ސަރުކާރާ އެއް ވިސްނުމެއްގައި ހިންގާ ސިޓީ ކައުންސިލެއް އައްޑޫގައި ނެތް ނަމަ އެ ސިޓީގެ ތަރައްގީ އަށް ސަރުކާރުން ރާވާފައި ހުރި މުހިންމު މަޝްރޫއުތައް ވަރަށް ފަސޭހައިން ހުއްޓުވައިލުމުގެ މަގު ހުޅުވޭނެ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
އަންނަ މަހު ހަތަރެއްގައި ބާއްވާ ލޯކަލް ކައުންސިލް އިންތިހާބަށް ޕީއެންސީގެ "ދަ ގްރޭޓާ އައްޑޫ" ކެމްޕެއިން އިފްތިތާހުކުރުމަށް ހެންވޭރު އާޓިފިޝަލް ބީޗުގައި ބޭއްވި ރަސްމިއްޔާތުގައި ރައީސް މުއިއްޒު ވިދާޅުވީ އައްޑޫގެ ކަރަންޓުގެ މައްސަލައަކީ މިދިޔަ އެތައް ސަރުކާރަކަށް ހައްލު ނުވެ އޮތް މައްސަލައެއް ކަމަށެވެ.
މިދިޔަ ސަރުކާރުގައި ރައްޔިތުންގެ މަޖިލީހާއި ކައުންސިލްގެ މެޖޯރިޓީ އެމްޑީޕީއަށް އޮވެމެ، އެ މައްސަލަ ހައްލުކޮށްދީފައި ނުވާކަން ރައީސް ފާހަގަކުރެއްވި އެވެ.
މި ސަރުކާރުން އެ މައްސަލައަށް ދާއިމީ ހައްލެއް ގެނެސްދޭން އުޅޭއިރު ސިޓީ ކައުންސިލުން އެކަމަށް ހުރަސްއަޅާ ކަމުގެ އިޝާރާތެއް ވެސް ރައީސް ދެއްވި އެވެ.
ރައީސް ވިދާޅުވި ގޮތުގައި، ސަރުކާރާ އެއް ވިސްނުމުގެ ކައުންސިލެއް ހުރިހާ ރަށެއްގައި ވެސް އޮންނަން ޖެހެނީ އެ ހުރަސްތައް ކުޑަކުރުމަށެވެ.
"ލާމަރުކަޒީ ނިޒާމުގައި ކައުންސިލްތަކަކީ ވަރަށް ގިނަ ޒިންމާތަކާއި މަސްއޫލިއްޔަތުތަކާއި ބާރުތައް ދީފައި އޮންނަ ބައެއް. މި ބާރުތައް ބޭނުންކޮށްގެން ވަރަށް ގިނަ ކަންކަން ހުއްޓުވޭނެ. ހުރަސްތައް ކުރިމަތި ކުރެވޭނެ،" ރައީސް މުއިއްޒު ވިދާޅުވި އެވެ.
"ސިޔާސީ ވިސްނުމުގައި، އަޅުގަނޑުމެންނާ ދެކޮޅު ސިޔާސީ ވިސްނުމުގެ ބަޔަކަށް އައްޑޫ ސިޓީގެ މެޖޯރިޓީ ނޫނީ މޭޔަރުގެ މަގާމު ފަދަ މުހިންމު މަގާމުތައް ދީފިކަމުގައި ވާ ނަމަ، އެ ބާރުތައް ބޭނުންކޮށްގެން ކޮށްލާ ކުޑަކުޑަ ކަމަކުން އެތައް މަހެއް ފަހަތަށް ޖައްސާލެވޭނެ."
އެހެންވެ، އެ ކަހަލަ ކަންކަން ކުރުމަށް ހަމަ އެއްވެސް ފުރުސަތެއް ނުދިނުމަށް ރައީސް އިލްތިމާސް ކުރެއްވި އެވެ.
"ހަމައެކަނި އައްޑޫ ސިޓީއެއް ނޫން، މުޅި ރާއްޖޭގެ ހުރިހާ ކައުންސިލްތަކުން ވެސް ކުރިއަށް އޮތް އިންތިހާބުގައި އަޅުގަނޑުމެންގެ ކެންޑިޑޭޓުން ހޮވުމުގައި އަޅުގަނޑު ދަންނަވަން އޮތް ވާހަކައަކީ މިއީ،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި، ކައުންސިލް އިންތިހާބަކީ އާއިލާތަކުގެ މެދުގައި ވަރަށް ބޮޑަށް، އާއިލީ ވިސްނުމުގައި ވޯޓު ދޭ އިންތިހާބަކަށް ރާއްޖޭގައި ވެފައި އޮތް ނަމަވެސް، މުޅި ސިޓީ ނޫނީ މުޅި ރަށުގެ ތަރައްގީ އަށް އިސްކުރަން ޖެހޭ މަސްލަހަތު އިސްކުރުމަކީ ކޮންމެ މީހެއްގެ ޒިންމާއަކަށް ވާން ޖެހެ އެވެ.
ވިޔަފާރިގެ ދާއިރާއިން ސަރުކާރުން އައްޑު އަށް ގެންގުޅޭ ބޮޑު ތަސައްވުރާ ބެހޭ ގޮތުން ރައީސް ވިދާޅުވީ، މި އަހަރުގެ ރިޔާސީ ބަޔާނުގައި އިއުލާން ކުރައްވާފައިވާ ގޮތަށް ކުދި އަދި މެދުފަންތީގެ ވިޔަފާރިގެ ހަބަކަށް އައްޑޫ ހެދުން ކަމަށެވެ. މި އަހަރުގެ ތެރޭގައި އޭގެ ގާނޫނީ އަދި އިދާރީ މަސައްކަތް ނިންމައި، އަންނަ އަހަރުގެ ޖެނުއަރީ މަހުގެ އެއްވަނަ ދުވަހުން ފެށިގެން ތިން އަހަރަށް އައްޑުއަކީ އެސްއެމްއީތައް ފުޅާކޮށް އިނެވެސްޓުކުރެވޭނެ "ރަންޒަމާކަަށް" ވާނެ ކަމަށް ރައީސް ވިދާޅުވި އެވެ.
އެ މަނިކުފާނު ވިދާޅުވީ ރަށްރަށުގެ ބިންތަކަކީ ކައުންސިލްތަކުގެ ބެލުމުގެ ދަށުގައި ހުންނަ ތަންތަން ކަމަށް ވާތީ، މި ކަހަލަ އުއްމީދީ މަޝްރޫއުތަކަށް އެންމެ ފަސޭހައިން ހުރަސްއަޅާނެ ބަޔަކީ ކައުންސިލްތައް ކަމަށެވެ.
"ސަރުކާރާ އެއް ވިސްނުމެއްގައި އޮތް ކައުންސިލެއް އައްޑޫ ސިޓީގައި ނެތް ނަމަ މޭޔަރެއް ނެތް ކަމުގައި ވާންޏާ، ހަމަ ވަރަށް ފަސޭހައިން މި ކަންކަން ހުއްޓުވާލެވޭނެ. އެހެންވީމާ، އެ ފުރުސަތު ދޭ ބަޔަކަށް އައްޑޫ ރައްޔިތުން ނުވުމަށް އަޅުގަނޑު މި އެދެނީ،" ރައީސް ވިދާޅުވި އެވެ.