އޮފީސްތަކުގެ ޓެލެޑްރާމާ މުބާރާތްތަކުގައި ކުރީގެ އެޓޯލްސް މިނިސްޓްރީން ބައިވެރިކުރި ޑްރާމާތަކުންނާއި ދިވެހި ފިލްމު "ޒުލޭހާ" އިން މަޝްހޫރުކަން ހޯދި މުހައްމަދު ނައީމް ނިޔާވެއްޖެ އެވެ.
މ.މެދުމާ ޕެލަސް، މުހައްމަދު ނައީމް 71، ނިޔާވީ ރޭގެ ވަގުތެއްގަ އެވެ. އޭނާގެ ޖަނާޒާ ބާއްވާނީ މިއަދުގެ މެންދުރު ނަމާދަށް ފަހު އާސަހަރާ މިސްކިތުގަ އެވެެ.
އެޓޯލްސް މިނިސްޓްރީގެ ބައެއް ޑްރާމާތަކުގައި ރުޅިގަދަ ބައްޕައެއްގެ ބައި އަދި ބައެއް ޑްރާމާތަކުގައި މަޑުމައިތިރި ބައްޕައެއްގެ ބައި ވެސް ނައީމް ކުޅެފައިވެ އެވެ. އޭގެ އިތުރުން ބައެއް ފިލްމުތަކާއި ޓީވީއެމުން ގެނެސްދިން ބައެއް ޑްރާމާތައް ވެސް އޭނާ ކުޅުނެވެ.
ނައީމް ކުޅުނު ފިލްމުތަކުގެ ތެރެއިން އެންމެ މަޝްހޫރު ފިލްމަކީ ޔޫސުފް ޝަފީއު (ޔޫއްޕެ) އާއި މަރިޔަމް ނިޝާ އަދި ޝީލާ ނަޖީބް ލީޑް ރޯލުތައް ކުޅުނު ދިވެހި ފިލްމު "ޒުލޭހާ" އެވެ. އެ ފިލްމުގައި އޭނާ ކުޅުނީ ޔޫއްޕެގެ ބައްޕަގެ ރޯލެވެ.
ފާތިމަތު ނަހުލާ ޑައިރެކްޓުކުރި އެ ފިލްމަށް 2007 ވަނަ އަހަރުގެ ގައުމީ ފިލްމް އެވޯޑްސްގައި އެންމެ މޮޅު ފިލްމުގެ އެވޯޑް ލިބުނުއިރު، އެ ފިލްމުގެ އެކްޓަރުންނަށް ވެސް އެކި ގެޓަގަރީތަކުން އެވޯޑް ލިބުނެވެ.