ލޯކަލް ކައުންސިލް އިންތިހާބު ބޯމަތިވެފައި ވަނިކޮށް ގދ. ފިޔޯރީ ކައުންސިލުން 18 މުވައްޒަފަކު ހޯދަން އިއްޔެ އިއުލާންކޮށްފި އެވެ.
އެ އިއުލާނުގައި ބުނީ ކޮންޓްރެކްޓް އުސޫލުން ދެ އަހަރެއްހާ ދުވަސް (23 މަސްދުވަހަށް) އެ އިދާރާގައި މަސައްކަތް ކުރާނެ 18 ކައުންސިލް އެސިސްޓެންޓް (އިޖުތިމާއީ) ހޯދަން ބޭނުންވާ ކަމަށެވެ.
ސިވިލް ސާވިސްގެ އުސޫލުން އިއުލާންކޮށްފައިވާ އެ މަގާމުތަކުގެ އަސާސީ މުސާރައަކީ މަހަކު 7,700ރ. އެވެ. މަގާމުގެ އެލަވަންސްގެ ގޮތުގައި މަހަކު 2,310ރ. އާއި ހާޒިރުވާ ކޮންމެ ދުވަހަކަށް 60ރ. ގެ ހާޒިރީ އިނާޔަތެއް ލިބޭނެ ކަމަށް އެ އިއުލާނުގައިވެ އެވެ.
އެ މަގާމުގެ މައިގަނޑު މަސްއޫލިއްޔަތުތަކުގެ ތެރޭގައި ހިމެނެނީ؛
- ރަށުގެ އިޖުތިމާއީ ސަރަހައްދުތައް ކުނިކަހާ ސާފުކުރުން
- ގަސްތައް ކޮށާ ބެލެހެއްޓުން
- ޑަސްބިންތައް ހުސްކުރުން
- ކައުންސިލްގެ އިދާރާއިން ހިންގާ ތަފާތު ޕްރޮގްރާމްތަކާއި މުނާސަބަތުތަކުގައި އެހީތެރިކަން ފޯރުކޮށްދިނުން
އެ އިއުލާނުގައި ބުނި ގޮތުގައި، އެ މަގާމުތަކަށް ބޭނުންވަނީ ލިޔަންކިޔަން ދަންނަ މީހުންނެވެ. ލިޔަންކިޔަން އެނގޭކަން ކަށަވަރު ކުރާނީ ސްކްރީނިން މަރުހަލާގައި ނުވަތަ ރަސްމީ އިދާރާއަކުން ދޫކޮށްފައިވާ ލިޔުމަކަށް ބަލައިގެންނެވެ. ގްރޭޑް 5 ނުވަތަ އެ އަށް ވުރެ މަތީ ގްރޭޑެއް ނިންމިކަން އަންގައިދިނުމުގެ ގޮތުން ސްކޫލަކުން ދޫކޮށްފައިވާ ލިޔުން ބަލައިގަންނާނެ އެވެ.
އެ މަގާމުތަކަށް ޝައުގުވެރިވާ މީހުން ވަޒީފާ އަށް އެދޭ ފޯމާއި ލިޔުންތައް ފިޔޯރީ ކައުންސިލްގެ އިދާރާއަށް ނުވަތަ އީ-މެއިލް މެދުވެރިކޮށް އަންނަ ބުރާސްފަތި ދުވަހުގެ މެންދުރު 2:00 ގެ ކުރިން ހުށަހެޅުމަށް އެ އިއުލާނުގައި ބުނެފައިވެ އެވެ.
އެ ވަޒީފާ އަށް މީހުން ހޮވުމަށް ބާއްވާ އިންޓަވިއުތައް އޮންނާނީ އަންނަ މަހު ފަހަކުން ފެށިގެން 12 ވަނަ ދުވަހާ ދެމެދުގައި ކަމަށް އެ އިއުލާނުގައި ބުންޏެވެ.
ފިޔޯރީ ކައުންސިލުން މި އިއުލާންކުރި އިރު، އަންނަ އެޕްރީލް މަހުގެ ހަތަރު ވަނަ ދުވަހު ބާއްވާ ލޯކަލް ކައުންސިލް އިންތިހާބާ ދިމާކޮށް، ހާއްސަ ހުއްދައެއް ނެތި ކައުންސިލްތަކަށް އާ މުވައްޒަފުން ނެގުން ސަރުކާރުން ވަނީ މަނާކޮށްފަ އެވެ.
އެލްޖީއޭ އިން "މިހާރު" އަށް މިއަދު ބުނީ ކައުންސިލަށް ގިނަ އަދަދެއްގެ މުވައްޒަފުން ނަގަން ފިޔޯރީ ކައުންސިލުން އެދުމުން ފިނޭންސް މިނިސްޓްރީ އާއި ސިވިލް ސާވިސް ކޮމިޝަންގެ ހުއްދަ ހޯދައިގެން އެކަން ކުރިއަށް ގެންދަން އަންގާފައިވާ ކަމަށެވެ.
ފިޔޯރީ ކައުންސިލަށް ގިނަ އަދަދެއްގެ މުވައްޒަފުން ހޯދަން އިއުލާން ކުރިއިރު، އެ ކައުންސިލްގެ މިހާރުގެ ރައީސް ފައިޒަލް ރަޝީދު ވަނީ ކުރިއަށް އޮތް ލޯކަލް ކައުންސިލްތަކުގެ އިންތިހާބުގައި އަމިއްލަ ގޮތުން ވާދަކުރައްވަން ނިންމަވައިފަ އެވެ.
ސަރުކާރުން ލާމަރުކަޒީ ގާނޫނަށް މިދިޔަ އަހަރު ގެނައި އިސްލާހުގެ ދަށުން ލޯކަލް ގަވަމެންޓް އޮތޯރިޓީ (އެލްޖީއޭ) އިން މިދިޔަ ނޮވެމްބަރު މަހު އާންމުކުރި "ކައުންސިލްތަކުގެ ފަހު އަހަރު މުވައްޒަފުން ނެގުމާއި ބިންތައް ދޫކުރުމުގެ އުސޫލު"ގައިވާ ގޮތުގައި ލޯކަލް ކައުންސިލުގެ އުމުރު ހަމަވުމުގެ އެއް އަހަރު ނުވަތަ އެ އަށް ވުރެ ކުރު މުއްދަތުގައި، ކައުންސިލްތަކަށް މުވައްޒަފުން ނެގޭނީ އެ އޮތޯރިޓީ އާއި ފިނޭންސް މިނިސްޓްރީގެ ހުއްދަ ލިބިގެންނެވެ.
އެ އުސޫލުގައިވާ ގޮތުން، ކައުންސިލުގެ އުމުރު ހަމަވުމުގެ އެއް އަހަރު ނުވަތަ އެ އަށް ވުރެ ކުރު މުއްދަތުގައި، ކައުންސިލުގެ އިހުތިސާސްގެ ދަށުގައި ހުރި ބިމާއި ފަޅާއި ފަރުގެ ސަރަހައްދު ކުއްޔަށް ދޫކުރުމާއި ދިނުމާއި ކައުންސިލްތަކުން އެކަށައަޅާފައިވާ ތަރައްގީގެ ޕްލޭންތަކުގައި ކަނޑައަޅާފައި ނުވާ މަޝްރޫއުތައް ވެސް ހިންގޭނީ އެލްޖީއޭ އާއި މިނިސްޓްރީގެ ހުއްދަ ލިބިގެންނެވެ.