ލޯކަލް ކައުންސިލް އިންތިހާބަށް ވަގުތު ކުޑަތަން ވަމުން އަންނައިރު، އެކި ކައުންސިލްތަކުން ވަޒީފާތަކަށް އިއުލާން ކުރުން މި ދުވަސްވަރު އިތުރުވެފައިވާ ކަމަށް ލޯކަލް ގަވަމެންޓް އޮތޯރިޓީ (އެލްޖީއޭ) އިން މިއަދު ބުނެފި އެވެ.
ކައުންސިލްތަކުގެ ބެލެނިވެރި އިދާރާގެ ސީއީއޯ މުހައްމަދު ނިމާލް "މިހާރު" އަށް ވިދާޅުވީ މި ދުވަސްވަރު ބައެއް ކައުންސިލްތަކުން މިސްކިތްތައް ފޮޅާ ސާފުކުރާނެ މުވައްޒަފުންނާއި ރަށުތެރެ ސާފުކުރުން ފަދަ މަސައްކަތްތަކަށް މީހުން ހޯދަން އިއުލާންކުރާ އަދަދު އިތުރުވެފައިވާ ކަން ފާހަގަވާ ކަމަށެވެ.
"މިސްކިތްތައް ސާފުކުރަން މުވައްޒަފުން ބޭނުންވެއޭ ބުނީމާ އަޅުގަނޑުމެން އެ ކަމަށް ވަރަށް ބޮޑު އިސްކަމެއް ދެން. އެކަމަކު، އެ ރަށްރަށުން ހަމަ ވަރަށް ގިނައިން ޝަކުވާ އާދޭ އެ ހުއްދައިގެ މަގުސަދާ ހިލާފަށް އަމަލުކުރާ ކަމަށް. ނާޖާއިޒު ބޭނުން ހިފައިގެން މުވައްޒަފުން މި ދުވަސްވަރު ނަގާ ކަމުގެ ޝަކުވާ އެހާ ގިނަ،" ނިމާލް ވިދާޅުވި އެވެ.
ލާމަރުކަޒީ ގާނޫނަށް މިދިޔަ އަހަރު ގެނައި އިސްލާހުގެ ދަށުން ލޯކަލް ކައުންސިލުގެ އުމުރު ހަމަވުމުގެ އެއް އަހަރު ނުވަތަ އެ އަށް ވުރެ ކުރު މުއްދަތުގައި، ކައުންސިލްތަކަށް މުވައްޒަފުން ނެގޭނީ އެލްޖީއޭ އާއި ފިނޭންސް މިނިސްޓްރީގެ ހުއްދަ ލިބިގެން ކަމަށް ނިމާލް ވިދާޅުވި އެވެ.
ނަމަވެސް، އެ ހުއްދަ ނުހޯދާ ބައެއް ކައުންސިލްތަކުން ވަޒީފާތަކަށް އިއުލާންކުރަމުން ދާ ކަމަށް އޭނާ ވިދާޅުވި އެވެ.
"ގާނޫނަށް ގެނައި އިސްލާހުގެ ބޭނުމަކީ ކޮންމެހެން ކައުންސިލްތައް ހުއްޓުވުމެއް ނޫން. އުސޫލެއްގެ ތެރެއިން ކަންކަން ކުރުން ބޭނުމަކީ،" އެލްޖީއޭގެ ސީއީއޯ ވިދާޅުވި އެވެ.
ނިމާލް ވިދާޅުވި ގޮތުގައި، މި ދުވަސްވަރު ކައުންސިލްތަކަށް މުވައްޒަފުން ނެގުން އާދަޔާ ހިލާފަށް އިތުރުވެފައި ވިޔަސް އެލްޖީއޭ އިން ހުރިހާ ކައުންސިލްތަކަށް ވެސް އަންގަނީ ސިވިލް ސާވިސް ގަވާއިދާ އެއްގޮތަށް އަމަލު ކުރުމަށެވެ.
އޭގެ ތެރޭގައި ވަޒީފާތަކަށް މީހުން ނެގުމުގެ ހުއްދަ ސިވިލް ސާވިސް ކޮމިޝަންގެ ލިޔުމަކުން ހޯދުމާއި ފިނޭންސް މިނިސްޓްރީގެ ހުއްދަ ހޯދުން ހިމެނޭ ކަމަށް އޭނާ ވިދާޅުވި އެވެ.
ލާމާރުކަޒީ ގާނޫނަށް ގެނައި އިސްލާހުގެ ދަށުން އެލްޖީއޭ އިން ހެދި އުސޫލުގައިވާ ގޮތުގައި، ކައުންސިލުގެ އުމުރު ހަމަވުމުގެ އެއް އަހަރު ނުވަތަ އެ އަށް ވުރެ ކުރު މުއްދަތުގައި، ކައުންސިލުގެ އިހުތިސާސްގެ ދަށުގައި ހުރި ބިމާއި ފަޅާއި ފަރުގެ ސަރަހައްދު ކުއްޔަށް ދޫކުރުމާއި ދިނުމާއި ކައުންސިލްތަކުން އެކަށައަޅާފައިވާ ތަރައްގީގެ ޕްލޭންތަކުގައި ކަނޑައަޅާފައި ނުވާ މަޝްރޫއުތައް ވެސް ހިންގޭނީ އެލްޖީއޭ އާއި މިނިސްޓްރީގެ ހުއްދަ ލިބިގެންނެވެ.
ސަރުކާރުން ލަމާރުކަޒީ ގާނޫނަށް އެ އިސްލާހު ގެނައީ ކައުންސިލް އިންތިހާބުތަކާ ދިމާކޮށް އިންތިހާބަށް ނުފޫޒު ފޯރުވުމުގެ ގޮތުން ވަޒީފާތަކަށް އިއުލާން ކުރުމުގެ ފުރުސަތު ނުދިނުމަށެވެ.