އެއްބަސްވުން ހަދާފައިވަނީ ސެޕްޓެމްބަރު 24، 2023ގަ އެވެ. އެއީ ރިޔާސީ އިންތިހާބުގެ ފުރަތަމަ ބުރު ނިމި، ދެ ވަނަ ބުރުގެ ވޯޓަށް ތައްޔާރުވަމުން ދަނިކޮށެވެ.
އެ އެއްބަސްވުމުގެ ދަށުން، އިންޑިއާގެ ހައި ކޯޓުގައި އޮތް މައްސަލަ އެެއް މަސް ދުވަސް ތެރޭ ނަގަން އިންޑިއާ ކުންފުނިން އެއްބަސްވި އެވެ. އަދި ކޯޓުން މައްސަލަ ނަގާތާ 15 ދުވަހުގެ ތެރޭ ބަދަލުގެ ގޮތުގައި 648،508 ޑޮލަރު (10 މިލިއަން ރުފިޔާ) ދޭން އޭރުގެ ސަރުކާރުން އެއްބަސްވި އެވެ.
އިންޑިއާ ކޯޓުގައި އޮތް މައްސަލަ ނަގައި، އެކަން ސަރުކާރަށް އޮކްޓޯބަރު 29، 2023 ގައި އަންގާފައިވެ އެވެ. ފައިސާ ދައްކަން ހަނދާންކޮށްދީ ސަރުކާރަށް އެތައް ސިޓީއެއް އަދި އީމެއިލްތަކެއް ފޮނުވާފައިވީ ނަމަވެސް، މިހާތަނަށް ވެސް އެއްވެސް ފައިސާއެއް ދައްކާފައިނުވާ ކަމަށް ބުނެ ކުންފުނިން ވަނީ ސިވިލް ކޯޓުގައި ދައުވާކޮށްފަ އެވެ.
ކުންފުނިން ކޯޓުގައި އެދިފައިވަނީ ސެޓުލްމަންޓް އެއްބަސްވުމުގެ ދަށުން އެއްބަސްވެފައިވާ ބަދަލުގެ ފައިސާ ހައުސިން މިނިސްޓްރީން ދައްކަން އަމުރުކޮށްދިނުމަށެވެ. އޭގެއިތުރުން، އިންޓްރަސްޓް ގޮތުގައި އަރާފައިވާ ފައިސާ އާއި ޝަރީއަތުގެ ހަރަދު ނަގައިދިނުމަށް ވެސް ދައުވާކޮށްފައިވެ އެވެ.
ސިވިލް ކޯޓަށް މައްސަލަ ހުށަހަޅާފައިވަނީ މިދިޔަ މަހުގެ 17 ވަނަ ދުވަހު އެވެ.